(ប៉េកាំង)៖ ប្រធានាធិបតីចិន លោក ស៊ី ជិនពីង បានចាកចេញពីទីក្រុងប៉េកាំង នៅថ្ងៃពុធនេះ ដើម្បីបំពេញ ដំណើរទស្សនកិច្ចរយៈពេលមួយសប្ដាហ៍ទៅកាន់តំបន់អាមេរិកឡាទីន និងចូលកិច្ចប្រជុំថ្នាក់តំបន់ដ៏សំខាន់មួយផងដែរគឺ APEC ដែលមេដឹកនាំចិននឹងជួបពិភាក្សាជាមួយមេដឹកនាំប្រទេសជាច្រើនដូចជា រុស្ស៊ី, អាមេរិក, បណ្តាប្រទេសអាស៊ី, និងអាមេរិកឡាទីន។ នេះបើតាមការចេញផ្សាយនៅមុននេះបន្តិចដោយទីភ្នាក់ងារសារព័ត៌មានចិនស៊ិនហួរ នាព្រឹកថ្ងៃពុធ ទី១៦ ខែវិច្ឆិកា ឆ្នាំ២០១៦។
សារព័ត៌មានបានបន្តទៀតថាលោក ស៊ី ជិនពីង នឹងត្រូវបំពេញដំណើរទស្សនកិច្ចនៅប្រទេសអាមេរិកឡាទីនចំនួនបីគឺ ប៉េរូ អេក្វាទ័រ និងស៊ីលី ចាប់ពីថ្ងៃទី១៧ ដល់ថ្ងៃទី២៣ ខែវិច្ឆិកា មុននឹងលោកបន្តដំណើរទៅចូលរួមក្នុងកិច្ចប្រជុំកំពូលលើកទី២៤ នៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ហៅកាត់ថា APEC ដែលរៀបចំឡើងនៅក្នុងរដ្ឋធានីលីម៉ា នៃប្រទេសប៉េរូ ពីថ្ងៃទី១៩ ដល់ថ្ងៃទី២០ ខែវិច្ឆិកា។
គួរបញ្ជាក់ថាកិច្ចប្រជុំ APEC នាពេលខាងមុខនេះក៏នឹងមានប្រធានាធិបតីវៀតណាម និងប្រធានាធិបតី ហ្វីលីពីនចូលរួមផងដែរ ខណៈប្រទេសកូរ៉េខាងត្បូងបានឲ្យដំណឹងថាលោក ផាក គឺនហេ នឹងមិនបានទៅចូលរួមនោះឡើយ ដោយយោងលើហេតុផលនៃសន្តិសុខជាមួយកូរ៉េខាងជើង។ ដោយឡែកលោក បារ៉ាក់ អូបាម៉ា ប្រធានាធិបតីសហរដ្ឋអាមេរិកនឹងទៅចូលរួមជាធម្មតា ដែលនឹងជាលើកចុងក្រោយរបស់លោកក្នុងកិច្ចប្រជុំ APEC ហើយលោកក៏គ្រោងនឹងជួបលោក ស៊ីនហ្សូ អាបេ នាយករដ្ឋមន្ត្រីជប៉ុនដែលកំពុងតែព្រួយបារម្ភខ្លាំងចំពោះអនាគតប្រធានាធិបតីថ្មីរបស់អាមេរិកគឺលោក ដូណាល់ ត្រាំ ផងដែរ៕
