(កំពង់ធំ)៖ អគ្គស្នងការនគរបាលជាតិ នាយឧត្តមសេនីយ៍សន្តិបណ្ឌិត នេត សាវឿន នៅល្ងាចថ្ងៃទី១៦ ខែឧសភា ឆ្នាំ២០២០នេះ បានចេញលិខិតសម្រេចផ្អាកការងារជាបណ្តោះអាសន្ន ចំពោះនាយការិយាល័យចរាចរណ៍ជើងគោក នៃស្នងការដ្ឋាននគរបាលខេត្តកំពង់ធំ ពាក់ព័ន្ធបើករថយន្តទាំងស្រវឹងទៅបុកទ្រព្យសម្បត្តិសាធារណៈ និងជេរប្រមាថធ្ងន់ៗទៅលើអភិបាលខេត្តកំពង់ធំ។

យោងតាមសេចក្តីសម្រេចរបស់នាយឧត្តមសេនីយ៍អគ្គស្នងការនគរបាលជាតិ ដែលបណ្តាញព័ត៌មាន Fresh News ទទួលបាននៅល្ងាចថ្ងៃនេះ បានបញ្ជាក់ថា «ត្រូវបានផ្អាកការងារបណ្តោះអាសន្ន ចំពោះវរសេនីយ៍ឯក រុំ សុវិជ្ជា អត្តលេខ០៣៨៧៤ នាយការិយាល័យចរាចរណ៍ជើងគោក នៃស្នងការដ្ឋាននគរបាលខេត្តកំពង់ធំ ហើយនគរបាលរូបនេះ ត្រូវមកបង្ហាញខ្លួនរៀងរាល់ម៉ោងធ្វើការនៅការិយាល័យបុគ្គលិក នៃស្នងការដ្ឋាននគរបាលខេត្តកំពង់ធំ»។

បន្ថែមលើលិខិតសម្រេចនេះ នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានប្រាប់បណ្តាញព័ត៌មាន Fresh News យ៉ាងដូច្នេះថា «អគ្គស្នងការដ្ឋាននគរបាលជាតិ បានចាត់ទុកករណីល្មើសរបស់លោក រុំ សុវិជ្ជា នាយ ការិយាល័យចរាចរណ៍ផ្លូវគោក នៃស្នងការដ្ឋាននបខេត្តកំពង់ធំ ជាអំពើល្មើសនឹងបទបញ្ជារបស់នគរបាលជាតិ មិនធ្វើគំរូក្នុងការគោរពអនុវត្តច្បាប់ស្តីពីចរាចរណ៍ផ្លូវគោក ដោយបានបើកបររថយន្តក្នុងស្ថានភាពស្រវឹង បង្កការខូចខាតទ្រព្យសម្បត្តិសាធារណៈ និងប្រមាថដល់អ្នកដទៃ។ អគ្គស្នងការដ្ឋាននបជបានសម្រេចព្យួរការងារជាបណ្តោះអាសន្នដើម្បីរង់ចាំការសម្រេចជាថ្មី»។

ជាមួយគ្នានេះ មន្រ្តីនគរបាលជាន់ខ្ពស់នៃអគ្គស្នងការដ្ឋាននគរបាលជាតិ ក៏បានបន្ថែមផងដែរថា ក្រោយចេញលិខិតនេះរួច អគ្គស្នងការនគរបាលជាតិ បានត្រៀមលិខិតមួយទៀត ស្នើសុំទៅសម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ដើម្បីដកតំណែងចោលតែម្តង។

មន្រ្តីរាជការ និងប្រជាពលរដ្ឋនៅខេត្តកំពង់ធំ ជាពិសេសមន្រ្តីនគរបាលជាច្រើននាក់នៅក្នុងខេត្តនេះ បានសារទរយ៉ាងខ្លាំងចំពោះចំណាត់ការដ៏មានប្រសិទ្ធភាពរបស់អគ្គស្នងការនគរបាលជាតិ ពីព្រោះមន្រ្តីនគរបាលរូបនេះ បានបង្កបញ្ហាជាច្រើនមកហើយ ដែលធ្វើឲ្យប៉ះពាល់សតិអារម្មណ៍យ៉ាងខ្លាំងដល់ប្រជាពលរដ្ឋ និងចំពោះអ្នកដែលជួបគ្រោះថ្នាក់ចរាចរណ៍តែម្តង ដោយត្រូវនាយការិយាល័យរូបនេះ ជំរិត និងទាមទារយកលុយរាប់ពាន់ដុល្លារ។

