(បាត់ដំបង)៖ ក្រោយបញ្ចប់ការពិ និត្យគម្រោងអភិវឌ្ឍន៍ទំនប់សាលាតាអន នៅក្រុងបាត់ដំបងរួចមក នៅថ្ងៃទី៦ ខែសីហា ឆ្នាំ២០២០ដដែលនេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបន្តដំណើរអញ្ជើញចុះពិនិត្យគម្រោងអភិវឌ្ឍន៍ទំនប់ដូនទ្រី មានទីតាំងស្ថិតនៅក្នុងស្រុករុក្ខគីរី ខេត្តបាត់ដំបង។

គម្រោងអភិវឌ្ឍន៍ទំនប់ដូនទ្រី មានទីតាំងស្ថិតនៅចម្ងាយប្រមាណ ៩០គីឡូម៉ែត្រ ភាគពាយ័ព្យពីក្រុងបាត់ដំបង ហើយក៏ជាគម្រោងមួយក្រោមហិរញ្ញប្បទានសម្បទានរបស់សាធារណរដ្ឋកូរ៉េផងដែរ។ គម្រោងនេះ បានចាប់ផ្តើមធ្វើការសាងសង់កាលពីថ្ងៃទី២៥ ខែមិថុនា ឆ្នាំ២០១៨ ហើយគ្រោងនឹងបញ្ចប់នៅក្នុងឆ្នាំ២០២៣។ គិតមកដល់បច្ចុប្បន្ននេះ ការងារសម្រេចបានប្រមាណ ២៦% លើទំហំការងារសរុបរបស់គម្រោង។ បន្ទាប់ពីការសាងសង់ត្រូវបានបញ្ចប់ គម្រោងអភិវឌ្ឍន៍ទំនប់ដូនទ្រី អាចផ្គត់ផ្គង់ទឹកសម្រាប់ការស្រោចស្រពលើផ្ទៃដីស្រូវវស្សាបាន ចំនួន ៣៣. 0០០ហិកតា ផ្ទៃដីស្រូវប្រាំងបាន ចំនួន ៤.៥០០ហិកតា។

ក្រសួងធនធានទឹក បានបញ្ជាក់ថា បណ្តាហេដ្ឋារចនាសម្ព័ន្ធសំខាន់ៗ របស់គម្រោងអភិវឌ្ឍន៍ទំនប់ដូនទ្រី ដែលបាន និងកំពុងអនុវត្ត រួមមាន៖

* ទី១៖ ទំនប់មេ ជាប្រភេទទំនប់ស្នូលដី ថ្មបំពេញ Earth Core Rockfill Dam (ECRD) ខ្នងលើទទឹង ០៨ ម៉ែត្រ កម្ពស់ខ្ពស់បំផុតប្រមាណ ៤៧ ម៉ែត្រ និងមានប្រវែងសរុប ៦៥៤ ម៉ែត្រ
* ទី២៖ សំណង់បង្ហៀរ (Spillways) ធ្វើពីបេតុង ស្ថិតនៅខាងឆ្វេងទំនប់មេ មានប្រវែងសរុប ៤១៤ ម៉ែត្រ។ ទំនប់បង្ហៀរនេះអាចដោះទឹកបាន ៨៥០ ម៉ែត្រគីប/វិនាទី
* ទី៣៖ រូងទូនេលពង្វៀងទឹក (Diversion Tunnel) រូង មានរាងជាក្រចកជើងសេះ, អង្កត់ផ្ចិត ០៤ ម៉ែត្រ, មានប្រវែងសរុប ៤៦២ ម៉ែត្រ
* ទី៤៖ សំណង់គ្រប់គ្រងទឹក (Intake Facilities) ជាប្រភេទសំណង់ប៉ម មានទ្វារទឹកច្រើនថ្នាក់ (Multistage Intake Gate) ដែលមានទ្វារទឹកចំនួន ០៥ (២,២ ម៉ែត្រ x ២,២ ម៉ែត្រ, ៤ ទ្វារ និង ៤ ម៉ែត្រ x ៤ ម៉ែត្រ, ១ ទ្វារ)
* ទី៥៖ ទំនប់បណ្តោះអាសន្នខាងលើ (U/S Coffer Dam) មានកម្ពស់ ២០ ម៉ែត្រ, ខ្នងលើទទឹង ០៥ ម៉ែត្រ, ប្រវែង ៥៣៦ ម៉ែត្រ
* ទី៦៖ ទំនប់បណ្តោះអាសន្នខាងក្រោម (D/S Coffer Dam) មានកម្ពស់ ១០ ម៉ែត្រ, ខ្នងលើទទឹងទំនប់ ០៥ ម៉ែត្រ, ប្រវែង ១៥០ ម៉ែត្រ
* ទី៧៖ ផ្លូវក្រាលថ្មភ្នំ ប្រវែង ៥,២ គីឡូម៉ែត ទទឹង ០៧ ម៉ែត្រ ជាមួយសំណង់ដោះទឹកចំនួន ០៨ កន្លែង។

