(ភ្នំពេញ)៖ ទស្សនិកជនបានដឹងហើយថា លោក ទ្រី តារាវុធ កំពុងបំពេញបេសកម្មប្រកួតសម្រស់នៅក្នុងកម្មវិធី «Man Of The Year» ក្នុងប្រទេសមីយ៉ាន់ម៉ា។ បច្ចុប្បន្ននេះ កម្មវិធីមិនទាន់ដល់វគ្គផ្តាច់ព្រ័ត្រនៅឡើយទេ តែលោកទទួលបានពាន់រង្វាន់មួយបាត់ទៅហើយ គឺផ្នែក «Best Smile Award» ប្រែកជាខ្មែរថា «ញញឹមស្រស់បំផុត» ពីកម្មវិធី។ តែយ៉ាងណា លោកថា នឹងខំប្រឹងប្រែងបន្តទៀត ដើម្បីទទួលបានភាពជោគជ័យក្នុងកម្មវិធីនេះ។
តាមរយៈបណ្តាញសង្គម ថ្លែងពីប្រទេសមីយ៉ាន់ម៉ា លោក ទ្រី តារាវុធ បានលើកឡើងថា លោកពិតជាមោទនភាព និងសប្បាយរីករាយយ៉ាងខ្លាំង ដែលទទួលបានការគាំទ្រផ្តល់កម្លាំងចិត្តជាច្រើនពីប្រជាពលរដ្ឋកម្ពុជា និងអរគុណសម្រាប់ការផ្តល់ពិន្ទុយ៉ាងល្អពីគណៈកម្មការអន្តរជាតិ។ ទន្ទឹមគ្នានេះ លោកនៅតែបន្តខិតខំប្រឹងប្រែងបន្ថែមទៀត ឲ្យអស់ពីលទ្ធភាពសម្រាប់ការចូលរួមប្រកួតនៅវគ្គផ្តាច់ព្រ័ត។
ងាកមកអ្នកគាំទ្រកម្ពុជាវិញ ក្រោយទទួលដំណឹងថា លោក ទ្រី តារាវុធ ដែលតំណាងឱ្យកម្ពុជាទទួលបានពានមួយនេះហើយ ក៏មានអារម្មណ៍រំភើប និង សប្បាយរីករាយយ៉ាងខ្លាំង ហើយជាមួយគ្នានេះពីអ្នកគាំទ្រក៏មានការរំពឹងខ្ពស់ចំពោះលោក ទ្រី តារាវុធ ថានឹងមានឱកាសខ្ពស់ក្នុងការដណ្តើមយកជ័យជម្នះពីកម្មវិធីជូនប្រទេសកម្ពុជាផងដែរ។ ដូច្នេះតាមរយៈនេះ លោក ទ្រី តារាវុធ សុំឲ្យបងប្អូនខ្មែរជួយបោះឆ្នោតគាំទ្រ តាមរយៈធ្វើការ Like និង Share រូបភាពរបស់លោកឲ្យបានច្រើន ដើម្បីឈ្នះពានប្រជាប្រិយភាព និងទទួលបានជោគជ័យក្នុងកម្មវិធីនេះ។ ដោយចូលទៅកាន់ផេក «Missosology» ចុច Share ទៅលើរូបរបស់លោក ទ្រី តារាវុធ ភ្ជាប់ជាភាសាអង់គ្លេសថា «Cambodia - Try Daravuth»៕