(សេអ៊ូល)៖ យោធាកូរ៉េខាងត្បូងប្រកាសថា ខ្លួននឹងនៅតែបន្តការធ្វើសមយុទ្ធប្រចាំឆ្នាំ ជាមួយនិងសហរដ្ឋអាមេរិកដដែល នៅឆ្នាំ២០១៨ ដោយគ្មានការផ្លាស់ប្តូរឡើយ។ នេះបើតាមការប្រកាសពីក្រសួងការពារជាតិកូរ៉េខាងត្បូងផ្ទាល់ ដកស្រង់ខ្លឹមសារដោយទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃចន្ទ ទី២១ ខែឧសភា ឆ្នាំ២០១៨។
អ្នកនាំពាក្យក្រសួងការពារជាតិកូរ៉េខាងត្បូង លោក ឆយ យ៉ុនសូ (Choi Hyun-soo) បានប្រាប់ក្រុមអ្នកសារព័ត៌មានថា ពុំមានការប្រែប្រួលនោះឡើយនៅក្នុងគោលជំហរដែលថា សមយុទ្ធយោធារួមរវាងកូរ៉េខាងជើង នឹងសហរដ្ឋអាមេរិក នឹងនៅតែបន្តប្រព្រឹត្តទៅដូចធម្មតា។ ការធ្វើអត្ថាធិប្បាយបែបនេះ ពីក្រសួងការពារជាតិកូរ៉េខាងត្បូង ត្រូវបានធ្វើឡើងបន្ទាប់ពីគណបក្សប្រឆាំងនៅក្នុងប្រទេសអាស៊ីខាងកើតមួយនេះ បានលើកឡើងពីលទ្ធភាព នៃការពង្រួមទំហំនៃការធ្វើសមយុទ្ធយោធាប្រឆាំង Ulchi Freedom Guardian របស់កូរ៉េខាងត្បូង និងអាមេរិក ដែលត្រូវបានគ្រោងនឹងប្រព្រឹត្តទៅនាថ្ងៃសីហា។
គួរជម្រាបថា កាលពីសប្តាហ៍មុន កូរ៉េខាងជើងបានសម្រេចលុបចោលកិច្ចពិភាក្សាកម្រិតខ្ពស់ជាកូរ៉េខាងត្បូង ដោយសារតែបញ្ហានៃការធ្វើសមយុទ្ធផ្លូវអាកាសមានឈ្មោះថា Max Thunder រវាងទីក្រុងសេអ៊ូល និងទីក្រុងវ៉ាស៊ីនតោន។ សមយុទ្ធយោធា ដែលកំពុងបន្តប្រព្រឹត្តទៅនិងមិនទាន់ចប់នៅឡើយនោះ ត្រូវបានគេរាយការណ៍ថា មានការចូលរួមពីយន្តហោះយោធា និងចម្បាំងប្រហែល ១០០គ្រឿង ក្នុងនោះរួមមានទាំងយន្តហោះចម្បាំងធុន F-22 ចំនួន ០៨គ្រឿង ដែលមានសមត្ថភាពគេចពីប្រព័ន្ធរ៉ាដា និងអាចធ្វើការវាយប្រហារតាមផ្លូវអាកាស ជាលក្ខណៈសម្ងាត់៕