ក្នុងឱកាសអញ្ជើញពិនិត្យគម្រោងនេះ លោករដ្ឋមន្ត្រី បានបញ្ជាក់ថា «គម្រោងអភិវឌ្ឍន៍ទំនប់ដូនទ្រី គឺជាប្រព័ន្ធធារាសាស្រ្តថ្មីមួយជាប្រវត្តិសាស្រ្តសម្រាប់ប្រទេសកម្ពុជា ដែលសំណង់នេះជាប្រភេទ ទំនប់ធំ ដែលការសាងសង់តម្រូវឲ្យប្រើប្រាស់វិធីសាស្រ្តថ្មី មិនដែលអនុវត្តន៏នៅក្នុងប្រទេសកម្ពុជា នាពេលកន្លងមក ដូចជា៖ ការជីករូងក្នុងភ្នំ ការជីកថ្មក្នុងលក្ខខ័ណ្ឌភូគ្គពសាស្រ្តមិនអនុគ្រោះ និងវិធីសាស្រ្តពង្រឹងកែច្នៃបាតគ្រឹះទំនប់ជាដើម»

លោករដ្ឋមន្រ្តីបានបន្តទៀតថា គម្រោងនេះ មិនត្រឹមតែផ្តល់ទឹកសម្រាប់បង្កើនផលិតផលកសិកម្មទាំងនៅរដូវវស្សា និងនៅរដូវប្រាំង ប៉ុណ្ណោះទេ ប៉ុន្តែថែមទាំងរួមចំណែកផងដែរក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់តាមតំបន់មួយចំនួននៅផ្នែកខាងក្រោម។ លើសពីនេះ ទំនប់ដូនទ្រី ក៏នឹងមានលទ្ធភាពផ្គត់ផ្គង់មួយផ្នែកនូវទឹកសម្រាប់ការស្រោចស្រពទៅឲ្យគម្រោងនៅផ្នែកខាងក្រោម ដូចជា អនុគម្រោងពោធិកាណាល់ និងអនុគម្រោងរាមគុណ តាមរយៈស្ទឹងដូនទ្រី។

បើតាមលោករដ្ឋមន្រ្តីធនធានទឹក នេះគឺជាសមិទ្ធផលទី២ នៅក្នុងខេត្តបាត់ដំបង ក្រោមហិរញ្ញប្បទានសម្បទានរបស់សាធារណរដ្ឋកូរ៉េ បន្ទាប់ពីគម្រោងអភិវឌ្ឍន៍ទំនប់សាលាតាអន ដែលបានកើតឡើង ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុត របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក្នុងការធានាដល់ការផ្គត់ផ្គង់ទឹកគ្រប់គ្រាន់សម្រាប់ការបង្កបង្កើនផលស្រូវដំណាំ គ្រប់ប្រភេទ និងសម្រាប់ការប្រើប្រាស់ប្រចាំថ្ងៃ ដែលជាផ្នែកមួយជួយលើកស្ទួយដល់ជីវភាពរស់នៅរបស់បងប្អូនប្រជាពលរដ្ឋ តាមរយៈវិស័យទឹកនៅក្នុងបរិបទ នៃការរីករាលដាលនៃជំងឺកូវីដ-១៩។

ជាមួយគ្នានេះ រដ្ឋមន្រ្តី ក៏សូមថ្លែងអំណរគុណដល់ប្រទេសកូរ៉េ ដែលជានិច្ចកាលតែងជួយដល់រាជរដ្ឋាភិបាលកម្ពុជា ក្នុងការកសាង និងអភិវឌ្ឍន៍ហេដ្ឋារចនាសម្ព័ន្ធស្ទើរគ្រប់វិស័យ និងបានធ្វើការ កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង របស់ក្រុមការងារគម្រោងអភិវឌ្ឍន៍ទំនប់សាលាតាអន និងគម្រោងអភិវឌ្ឍន៍ទំនប់ដូនទ្រី មន្ទីរធនធានទឹក និងឧតុនិយមខេត្តបាត់ដំបង និងអាជ្ញាធរមូលដ្ឋានពាក់ព័ន្ធ ដែលបានបង្កលក្ខណៈឲ្យគម្រោងនេះ ជាមួយនឹងលទ្ធផលការងារដែលសម្រេចបានទៅតាមផែនការដែលបានគ្រោងទុក ហើយក៏សូមអរគុណសន្តិភាព មានសន្តិភាព ទើបយើងមានអ្វីៗ នៅថ្ងៃនេះ។

ទន្ទឹមនេះ លោករដ្ឋមន្រ្តី បានផ្តាំផ្ញើក្រុមការងារទាំងអស់ត្រូវចេះថែរក្សាសុខភាព និងសូមប្រកាន់ខ្ជាប់នូវអនាម័យ តាមវិធាន និងសេចក្ដីប្រកាសនានារបស់ក្រសួងសុខាភិបាល ចំពោះការឆ្លងរីករាលដាលនៃជំងឺកូវីដ-១៩៕