(បាកដាដ)៖ ប្រព័ន្ធផ្សព្វផ្សាយក្នុងស្រុកអ៊ីរ៉ាក់បានឲ្យដឹងថាមេដឹកនាំកំពូលរបស់ក្រុម ISIS លោក Abu Bakr al-Baghdadi កំពុងតែធ្វើការជ្រើសរើសអ្នកស្នងតំណែងពីសមាជិកក្រុមរបស់ខ្លួន ឲ្យកាន់តួនាទីជំនួស​លោកនៅពេលណាមួយដែលមេដឹកនាំក្រុមភេរវកររូបនេះ ត្រូវស្លាប់បាត់បង់ជីវិតទៅ។ នេះបើតាមការ​ចេញផ្សាយដោយសារព័ត៌មានរុស្ស៊ី Sputnik នាព្រឹកថ្ងៃសុក្រ ទី១១ ខែវិច្ឆិកា ឆ្នាំ២០១៦។


ប្រភពមិនបញ្ចេញអត្តសញ្ញណមួយមកពីខេត្ត Ninveveh បានលួចបង្ហើបប្រាប់ស្ថានីយ៍ទូរទស្សន៍ Alsumaria នៃប្រទេសអ៊ីរ៉ាក់ថា «មជ្ឈមណ្ឌលព័ត៌មាននៃក្រុមរដ្ឋអ៊ីស្លាម ISIS បានធ្វើសេចក្តី​ប្រកាស​នូវ​បញ្ជារបស់លោក Abu Bakr al-Baghdadi ក្នុងការជ្រើសរើសមេក្រុម ISIS ណាម្នាក់មកឲ្យធ្វើអ្នកបន្ត​តំណែងរបស់លោកនៅក្នុងករណីដែលលោក al-Baghdadi ត្រូវស្លាប់បាត់បង់ជីវិត» ប៉ុន្តែប្រភពដដែល​បានក៏គូសបញ្ជាក់ដែរថា ក្រុមសកម្មប្រយុទ្ធដ៏សាហាវឃោរឃៅមួយនេះ មិនបានបញ្ចេញឈ្មោះរបស់​អនាគតអ្នកស្នងតំណែងជាមេ​ដឹកនាំកំពូលរបស់ខ្លួនឡើយ ដោយសារតែវានឹង​នាំឲ្យមានបញ្ហានៅក្នុង​​បណ្តាសមាជិករបស់ពួកគេ។


គួរបញ្ជាក់ដែរកាលពីថ្ងៃចន្ទដើមសប្តាហ៍នេះ ទីភ្នាក់ងារព័ត៌មានប្រចាំកងកម្លាំងចម្រុះអ៊ីរ៉ាក់បានអះអាងថា លោក al-Baghdadi បានរត់ភៀសខ្លួនចេញពីទីក្រុង Mosul បាត់ទៅហើយអំឡុងពេលនៃ​ប្រតិបត្តិការ​យោធា​ទ្រង់ទ្រាយធំរបស់កងទ័ពរដ្ឋាភិបាល ក្នុងការវាយរំដោះយកមកវិញនូវទីក្រុងដ៏ធំមួយនេះ ដែលបានបន្តស្ថិតក្រោមការកាន់កាប់របស់ក្រុមសកម្មប្រយុទ្ធ ISIS តាំងពីឆ្នាំ២០១៤ មក៕