(ភ្នំពេញ)៖ ទីបំផុតពាក្យចចាមអារ៉ាម ដែលបានបោកបក់នាពេលកន្លងមក ធ្លាប់និយាយតៗគ្នាថា តារាចម្រៀង ខេមរៈ សិរីមន្ត ត្រៀមចេញពីផលិតកម្ម សាន់ដេ ដើម្បីទៅបើកផលិតកម្ម ខ្លួនឯងនោះ ត្រូវបានរលាយសាបសូន្យ ដូចអំបិលត្រូវទឹក នៅពេលដែលផលិតរស្មីហង្សមាស បានបង្ហោះក្នុង Page Facebook ផ្លូវការរបស់ខ្លួនថា ស្វាគមន៍សមាជិកថ្មី គឺតារាចម្រៀង ខេមរៈ សិរីមន្ត នៅល្ងាចថ្ងៃទី១៨ ខែសីហានេះ ធ្វើឲ្យទស្សនិកជនមានការភ្ញាក់ផ្អើលយ៉ាងខ្លាំង។
តារាចម្រៀងបែបយុវវ័យ ខេមរៈ សិរីមន្ត មិនត្រឹមតែរើបង្វេចចេញពីផលិតកម្ម សាន់ដេ តែម្នាក់នោះឯងទេ ពោលគឺលោក ខេមរៈ ភារុណ ជាបងប្រុស ក៏ចេញទៅជាមួយលោកដែរ។
Page Facebook ផ្លូវការរបស់ផលិតកម្ម រស្មីហង្សមាស បានបង្ហោះថា «សូមស្វាគមន៍សមាជិកថ្មីមកកាន់គ្រួសារ ហង្សមាស គឺលោក ខេមរៈ សិរីមន្ត»។ ក្នុងនោះផលិតកម្ម រស្មីហង្សមាស ក៏បានបង្ហាញបទចម្រៀងមួយបទមានចំណងជើងថា «ស្ទឹងត្រែងបងអើយ» ដែលជាការបកស្រាយដោយ ខេមរៈ សិរីមន្ត និងនិពន្ធទំនុកច្រៀង ដោយលោក ខេមរៈ ភារុណ ជាបងប្រុស។
យ៉ាងណាមិញ គេនៅមិនទាន់ដឹងថា សម្រាប់វត្តមានរបស់តារាចម្រៀង ខេមរៈ សិរីមន្ត មានបទចម្រៀងអ្វីថ្មី ស្ទីលប្លែកៗ និងបែបបទនៃការប្រកួតប្រជែង បែបណាទេ ខណៈដែលនៅក្នុងទ្រនំហង្សមាស គឺសុទ្ធសឹងតែជាតារាចម្រៀងល្បីៗ និងមានឈ្មោះរាប់ឆ្នាំ នៅក្នុងផលិតកម្មមួយនេះ។
ស្ដាប់ទាំងអស់គ្នាមើល៍ តើបទ «ស្ទឹងត្រែងបងអើយ» របស់ ខេមរៈ សិរីមន្ត ពីរោះយ៉ាងណាពេលដល់ហង្សមាសដំបូង?