ទាំងមន្រ្តីរាជការ សមត្ថកិច្ច និងប្រជាពលរដ្ឋនៅតែទទូចដល់ថ្នាក់ដឹកនាំ ត្រូវបន្តចំណាត់តាមផ្លូវច្បាប់ និងធ្វើការស្រាវជ្រាវបន្ថែមទៀត ពាក់ព័ន្ធនឹងបទល្មើសដែលមន្រ្តីនគរបាលរូបនេះ ធ្លាប់ប្រព្រឹត្ត។ មន្រ្តីខ្លះលួចបង្ហើបថា បុគ្គលរូបនេះតែងតែយកឈ្មោះថ្នាក់ដឹកនាំអគ្គស្នងការនគរបាលជាតិ ទៅគំរាមដល់សមត្ថកិច្ច និងមន្រ្តីរាជការនៅទីនោះជាច្រើនលើកច្រើនសារផងដែរ។

នៅរសៀលថ្ងៃមិញ នាយឧត្តមសេនីយ៍អគ្គស្នងការ បានបញ្ជាឱ្យសមត្ថកិច្ចជំនាញ ចាត់វិធានការជាបន្ទាន់ តាមវិន័យកងកម្លាំងនគរបាលជាតិ និងតាមច្បាប់ជាបន្ទាន់ ទៅលើនាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ធំ បន្ទាប់ពីមន្ត្រីនគរបាលរូបនេះ។

សូមបញ្ជាក់ថា នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ធំ លោក រុំ សុវិជ្ជា បានផឹកស្រាស្ររឹងជោកជាំរួចបើករថយន្តទៅបុករនាំងបរិវេណរូបសំណាក លោកតាអាចារ្យលាក់ បណ្តាលឱ្យខូចខាត ហើយអ្វីដែលធ្វើឱ្យកានតែភ្ញាក់ផ្អើលទៀតនោះ គឺមន្ត្រីនគបាលចរាចរណ៍ជាន់ខ្ពស់រូបនេះ បានស្រែកជេរ និងប្រមាថយ៉ាងធ្ងន់ៗទៅអភិបាលខេត្តកំពង់ធំលោក សុខ លូ ថា នៅទីតាំកើតហេតុមិនមានដាក់ភ្លើងបំភ្លឺ និងដាក់ចំណាំងផ្លាត ទើបឱ្យគាត់ជួបគ្រោះថ្នាក់បែបនេះ ប៉ុន្តែតាមការពិតនៅទីតាំងកើតហេតុមានភ្លើងបំភ្លឺគ្រប់គ្រាន់ និងមានចំណាំងផ្លាតយ៉ាងពិតប្រាកដ (សូមមើលរូបភាពខាងក្រោម)។

គ្រោះថ្នាក់ចរាចរណ៍ ដែលបង្កឡើងដោយនាយការិយាល័យចរាចរណ៍ផ្លូវគោកខេត្តកំពង់ធំ បណ្តាលមកពីជាតិស្រវឹងខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោង ៩៖១២នាទីយប់ ថ្ងៃទី១៥ ខែឧសភា ឆ្នាំ២០២០ម្សិលមិញ ស្របពេលដែលរាជរដ្ឋាភិបាល តាមរយៈក្រសួងមហាផ្ទៃ និងអគ្គស្នងការដ្ឋាននគរបាលជាតិ បាននិងកំពុងអនុវត្តរឹតបន្តឹងច្បាប់ចរាចរណ៍ផ្លូវគោក នៅទូទាំងប្រទេសតាំងពីថ្ងៃទី១ ខែឧសភា ឆ្នាំ២០២០ និងខ្លួនឯងទៀតសោតក៏មានតួទាទីជានាយការិយាល័យចរាចរណ៍ផ្លូវគោក ខេត្តកំពង់ធំទៀតផង។

យោងតាមរបាយការណ៍របស់សមត្ថកិច្ចខេត្ត បានបញ្ជាក់ថា មន្ត្រីនគរបាលដែលជាបក្ខពួក ហើយបានរំដោះយកលោក រុំ សុវិជ្ជា ចេញមិនឲ្យសមត្ថកិច្ចក្រុងស្ទឹងសែន អនុវត្តច្បាប់ រួមមាន៖

