(ភ្នំពេញ)៖ តារាចម្រៀងបែបស្រគត់ស្រគំ កញ្ញា ណាណៃ បានបង្ហើសំនៀង យ៉ាងក្រអូនក្រអៅ ក្នុងកម្មវិធី «សំនៀងគ្រួសារខ្មែរ» មានចំណងជើងថា «ពេលមេឃស្រទំ» ធ្វើឲ្យអ្នកគាំទ្រ ជាពិសេសថ្នាក់ដឹកនាំ កម្មវិធីទាំងមូលពេញចិត្តព្រោះតែសំឡេងរបស់នាង ហាក់ត្រូវគ្នាជាមួយនឹងបទចម្រៀង បែបមនោសញ្ចេតនាស្លុងអារម្មណ៍បែបនេះ។
ស្រីស្រស់ ណាណៃ បានថ្លែងបញ្ជាក់ថា នាងពិតជារំភើបខ្លាំង ដែលបានចូលរួមច្រៀងក្នុងកម្មវិធី «សំនៀងគ្រួសារខ្មែរ» ព្រោះតែកម្មវិធីនេះ មានអ្នកទស្សនាច្រើន ជាពិសេសពេលទំនេរ ពីការងារដឹកនាំប្រទេសជាតិ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា និងសម្ដេចកិត្តិព្រឹទ្ធបណ្ឌិត ក៏លោកទាំងទ្វេទស្សនាកម្មវិធីនេះ ផងដែរ។
ណាណៃ បន្តថា «នាងខ្ញុំណាណៃ សូមថ្លែងអំណរអរគុណ ដល់កម្មវិធីចម្រៀងគ្រួសារខ្មែរ ដែលបានផ្ដល់កិត្តិយសដល់រូបនាងខ្ញុំ ចូលច្រៀងក្នុងកម្មវិធីនេះ»។
សូមបញ្ជាក់ថា កញ្ញា ណាណៃ គឺជាតារាចម្រៀងមួយដួង ដែលតែងតែបង្ហាញវត្តមាន ច្រៀងក្នុងកម្មវិធីតូចធំនានា ជាពិសេសគឺកម្មវិធីប្រគំតន្រ្តី តាមបណ្ដាស្ថានីយទូរទស្សន៍មួយចំនួន ដែលធ្វើឲ្យប្រជាប្រិយភាព របស់នាងហក់ឡើងខ្ពស់ គួរឲ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ ជាមួយគ្នានេះ នាងក៏បានថតបទចម្រៀងជា MV បានជាច្រើនបទផងដែរ ក្នុងផលិតកម្ម Zone និងផលិតកម្មមួយចំនួនទៀត៕