(ប៉េកាំង)៖ ក្រសួងការបរទេសកាណាដាបានចេញសេចក្ដីព្រមានមួយ ឱ្យពលរដ្ឋរបស់ខ្លួនទាំងនៅទីនោះស្រាប់ និងចង់ធ្វើដំណើរទៅកាន់ប្រទេសចិន ត្រូវមានការប្រុងប្រយ័ត្នខ្ពស់ ខណៈទំនាក់ទំនងការទូតរវាងប្រទេសទាំង ២ កំពុងជួបភាពតានតឹងខ្លាំង ក្រោយតុលាការចិនសម្រេចផ្ដន្ទាទោស ប្រហារជីវិតជនជាតិកាណាដាម្នាក់។ នេះបើតាមការចេញផ្សាយដោយសារព័ត៌មាន CNN នៅព្រឹកថ្ងៃពុធ ទី១៦ ខែមករា ឆ្នាំ២០១៩។
កាលពីថ្ងៃចន្ទកន្លងទៅ តុលាការចិនក្នុងទីក្រុង ដាលៀន (Dalian) បានសម្រេចចិត្តជាថ្មីម្ដងទៀត ដោយផ្ដន្ទាទោសប្រហារជីវិតបុរសជនជាតិកាណាដា ម្នាក់ឈ្មោះ រ៉ូប៊ឺត ឡយដ៍ ស្គែលឡិនប៊ឺក (Robert Lloyd Schellenberg)។ លោក Schellenberg កាលពីដំបូងឡើយត្រូវបានកាត់ទោសឱ្យជាប់ពន្ធនាគារ ១៥ឆ្នាំប៉ុណ្ណោះ ពីបទរត់ពន្ធគ្រឿងញៀនប្រភេទ មេតំហ្វេតាមីន (methamphetamine) ច្រើនជាង ២២២គីឡូក្រាម ពីកំពង់ផែភាគឦសានប្រទេសចិន បម្រុងឆ្ពោះទៅកាន់ប្រទេសអូស្រ្តាលីកាលពីឆ្នាំ២០១៤។ ប៉ុន្តែការប្ដូរចិត្តនេះត្រូវបានមជ្ឈដ្ឋានខ្លះមើលឃើញថា ជាការសងសឹករបស់ទីក្រុងប៉េកាំង ចំពោះកាណាដា ដែលបានធ្វើទុកបុកម្នេញដល់វិស័យពាណិជ្ជកម្ម-ទូរគមនាគមន៍ចិន។
តែទោះជាយ៉ាងនេះក្ដី តុលាការចិនបានអះអាងដោយមិនបានបញ្ជាក់អ្វីលម្អិតថា ការសម្រេចចិត្តរបស់ខ្លួនគឺធ្វើឡើង ដោយផ្អែកទៅលើភស្តុតាងថ្មីមួយដែលបញ្ជាក់ថា ជនជាតិកាណាដារូបនេះសាកសមនឹងទទួលទោសប្រហារជីវិត។ មិនតែប៉ុណ្ណោះជាការឆ្លើយតប ក្រសួងការបរទេសចិនក៏បានចេញសេចក្ដីព្រមានដូចគ្នា ទៅនឹងក្រសួងការបរទេសកាណាដាដែរ ជាមួយការកត់សម្គាល់ថា ការចេញសេចក្ដីព្រមានពីការធ្វើដំណើរ គឺជារឿងគ្មានប្រយោជន៍ ពីព្រោះបើជនជាតិកាណាដានៅក្នុងប្រទេសចិនគោរពច្បាប់ នោះពួកគេនឹងមានសុវត្ថិភាព។
អ្នកនាំពាក្យក្រសួងការបរទេសចិន លោកស្រី ហួ ឈុនយីង (Hua Chunying) បានលើកឡើងយ៉ាងដូច្នេះថា «ខ្ញុំគិតថា ការចេញសេចក្ដីព្រមានពីការធ្វើដំណើររបស់កាណាដា ប្រៀបបានទៅនឹង «ចោរស្រែកចាប់ចោរ» ពីព្រោះបច្ចុប្បន្នគឺកាណាដា មិនមែនចិននោះទេ ដែលឃុំខ្លួនពលរដ្ឋបរទេសដោយអយុត្តិធម៌ សំអាងលើហេតុផលដែលខ្លួនហៅថា ស្របច្បាប់»។
គួរជម្រាបថា ជម្លោះការទូតរវាងចិន និងកាណាដាបានផ្ទុះឡើង ក្រោយអាជ្ញាធរកាណាដាក្នុងទីក្រុង វែនខូវើ (Vancouver) បានចាប់ខ្លួននាយកប្រតិបត្តិក្រុមហ៊ុន Huawei លោកស្រី ម៉េង វ៉ានចូវ (Meng Wanzhou) កាលពីថ្ងៃទី០១ ខែធ្នូ ឆ្នាំ២០១៨ តាមសំណើរបស់សហរដ្ឋអាមេរិក ដែលបានចោទលោកស្រីថា បានរំលោភបំពានលើទណ្ឌកម្មប្រឆាំងនឹងអ៊ីរ៉ង់។ បន្ទាប់ពីការចាប់នោះមក ចិនបានធ្វើការចាប់ខ្លួន និងឃុំខ្លួនពលរដ្ឋកាណាដាជាច្រើននាក់ ក្នុងនោះរួមមានទាំង អតីតមន្ត្រីទូតកាណាដា លោក ម៉ៃឃើល កូវរីក (Michael Kovrig) និងអ្នកជំនួញម្នាក់ទៀតគឺលោក ម៉ៃឃើល ស្ប៉ាវ័រ (Michael Spavor) ដោយសង្ស័យថា ពួកគេបានធ្វើសកម្មភាពអាចបំផ្លាញដល់សន្តិសុខជាតិរបស់ចិន៕