*លោកវរសេនីយ៍ត្រី ហួ គឹមហ៊ត នាយរងការិយាល័យប្រឆាំងបទល្មើសសេដ្ឋកិច្ច
*លោកអនុសេនីយ៍ឯក សេង សុខចំរើន នាយរងផ្នែកការិយាល័យចរាចរណ៍ផ្លូវគោក
*លោកអនុសេនីយ៍ទោ វ៉ាន់ កុសល មន្ត្រីការិយាល័យចរាចរណ៍ផ្លូវគោក។

លោក រុំ សុវិជ្ជា កាលពីថ្ងៃទី២៦ ខែមីនា ឆ្នាំ២០២០ ក៏ត្រូវបានសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានចេញលិខិតព្រមានលើកទី១ ដោយសារតែធ្វេស ប្រហែសក្នុងការអនុវត្តភារកិច្ចរបស់ខ្លួន ហើយសម្តេចក្រឡាហោម បានបញ្ជាក់ទៀតថា បើនៅតែប្រព្រឹត្តផ្ទុយពីការណែនាំនេះ នឹងចាត់វិធានការណ៍តាមវិន័យរបស់កងកម្លាំងនគរបាលជាតិ ជាក់ជាពុំខាន។

មន្ត្រីនគរបាលជាន់ខ្ពស់ និងអាជ្ញាធរមួយចំនួន ព្រមទាំងរបាយការណ៍របស់សមត្ថកិច្ចខេត្តកំពង់ធំ ដែលបណ្តាញព័ត៌មាន Fresh News ទទួលបាននៅថ្ងៃទី១៦ ខែឧសភា ឆ្នាំ២០២០នេះ ក៏បានបង្ហាញពីរឿងអាស្រូវមួយចំនួនដែលនគរបាលរូបនេះ ធ្លាប់បានបង្កជាច្រើនដង ធ្វើឱ្យប៉ះពាល់យ៉ាងធ្ងន់ធ្ងរដល់មុខមាត់របស់ខេត្ត ស្ថាប័ននគរបាលជាតិ ជាពិសេសទទួលការថ្នាំងថ្នាក់យ៉ាងខ្លាំង ពីមន្ត្រីរាជការ និងប្រជាពលរដ្ឋនៅក្នុងខេត្ត និយាយជារួម និងនិយាយដោយឡែក ចំពោះប្រជាពលរដ្ឋដែលធ្លាប់មានបញ្ហាគ្រោះថ្នាក់ចរាចរណ៍នាពេលកន្លងទៅ។

ជាមួយគ្នានេះ លោក រុំ សុវិជ្ជា ក៏ធ្លាប់បានជេរប្រមាថ ដោយសម្តីអសុរោះ ទៅលើអ្នកគ្រូពេទ្យនៅខេត្តកំពង់ធំ កាលពីពេលកន្លងទៅផងដែរ ពេលដែលរូបគាត់បានចូលទៅអុកឡុក រករឿង នៅក្នុងមន្ទីរពេទ្យ ដើម្បីចូលមើលមិត្តភក្តិផឹកស៊ីរបស់ខ្លួន ជួបគ្រោះថ្នាក់ចរាចរណ៍ ហើយត្រូវបានគេបញ្ជូនទៅកាន់មន្ទីរពេទ្យ។

យោងតាមរបាយការណ៍របស់សមត្ថកិច្ចខេត្តកំពង់ធំ បានឲ្យដឹងថា បន្ទាប់ពីបង្កហេតុ និងស្រែកឡូឡាបានមួយសន្ទុះ មានបក្ខពួកដែលគេដឹងថា ជានគរបាលដូចគ្នា បាននាំគ្នារំដោះយករថយន្ត បង្កហេតុ ទៅទុកនៅយានដ្ឋានមួយកន្លែងទាំងយប់ ដើម្បីបិទបាំងករណីនេះ។

អ្នកដែលឃើញហេតុការណ៍នេះ បានសំណូមពរដល់សម្ដេចក្រឡាហោម និងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ មេត្តាចាត់វិធានការឱ្យបានធ្ងន់ធ្ងរចំពោះបុគ្គល នេះ ដើម្បីជាគំរូដល់មន្ត្រីដទៃទៀត និងដើម្បីចូលរួមការរឹតបន្ដឹងការនុវត្តន៍ច្បាប់ចរាចរណ៍ឱ្យកាន់តែមានប្រសិទ្ធភាពថែមទៀត ហើយការសូមទោសណាមួយ វាមិនអាចបំពេញនូវទោស កំហុសរបស់ខ្លួនដែលបានធ្វើនោះឡើយ៕