(កំពង់ចាម)៖ រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានថ្លែងថា សម្រាប់ឆ្នាំ២០១៩នេះ ខេត្តកំពង់ចាមនឹងមានគម្រោងស្ថាបនាហេដ្ឋារចនាសម្ព័ន្ធចំនួន១០កន្លែង ដែលមានថវិកាជាតិ៦លានដុល្លារអាមេរិក សម្រាប់ការកសាង និងជួសជុលផ្លូវនៅខេត្តកំពង់ចាមនេះ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ។

លោកទេសរដ្ឋមន្ត្រី បានថ្លែងយ៉ាងដូចនេះ នារសៀលថ្ងៃទី១៤ ខែមីនា ឆ្នាំ២០១៩ ក្នុងឱកាសដែលលោកអញ្ជើញជាអធិបតី ក្នុងពិធីសំណេះសំណាលជាមួយមន្ត្រីរាជការ បុគ្គលិក និងកម្មករ នៃមន្ទីរសាធារណការ និងដឹកជញ្ជូន នៅសាលាខេត្តកំពង់ចាម។ ពិធីនោះ ក៏មានការចូលរួមពីលោក គួច ចំរើន អភិបាលខេត្តកំពង់ធំ និងថ្នាក់ដឹកនាំ មន្ត្រីរាជការ បុគ្គលិក ប្រមាណជាង១០០នាក់។

រដ្ឋមន្ត្រីក្រសួងសាធារណការ បានថ្លែងថា ក្រសួងបានសម្រេចនូវសមិទ្ធផលនានា ដែលកើតចេញពីផែនការ១០០ថ្ងៃ ដែលក្នុងនោះរួមមាន ការដាក់ដំណើរការសាលាបង្រៀនបើកបររថយន្តធុនធ្ងន់ យុទ្ធនាការជិះកង់ពិនិត្យមើលផ្លូវខូច និងកម្មវិធីថែទាំផ្លូវ (ROAD CARE Mobile App)ជាដើម។ សម្រាប់គម្រោងដែលកំពុងអនុវត្ត និងគម្រោងដែលនឹងត្រូវអនុវត្ត លើហេដ្ឋារចនាសម្ព័ន្ធដឹកជញ្ជូន សំខាន់ៗមួយចំនួនមានដូចជា ការលើកកម្ពស់គុណភាព និងពង្រីកផ្លូវពី២គន្លង ទៅ៤គន្លង និងគម្រោងសាងសង់ផ្លូវល្បឿនលឿនពីភ្នំពេញ ទៅខេត្តព្រះសីហនុ និងគម្រោងសាងសង់ស្ពានមួយចំនួន ដោយហេតុថាហេដ្ឋារចនាសម្ព័ន្ធដឹកជញ្ជូនដើរតួនាទីយ៉ាងសំខាន់ ក្នុងការលើកកម្ពស់ជីវភាពរស់នៅរបស់ប្រជាពលរដ្ឋ ក៏ដូចជាសេដ្ឋកិច្ចជាតិទាំងមូលផងដែរ។

លោកទេសរដ្ឋមន្ត្រី បានឱ្យដឹងទៀតថា នៅក្នុងឆ្នាំ២០១៩នេះ សម្រាប់ខេត្តកំពង់ចាម នឹងមានគម្រោងស្ថាបនាហេដ្ឋារចនាសម្ព័ន្ធ១០កន្លែង ដោយប្រើប្រាស់ថវិកាជាតិចំនួន ៦លានដុល្លារ សម្រាប់ធ្វើការស្ថាបនាហេដ្ឋារចនាសម្ព័ន្ធផ្លូវថ្នល់ ក្នុងនោះមាន១គម្រោងសម្រាប់ថែទាំផ្លូវ មាន២គម្រោងអនុវត្តដោយមន្ទីរសាធារណការខេត្តកំពង់ចាម និង ៤គម្រោងអនុវត្តដោយក្រសួងការពារជាតិ និង៣គម្រោងទៀតដាក់ឲ្យដេញថ្លៃ ។ ជាមួយគ្នានោះដែរ លោកទេសរដ្ឋមន្ត្រី ក៏បានផ្ដាំផ្ញើដល់មន្ត្រីនៃមន្ទីរសាធារណការខេត្តកំពង់ចាម សុំធ្វើការបម្រើប្រជាពលរដ្ឋឲ្យបានល្អប្រសើរ ជាពិសេសគឺការបម្រើសេវាឱ្យបានឆាប់រហ័សជូនប្រជាពលរដ្ឋ។

