(វ៉ាស៊ីនតោន)៖ ប្រភពពីមន្រ្តីម្នាក់បានឲ្យដឹងថា សហរដ្ឋអាមេរិកកំពុងតាមដានលើព័ត៌មានសម្ងាត់ដែលថា ប្រមុខដឹកនាំកំពូលកូរ៉េខាងជើង លោក គីម ជុងអ៊ុន កំពុងប្រឈមគ្រោះថ្នាក់ធ្ងន់ធ្ងរ បន្ទាប់ពីការវះកាត់មួយ។ នេះបើតាមការដកស្រង់ការផ្សាយ ចេញពីសារព័ត៌មាន CNN នៅព្រឹកថ្ងៃអង្គារ ទី២១ ខែមេសា ឆ្នាំ២០២០។

មន្រ្តីអាមេរិកម្នាក់ទៀតបានប្រាប់ CNN ថា លោក គីម ជុងអ៊ុន ទំនងជាកំពុងមានបញ្ហាសុខភាពពិតមែន ប៉ុន្តែថាតើធ្ងន់ធ្ងរកម្រិតណានោះ គឺវាពិបាកក្នុងការវាយតម្លៃឲ្យត្រឹមត្រូវ។ យោងតាមសារព័ត៌មាន Daily NK មានមូលដ្ឋាននៅកូរ៉េខាងត្បូង ដែលមានឯកទេសខាងបញ្ហានៅ កូរ៉េខាងជើង លោក គីម បានទទួលការវះកាត់ទាក់ទងនឹងប្រព័ន្ធបេះដូង ក៏ដូចជាសសៃឈាម កាលពីថ្ងៃទី១២ ខែមេសា ដោយសារតែការជក់បារីច្រើនពេក, ការធាត់លើសទម្ងន់ និងការធ្វើការងារហួសកម្លាំង ហើយលោកកំពុងសម្រាកព្យាបាល នៅភូមិគ្រឹះមួយកន្លែង ក្នុងស្រុក យ៉ាងសាន (Hyangsan) បន្ទាប់ពីសុខភាពលោក ប្រឈមហានិភ័យខ្ពស់ ក្រោយការវះកាត់នោះ។

គួរជម្រាបថា ព័ត៌មានខាងលើបានលេចឡើងបន្ទាប់ពី លោក គីម ជុងអ៊ុន ត្រូវគេកត់សម្គាល់ឃើញថា បានខកខានបង្ហាញខ្លួនក្នុងឱកាសអបអរខួបកំណើត នៃបិតាស្ថាបនិកប្រទេសកូរ៉េខាងជើង លោក គីម អ៉ីលស៊ុង ដែលជាជីតារបស់លោក កាលពីថ្ងៃទី១៥ ខែមេសា ខណៈចាប់តាំងពីឡើងកាន់ អំណាចកាលពីឆ្នាំ២០១១មក គឺលោក គីម មិនដែលអវត្តមានម្តងណាឡើយ។ ហេតុនេះហើយ ក៏បង្កឲ្យមានការសង្ស័យផ្សេងៗកើតមានឡើង៕