(ពិភពលោក)៖ នៅថ្ងៃអង្គារ ទី១៤ ខែសីហា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ទីភ្នាក់ងារ FBI ជើងចាស់ម្នាក់លោក ភីធឺ ស្តរហ្សូក (Peter Strzok) ដែលបានឆ្លើយឆ្លងសារប្រឆាំងលោក ដូណាល់ ត្រាំ ជាមួយមិត្តរួមការងារម្នាក់របស់ខ្លួន នៅអំឡុងការបោះឆ្នោតប្រធានាធិបតីអាមេរិក កាលពីឆ្នាំ២០១៦ ត្រូវបានបណ្ដេញចេញពី តំណែងជាផ្លូវការហើយ នាថ្ងៃចន្ទដើមសប្ដាហ៍នេះ៕
២៖ ក្រុមហ៊ុនអវកាស SpaceX របស់លោក អេឡូន ម៉ាសក៍ (Elon Musk) បានរៀបចំសន្និសីទមួយដោយស្ងាត់ៗ ជាមួយការចូលរួមអង្គការ NASA និងក្រុមអ្នកជំនាញឯទៀត ដើម្បីបង្កើតគម្រោងប្រកបដោយមហិច្ឆតាមួយ សម្រាប់ការបញ្ជូនមនុស្សឲ្យទៅជាន់លើដីរបស់ភពអង្គារ (Mars) និងការសាងសង់មូលដ្ឋាននៅលើភពក្រហមនោះតែម្តង៕
៣៖ បើតាមសេចក្តីរាយការណ៍របស់ទីភ្នាក់ងារព័ត៌មានរដ្ឋស៊ីរី SANA ច្រកព្រំដែនរវាងប្រទេសស៊ីរីនិងហ៊្សកដានី Nasib ដែលកងទ័ពស៊ីរី ទើបដណ្តើមបានពីក្រុមឧទ្ទាមមកវិញថ្មីៗនេះ គឺអាចរង់ចាំទទួលជនភៀសខ្លួនស៊ីរីនៅហ៊្សកដានីដែលអន្ទះសារចង់ វិលត្រឡប់មកប្រទេសកំណើតវិញបានហើយ៕
៤៖ ប្រធានាធិបតីអាមេរិកលោក ដូណាល់ ត្រាំ បានចុះហត្ថលេខាហើយលើសេចក្ដីព្រាងច្បាប់ស្ដីពីកញ្ចប់ថវិកាយោធា ៧១៦ពាន់លានដុល្លារ ដែលនឹងត្រូវប្រើប្រាស់ក្នុងការចំណាយលើវិស័យយោធា និងរួមបញ្ចូលទាំងការត្រួតពិនិត្យឡើងវិញ លើកិច្ចសន្យានាពេលកន្លងមករវាងរដ្ឋាភិបាលអាមេរិក ជាមួយក្រុមហ៊ុនចិន ZTE និងក្រុមហ៊ុន Huawei៕
៥៖ ក្រុមអ្នកប្រយុទ្ធ ISIS ចន្លោះពី ២០,០០០នាក់ ដល់ ៣០,០០០នាក់ នៅតែបន្តមានវត្តមាននៅឡើយនៅក្នុងប្រទេសអ៊ីរ៉ាក់ និងស៊ីរី បើទោះជាពួកនេះបានបរាជ័យផ្នែកយោធា និងបានបាត់បង់ឥទ្ធិពលមួយផ្នែកធំ នៅក្នុងតំបន់មជ្ឈិមបូព៌ាក៏ដោយ៕
៦៖ រដ្ឋាភិបាលចិនបានបង្ហាញការសោកស្ដាយ និងជំទាស់យ៉ាងខ្លាំងចំពោះការអនុម័តច្បាប់ ស្ដីពីកញ្ចប់ថវិកាយោធាឆ្នាំ២០១៩ ឬគេស្គាល់ជាអក្សរកាត់ថា NDAA របស់សហរដ្ឋអាមេរិក ដែលចំណុចមួយចំនួនមានភាពអវិជ្ជមានមកលើចិន ជាពិសេសគឺចំណុចចែងពី ការធ្វើទំនាក់ទំនាក់ជាមួយកោះតៃវ៉ាន់៕
