(តូក្យូ)៖ ការពិនិត្យធ្វើតេស្តរកមើលវីរុសកូរ៉ូណាប្រភេទថ្មី (2019-nCoV) លើកប៉ាល់ទេសចរណ៍ធំមួយនោះ នៅប្រទេសជប៉ុន បានបន្តរក​ឃើញអ្នកឆ្លងវីរុសនេះចំនួន៦០នាក់បន្ថែមទៀត ដែលធ្វើឲ្យចំនួនអ្នកឆ្លងសរុបនៅលើប៉ាល់កើនដល់១៣០នាក់ហើយ។ នេះបើតាមការ​ដកស្រង់ការផ្សាយចេញពីសារព័ត៌មាន CNA នៅថ្ងៃចន្ទ ទី១០ ខែកុម្ភៈ ឆ្នាំ២០២០។

កប៉ាល់ទេសចរណ៍ Diamond Princess ត្រូវបានដាក់ឲ្យស្ថិតនៅក្រោមការពិនិត្យតាមដានរយៈពេលពីរសប្តាហ៍ នៅពេលមកដល់ទីក្រុង Yokohama ប្រទេសជប៉ុន កាលពីថ្ងៃទី០៣ ខែកុម្ភៈ ឆ្នាំ២០២០ ក្រោយអតីតអ្នកដំណើរម្នាក់របស់កប៉ាល់ ដែលបានចុះនៅទីក្រុងហុងកុង កាលពីខែមុន ត្រូវបានធ្វើតេស្តរកឃើញថា មានផ្ទុកវីរុសកូរ៉ូណាថ្មី។ កប៉ាល់នោះមានផ្ទុកអ្នកដំណើរនិងបុគ្គលិករបស់កប៉ាល់ផ្ទាល់សរុបជាង​៣,៧០០នាក់​ ប៉ុន្តែវាមិនទាន់ច្បាស់នោះទេថា អាជ្ញាធរជប៉ុននឹងធ្វើតេស្តលើពួកគេទាំងអស់តែម្តងឬយ៉ាងណា។

គួរជម្រាបថា កាលពីថ្ងៃអាទិត្យម្សិលមិញ មនុស្សជាង៣,៦០០នាក់នៅលើកប៉ាល់ទេសចរណ៍ខ្នាតធំមួយគ្រឿងទៀត នៅឯទីក្រុងហុងកុង ដែលរួមមានអ្នកដំណើរនិងបុគ្គលិករបស់កប៉ាល់ ទីបំផុតត្រូវបានអនុញ្ញាតឲ្យចុះពីលើកប៉ាល់ បន្ទាប់ពីត្រូវបានហាមមិនឲ្យចុះចាប់តាំងតែពី​ថ្ងៃទី០៥ ខែកុម្ភៈ ឆ្នាំ២០២០ គឺពីរថ្ងៃក្រោយករណីកប៉ាល់ទេសចរណ៍ Diamond Princess នៅជប៉ុន ដើម្បីធ្វើតេស្តរកវីរុសកូរ៉ូណាប្រភេទថ្មី ព្រោះកប៉ាល់នោះក៏ធ្លាប់ដឹកអ្នកដំណើរ ដែលក្រោយមកត្រូវបានរកឃើញថាឆ្លងវីរុសដែរ។ អាជ្ញាធរសុខាភិបាលក្រុងហុងកុងបានប្រកាស​ថា​ ពុំមានអ្នកឆ្លងវីរុសកូរ៉ូណា 2019-nCoV នៅលើកប៉ាល់ទេសចរណ៍នោះឡើយ ដែលមានឈ្មោះថា World Dream៕