(ពិភពលោក)៖ នៅថ្ងៃចន្ទ ទី១៧ ខែកក្កដា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗជាច្រើនបានកើតឡើង រួម​មាន​ទាំង​ព្រឹត្តិការ​ណ៍​នយោបាយ និងស្ថានការណ៍ទូទាំងសកលលោក ដ៏គួរឲ្យចាប់អារម្មណ៍ជាច្រើន។

ដូច្នេះបើចង់ដឹងថាតើ​ព្រឹត្តិ​ការណ៍​រូបភាពប្រ​ចាំ​ថ្ងៃ​នេះមានអ្វីខ្លះនោះសូមទស្សនាដូចខាងក្រោម៖

១៖ រដ្ឋាភិបាល​កូរ៉េខាងត្បូង បានស្នើសុំទៅកាន់​កូរ៉េខាងជើង ពាក់ព័ន្ធនឹង​ការរៀបចំកិច្ច​ប្រជុំយោធា​អន្តរកូរ៉េ សំដៅបញ្ឈប់​សកម្មភាព​អរិភាព​ដាក់គ្នាទៅ​វិញទៅមកនៅតាម​បណ្ដោយព្រំដែន ​ប៉ុន្តែកូរ៉េខាងជើង ធ្លាប់បានអះអាងជាច្រើនដងហើយថា កិច្ចសន្ទនាចង់ឱ្យខ្លួនបោះបង់ចោលកម្មវិធីអាវុធនុយក្លេអ៊ែរ គ្មានផ្លូវកើតឡើងជាដាច់ខាត៕

២៖ រុស្ស៊ីគ្មាន​ជម្រើសអី្វផ្សេង​នោះឡើយ ក្រៅតែពីការចាត់វិធានការ​សងសឹកនឹង​សហរដ្ឋអាមេរិក ចំពោះការបដិសេធ​របស់ទីក្រុង​វ៉ាស៊ីន​តោន ជុំវិញការប្រគល់​អលចលទ្រព្យ​ការទូតចំនួនពីរ​កន្លែងរបស់រដ្ឋាភិបាល​ទីក្រុងម៉ូស្គូ ដែលស្ថិតក្នុង​ទីក្រុងញូយ៉ក និងរដ្ឋម៉ារីលែន៕

៣៖ រដ្ឋាភិបាលឥណ្ឌូណេស៊ី បានប្រកែកមិនព្រមទទួលយក​ជនជាតិរបស់ខ្លួនចំនួន០៤នាក់ ដែលគ្រោងបញ្ជូនត្រឡប់ពីស៊ីរី មកកាន់ឥណ្ឌូណេស៊ីវិញឡើយ បន្ទាប់ពីពួកគេបានចូលរួម ជាមួយពួក ISIS។ ទីក្រុង​ហ្សាការតា ថែមទាំងបានបញ្ជាក់ទៀតថា ឲ្យទុកពួកគេនៅប្រទេសស៊ីរីបន្តទៀតចុះ ហើយប្រយុទ្ធ​ដើម្បី ISIS រហូតដល់ស្លាប់នៅទីនោះទៅ៕

៤៖ ក្រុមហ៊ុនអាកាសចរណ៍​ Emirates Airline នៃប្រទេស​អេមីរ៉ាត់អារ៉ាប់រួម និងក្រុមហ៊ុនអកាសចរណ៍​ក្នុងស្រុកមួយទៀត គឺ flydubai បានឈានដល់ការឯកភាពគ្នាមួយក្នុងការពង្រីក​ភាព​ជាដៃគូពាណិជ្ជកម្ម​របស់ខ្លួន ខណៈកំពុងមានវិបត្តិការទូតជាមួយកាតា៕

៥៖ កងកម្លាំងរដ្ឋាភិបាលស៊ីរី​បានរកឃើញឃ្លាំង​ស្ដុកមួយ ដែលមានមីស៊ីល​ប្រឆាំងរថក្រោះ​របស់សហរដ្ឋអាមេរិក​ជិត ៣០គ្រាប់ នៅក្នុងខេត្ត Latakia នៅអំឡុង​ប្រតិបត្តិការ​បោសសំអាត​គ្រាប់មីននៅទីនោះ៕

៦៖ អាជ្ញាធរចិន នៅថ្ងៃចន្ទនេះ​បានឱ្យដឹងថា មនុស្ស​យ៉ាងហោច​ណាស់ ១៨នាក់បានស្លាប់ និង​១៨នាក់​ផ្សេងទៀត​នៅតែបន្តបាត់ខ្លួន​នៅឡើយ បន្ទាប់ពីគ្រោះ​ទឹកជំនន់​បង្កឡើងដោយ ភ្លៀងធ្លាក់​ខ្លាំងបាន​វាយប្រហារ​មកលើ​ទីក្រុង​ Jilin ស្ថិតនៅភាគ​ឦសាន​ប្រទេសចិន កាលពីសប្ដាហ៍មុន៕