(តូក្យូ)៖ មនុស្ស០៣នាក់ហើយត្រូវគេបញ្ជាក់ថា បាត់បង់ជីវិតក្នុងនោះរួមមានកុមារីវ័យ ០៩ឆ្នាំម្នាក់ផងដែរ ព្រមទាំងមនុស្សជាង ១០នាក់ទៀតបានរងរបួស ដោយសារគ្រោះរញ្ជួយដីកម្រិត ៦.១រ៉ិចទ័រ (ត្រូវបានគេដំឡើងពី ៥.៩រ៉ិចទ័រ) ដែលបានវាយប្រហារខេត្ត អូសាកា (Osaka) ភាគខាងលិចប្រទេសជប៉ុននាព្រឹកថ្ងៃចន្ទនេះ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃចន្ទ ទី១៨ ខែមិថុនា ឆ្នាំ២០១៨។
ចំនួនមនុស្សស្លាប់អាចនឹងកើនឡើងថែមទៀត ខណៈរដ្ឋមន្រ្តីគ្រប់គ្រងគ្រោះមហន្តរាយជប៉ុន លោក ហាជីរ៉ូ អូកូនូជិ (Hachiro Okonogi) បានឲ្យដឹងថា នៅមានមនុស្សជាប់នៅក្រោមគំនរអគារដែលបានដួលរលំ ហើយក្រុមភ្នាក់ងារជួយសង្រ្គោះ កំពុងព្យាយាមតាមស្វែងរកពួកគេ។
បើតាមប្រព័ន្ធផ្សព្វផ្សាយក្នុងប្រទេសជប៉ុន ករណីអគ្គីភ័យក៏បានកើតមានឡើង ដោយសារហេតុការណ៍រញ្ជួយដីនេះផងដែរ ខណៈមនុស្សជាច្រើនត្រូវបានគេជឿជាក់ថា នៅជាប់គាំងក្នុងប្រអប់ជណ្តើរយន្ត ហើយលំនៅឋានជាង ១៧០,០០០ខ្នង នៅខេត្ត Osaka និងខេត្ត ហ៊ីយ៉ូហ្គោ (Hyogo) កំពុងគ្មានអគ្គិសនីប្រើប្រាស់។ ជាមួយគ្នានេះ សេវារថភ្លើង និងអាកាសយានដ្ឋានមួយចំនួន នៅក្នុងតំបន់ក៏ត្រូវបានផ្អាកដំណើរការជាបណ្តោះអាសន្នថែមទៀតផង។
គួរជម្រាបថា គ្រោះរញ្ជួយដីដែលមានជម្រៅ ១០គីឡូម៉ែត្រក្រោមផ្ទៃដីនេះ ពុំបានបង្កជារលកយក្សស៊ូណាមិនោះឡើយ៕
