(អាមេរិក)៖ មួយសប្តាហ៍បន្ទាប់ពីលោក ដូណាល់ ត្រាំ បានជាប់ឆ្នោតក្លាយជាប្រធានាធិបតីអនាគតរបស់សហរដ្ឋអាមេរិកនោះ អង្គការ NASA ហាក់ពុំទាន់ទទួលបានព័ត៌មានដ៏គួរឲ្យកក់ក្តៅណាមួយចំពោះកញ្ចប់ថវិកាជាតិដែលខ្លួននឹងត្រូវទទួលបាន ឬក៏ការបញ្ជាក់គោលនយោបាយថ្មីឲ្យបានច្បាស់លាស់សម្រាប់អនាគតទីភ្នាក់ងារអវកាសដ៏ធំបំផុតលើលោកមួយនេះឡើយ។ នេះបើតាមការផ្សាយពីសារព័ត៌មាន Space News ដែលត្រូវបានដកស្រង់នៅព្រឹកថ្ងៃពុធ ទី១៦ ខែវិច្ឆិកា ឆ្នាំ២០១៦។
ថ្លែងនៅក្នុងកិច្ចប្រជុំនៃគណកម្មាធិការប្រឹក្សាយោបល់របស់ NASA លោក Greg Williams អនុប្រធានរដ្ឋបាលផែនការ និងនយោបាយសម្រាប់ប្រតិបត្តិការនៃការរុករកដោយបេសកកម្មមនុស្ស បានបញ្ជាក់នាដើមសប្តាហ៍ថ្មីយ៉ាងដូច្នេះថា «មន្ត្រីក្នុងយុទ្ធនាការរបស់លោក ដូណាល់ ត្រាំ ដែលធ្លាប់អះអាងថានឹងផ្តល់ព័ត៌មានពីនយោបាយរបស់លោកចំពោះអង្គការ NASA នៅមិនទាន់ទាក់ទងមកបំភ្លឺព័ត៌មានជុំវិញអ្វីដែលពួកគេធ្លាប់បានសន្យាពីមុនមកនោះឡើយ»។
មន្ត្រីទីភ្នាក់ងារអវកាសអាមេរិកខាងលើនេះបានបញ្ជាក់ទៀតថា អនាគតរដ្ឋបាលថ្មីរបស់អាមេរិកខាងលើនេះមិនទាន់មានការទាក់ទងដោយផ្ទាល់ណាមួយមកកាន់អង្គការ NASA នោះទេ ប៉ុន្តែអង្គការនេះនឹងត្រៀមខ្លួនជានិច្ចដើម្បីពិភាក្សាពីផែនការដែលនឹងត្រូវធ្វើនៅក្នុងរដ្ឋបាលថ្មីរបស់លោក ត្រាំ និងថវិកាជាតិដែលខ្លួននឹងទទួលបានសម្រាប់ឆ្នាំ២០១៧ នៅពេលជួបជាមួយមន្ត្រីតំណាងលោក ត្រាំ។
គួរបញ្ជាក់ថាកាលពីអំឡុងយុទ្ធនាការឃោសនាបោះឆ្នោត លោក ត្រាំ ក៏ធ្លាប់បានលើកឡើងផងដែរពីគោលនយោបាយចំពោះការស្រាវជ្រាវផ្នែកទីអវកាស ដោយក្នុងនោះរដ្ឋបាលថ្មីអាចនឹងផ្តោតសំខាន់បំផុតទៅលើការបញ្ជូនមនុស្សទៅស្រាវជ្រាវទីអវកាសឆ្ងាយៗពីផែនដី, ការអភិវឌ្ឍបច្ចេកវិទ្យា និងពាណិជ្ជកម្ម, និងកាត់បន្ថយការស្រាវជ្រាវនានាតែនៅលើភពផែនដី។ ប្រការនេះធ្វើឲ្យគ្រប់គ្នាមានក្តីរំពឹងខ្ពស់ថាផែនការទៅកាន់ភពអង្គារ នឹងកាន់លឿនជាងមុន ព្រមទាំងបេសកកម្មមួយចំនួនទៀតដែលស្ថិតនៅទីឆ្ងាយពីភពផែនដីយើងផងដែរ៕
