(ឡុងដ៍)៖ នាយករដ្ឋមន្រ្តីអង់គ្លេស លោកស្រី Theresa May បានរំសាយចោលនូវលទ្ធភាពនៃការបោះឆ្នោត​​ប្រជាមតិជាលើកពីរ​ស្តីពី Brexit (ការដកចក្រភពអង់គ្លេសចេញពីសហភាពអឺរ៉ុប) ដោយថាទង្វើនេះគឺប្រៀបដូចជាអំពើក្បត់យ៉ាងអាក្រក់ ចំពោះ​លទ្ធិ​ប្រជាធិប​តេយ្យនៃចក្រភពអង់គ្លេស។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃអាទិត្យ ទី០២ ខែកញ្ញា ឆ្នាំ២០១៨។

ជាមួយគ្នានេះ លោកស្រី May ក៏បានបញ្ជាក់ផងដែរថា រដ្ឋាភិបាលរបស់លោកស្រី នឹង​បំពេញតាមការសម្រេចចិត្តតាមបែបលទ្ធ​ប្រជា​ធិបតេយ្យរបស់ពលរដ្ឋអង់គ្លេស តាមរយៈការធានាឲ្យបានថា ចក្រភពអង់គ្លេស នឹងដើរចេញពីសហភាពអឺរ៉ុប (EU) នៅថ្ងៃទី២៩ ខែមីនា ឆ្នាំក្រោយ។

ម៉្យាងវិញទៀត លោកស្រី May បង្ហាញជំនឿជឿជាក់ថា​ រដ្ឋាភិបាលលោកស្រី នឹងអាចចរចាបានកិច្ចព្រមព្រៀងល្អប្រសើរមួយ សម្រាប់​​ប្រទេសរបស់លោកស្រី ប៉ុន្តែទាក់ទិននឹងការចរចា Brexit ដ៏អូសបន្លាយនេះជាមួយទីក្រុងព្រុចស៊ែល លោកស្រី May បានសង្កត់ធ្ងន់​ថា​ ​ចក្រភពអង់គ្លេស នឹងត្រៀមលក្ខណៈរួចរាល់ ទោះបីជាគ្មានកិច្ចព្រមព្រៀងណាមួយក៏ដោយ ប្រសិនបើជារឿងចាំបាច់។

គួររំលឹកថា នៅក្នុងការបោះឆ្នោតប្រជាមតិ កាលពីថ្ងៃទី២៣ ខែមិថុនា ឆ្នាំ២០១៦ ប្រជាជនអង់គ្លេសភាគច្រើន បានសម្រេចគាំទ្រការ​​ដក​ខ្លួនចេញពីសហភាពអឺរ៉ុប៕