លោក ស៊ុន ចាន់ថុល ក៏បានក្រើនរំឭកឱ្យមន្ត្រីទាំងអស់ ខិតខំប្រឹងប្រែងធ្វើការបម្រើប្រជារាស្ត្រឱ្យបានទ្វេដង ហើយត្រូវទុកខ្លួនឯងជាអ្នកបំរើរាស្ត្រ មិនមែនជាចៅហ្វាយរាស្ត្រនោះទេ ហើយមន្ត្រីគ្រប់រូបត្រូវប្រកាន់ខ្ជាប់ អភិក្រមទាំង៥ និងអនុសាសន៍ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាឱ្យបានខ្ជាប់ខ្ជួនផងដែរ។ សូមមន្ត្រីទាំងកុំធ្វើជាមន្ត្រីដែលមានជំងឺតួរឯកឱ្យសោះ។

លោក គួច ចំរើន បានលើកឡើងថា ពិតណាស់ថា នៅក្នុងខណៈពេលដែលសមិទ្ធផលបានកើតឡើងជាបន្តបន្ទាប់ ខេត្តកំពង់ចាមក៏នៅតែមានសំណូមពរ ពីប្រជាពលរដ្ឋមិនតិចនោះទេ ដោយពេលមុនៗ យើងអាចស្ថាបនាត្រឹមតែផ្លូវលំ ឬផ្លូវគ្រួសក្រហម ក៏ពួកគាត់មានការសប្បាយរីករាយនូវសមិទ្ធផលទាំងនោះដែរ ក៏ប៉ុន្តែមកដល់បច្ចុប្បន្ននេះ ការសាងសង់ផ្លូវក្រាលក្រួសក្រហម គឺពួកគាត់មិនទាន់សប្បាយចិត្ត នឹងសមិទ្ធផលទាំងនោះទេ ដោយសារសេចក្តីត្រូវការ និងការប្រើប្រាស់ផ្លូវថ្នល់ គឺពួកគាត់ចង់បានល្អប្រសើរជាងមុន ដូចជាផ្លូវបេតុងជាដើម សម្រាប់ប្រើប្រាស់នៅក្នុងមូលដ្ឋានរបស់ពួកគាត់ ។

ជាមួយគ្នានេះដែរ ទាក់ទងទៅនឹងផ្លូវលេខ៧០នៅក្នុងស្រុកកងមាស ការស្ថាបនានៅសល់ប្រវែង ១៦គីឡូម៉ែត្រទៀត ដែលជាផ្លូវដីក្រហម ហើយកំណាត់ផ្លូវនេះដែរ បើទោះជាមន្ទីរសាធារណការខេត្តកំពង់ចាម បានធ្វើការឈូសឆាយ ដើម្បីផ្តល់ភាពងាយស្រួលជូនប្រជាពលរដ្ឋបានធ្វើដំណើរនោះក្តី ក៏ពួកគាត់នៅតែមានការសំណូមពរ ដល់អាជ្ញាធរខេត្តដើម្បីធ្វើការសាងសង់ផ្លូវបង្ហើយ ព្រោះថាផ្លូវនេះពេលធ្វើដំណើរមានដីហុយ ដែលប្រការនេះអាចនឹងបង្កឱ្យពួកគាត់មានជំងឺឈឺថ្កាត់ ដោយសារការប្រើប្រាស់នៅលើផ្លូវមានដីហុយនេះ នឹងមានការជួបផលលំបាកនៅក្នុងការរស់នៅក្នុងតំបន់នោះផងដែរ៕

Advertising