(ញូយ៉ក)៖ ក្រុមគ្រូពេទ្យអាមេរិកបានធ្វើការវះកាត់ប្ដូរក្រលៀនជ្រូក ឱ្យអ្នកជំងឺម្នាក់បានដោយជោគជ័យជាលើកដំបូងបំផុត ដោយមិនប្រតិកម្មបដិសេធពី ប្រព័ន្ធភាពសុំារបស់អ្នកជំងឺរូបនេះឡើយ ហើយដែលនេះជាការបោះជំហានទៅមុខក្នុងការកាត់បន្ថយការខ្វះខាតក្នុងការវះកាត់ប្ដូរអវៈយវៈមនុស្ស នៅពេលអនាគត។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃពុធ ទី២០ ខែតុលា ឆ្នាំ២០២១។
ការវះកាត់ប្ដូរក្រលៀនជ្រូកដាក់ឱ្យមនុស្សខាងលើត្រូវបានធ្វើឡើងនៅឯមជ្ឈមណ្ឌលវិជ្ជសាស្ត្រ NYU Langone Health ក្នុងទីក្រុងញូយ៉ក សហរដ្ឋអាមេរិក កាលពីពេលថ្មីៗនេះ។ ទីភ្នាក់ងារព័ត៌មាន Reuters បានឱ្យដឹងថាអ្នកជំងឺជាស្ត្រីម្នាក់ដែលទទួលការវះកាត់ប្ដូរក្រលៀនជ្រូក មានបញ្ហាក្រលៀនមិនដំណើរការ ហើយគ្រួសារអ្នកជំងឺរូបនេះក៏បានយល់ព្រមលើការវះកាត់នេះដែរ។ ដោយឡែក បើតាមក្រុមគ្រូពេទ្យ រយៈពេល៣ថ្ងៃក្រោយការវះកាត់ ក្រលៀនជ្រូក បានដំណើរការជាធម្មតាជាមួយសសៃឈាម ហើយក៏មិនមានប្រតិកម្មបដិសេធពីសារពាង្គកាយ ឬក៏ប្រព័ន្ធភាពសុំារបស់អ្នកជំងឺនោះដែរ ខណៈក្រុមគ្រូពេទ្យ នៅតែបន្តតាមដាននៅឡើយ។
គួរបញ្ជាក់ថា នៅក្នុងសហរដ្ឋអាមេរិក, មានមនុស្សជិត ១០៧,០០០នាក់ កំពុងរង់ចាំវះកាត់ការប្ដូរអវៈយវៈ ក្នុងនោះមានច្រើនជាង ៩០,០០០នាក់រង់ចាំ ការវះកាត់ប្ដូរក្រលៀន៕
