(បាងកក)៖ គណៈកម្មការផ្សព្វផ្សាយ និងទូរគមនាគមន៍ថៃ (NBTC)​ បានតម្រូវឲ្យក្រុមហ៊ុន Facebook, Youtube និង Netflix ធ្វើការអនុវត្តន៍ទៅតាមអ្វី ដែលច្បាប់របស់ប្រទេសអាស៊ានមួយនេះបានកំណត់ កាលពីដើមសប្តាហ៍នេះ ដោយមានរយៈពេលកំណត់មួយខែរហូតដល់ថ្ងៃទី២២ ខែកក្កដា​ខាងមុខនេះ បើមិនដូច្នោះទេ​ក្រុមហ៊ុនទាំងនេះ នឹងប្រឈមមុខការបិទ លែងឲ្យផ្សព្វផ្សាយ​ពាណិជ្ជកម្ម​តែម្តង។ នេះបើតាម​ការដកស្រង់សម្តី​របស់ លោក Natee Sukolrat អនុប្រធានគណៈកម្មការ NBTC ដោយ​សារព័ត៌មានថៃ Bangkok Post នាល្ងាចថ្ងៃសុក្រ ទី២៣ ខែមិថុនា ឆ្នាំ២០១៧។

សារព័ត៌មានខាងលើនេះ​បានឲ្យដឹងទៀតថា តាមរយៈការបើកការិយាល័យនៅក្នុងប្រទេស និងការចុះឈ្មោះ​ក្រុមហ៊ុនទាំងនេះដោយស្របច្បាប់ អាជ្ញាធរថៃចង់ឲ្យក្រុមហ៊ុនបរទេសទាំងនេះ ធ្វើការអនុឡោមទៅតាមច្បាប់​ផ្តល់សេវាកម្ម OTT ដែលវាជាប់ពាក់ព័ន្ធទៅនឹងការបង់ពន្ធលើប្រាក់ចំណូលសាជីវកម្ម និងកែលម្អរាល់បញ្ហា​នានាដែលត្រូវបានលើកឡើង។

អនុប្រធាន NBTC បានសង្កត់ធ្ងន់ទៀតថា និយតករកំពុងតែធ្វើការពិចារណា​ក្នុងការទប់ស្កាត់​ការផ្សាយ​ពាណិជ្ជកម្ម​របស់ក្រុមហ៊ុនទាំងឡាយ​ខាងលើនេះ ប្រសិនបើពួកគេបរាជ័យ​ក្នុងការចាត់វិធានការត្រឹមថ្ងៃ​ទី២២ ខែកក្កដា។ ប៉ុន្តែក៏មានសារព័ត៌មាន​មួយចំនួន​បានចុះផ្សាយថា លោក Natee Sukolrat មានបំណងចង់បិទ​បណ្តាញសង្គម និងសេវាកម្មកម្សាន្ត​ទាំងនេះ ដោយសារតែ​វា​កំពុងបង្កផលប៉ះពាល់​ដល់ផលប្រយោជន៍អ្នកប្រើប្រាស់៕