(ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានស្នើប្រជាពលរដ្ឋទាំងអស់ឱ្យទៅរកសេវាក្រោមសមត្ថកិច្ចរបស់ក្រសួងសាធារណការ និងដឹកជញ្ជូន ដោយផ្ទាល់កុំពឹងអ្នកដទៃ (អ្នកគួកជេ) ដែលនាំឱ្យខាតបង់ថវិកា។

ការអំពាវនាវរបស់លោកទេសរដ្ឋមន្ត្រី ស៊ុន ចាន់ថុល បានធ្វើឡើងពេលលោកដឹកនាំអ្នកព័ត៌មានជាច្រើនរូប ដើម្បីទស្សនកិច្ច និងបង្ហាញវត្តមានអគារទីស្តីការក្រសួង និងអគារវិទ្យាស្ថាន «តេជោសែន សាធារណការ និងដឹកជញ្ជូន» កាលពីសប្តាហ៍កន្លងទៅ។

ក្រៅពីបង្ហាញវត្តមានអគារទីស្តីការ និងអគារវិទ្យាស្ថានបណ្តុះបណ្តាលជំនាញសាងសង់ផ្លូវ និងស្ពានដំបូងគេនៅកម្ពុជាហើយនោះ រដ្ឋមន្ត្រី ដែលបញ្ចប់ការសិក្សានៅសាកលវិទ្យាហាវើដ (Harvard) របស់អាមេរិក ក៏បាននាំអ្នកព័ត៌មានទៅមើលមជ្ឈមណ្ឌលផ្តល់សេវាសាធារណៈរបស់ខ្លួនផងដែរ។

កន្លែងផ្តល់សេវានេះមានដូចជាការ៖ សេវាចុះបញ្ជីយានយន្ត, ត្រួតពិនិត្យលក្ខណៈបច្ចេកយានជំនិះ, ធ្វើបណ្ណបើកបរ, ការស្នើសុំអាជ្ញាបណ្ណដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងការសុំអាជ្ញាបណ្ណធ្វើអាជីវកម្មដឹកជញ្ជូនក្នុងប្រទេសតាមផ្លូវគោកជាដើម។

គ្រាន់តែចូលដល់មជ្ឈមណ្ឌលផ្តល់សេវាសាធារណៈរបស់ក្រសួងធ្វើឱ្យអ្នកព័ត៌មានការភ្ញាក់ផ្អើលចំពោះទំនើបកម្មនៃការផ្តល់សេវារបស់ក្រសួង ដែលមិនចាញ់ការផ្តល់សេវានៅតាមអាជីវកម្មរបស់វិស័យឯកជននោះឡើយ។ ពេលចូលដល់មជ្ឈមណ្ឌលនេះ អ្នកទៅរកសេវាអាចចុចយកលេខរៀងទៅតាមសេវាដែលខ្លួនទៅរក។ បន្ទាប់មកពួកគេត្រូវអង្គុយរង់ចាំដល់លេខរៀងរបស់ខ្លួន។ ពេលដល់លេខរៀងរបស់អ្នកទៅរកសេវាណាម្នាក់ លេខរៀងនឹងត្រូវបានបង្ហាញនៅលើផ្ទាំងមួយ ហើយមានការហៅជាសំឡេងផងដែរ។

នៅលើអាវរបស់មន្ត្រីផ្តល់សេវានីមួយត្រូវបានបំពាក់ឈ្មោះជាសម្គាល់។ ត្រង់ចំណុចនេះ លោកទេសរដ្ឋមន្ត្រី បានលើកឡើងថា ប្រជាពលរដ្ឋដែលទៅរកសេវាបើមន្ត្រីផ្តល់សេវាណាមួយប្រើកាយវិការឆ្គាំឆ្គង ឬទារកម្រៃសេវាលើសជាដើម អាចទូរស័ព្ទរាយការណ៍ពីករណីមិនប្រក្រតីនេះភ្លាមៗតែម្តង។

នៅក្នុងមជ្ឈមណ្ឌលនេះពាក្យស្លោកមួយផ្ទាំងដែលសរសេរថា «មន្ត្រីជាខ្ញុំបម្រើរាស្ត្រ មិនមែនជាចៅហ្វាយរាស្ត្រ» ត្រូវបានរំលេចយ៉ាងធំនៅមុខមន្ត្រីផ្តល់សេវា។

លោកទេសរដ្ឋមន្ត្រី ស៊ុន ចាន់ថុល បានលើកឡើងថា ការរៀបចំបែបនេះ ដើម្បីជួយឱ្យការផ្តល់សេវាជូនប្រជាពលរដ្ឋ បានកាន់តែលឿន និងឆាប់រហ័ស ហើយលុបបំបាត់នូវភាពអសកម្មទាំងឡាយ។

ជាមួយនឹងការបង្កើតមជ្ឈមណ្ឌលផ្តល់សេវាសាធារណៈទំនើបនេះ លោក ស៊ុន ចាន់ថុល បានអំពាវនាវប្រជាពលរដ្ឋទៅរកសេវាដោយផ្ទាល់ និងកុំពឹងពាក់អ្នកដទៃ ដែលនាំឱ្យខាតបង់ថវិកា។ លោកទេសរដ្ឋមន្ត្រី បានអំពាវនាវយ៉ាងដូច្នេះ «សូមអញ្ជើញទៅដូរបណ្ណបើកបរ ពន្យារបណ្ណបើកបរនៅផ្សារទំនើបអ៉ីអនទី១ អ៉ីអនទី២ នូរ៉ូនម៉ល នៅក្រសួងសាធារណការ និងដឹកជញ្ជូន កុំពឹងគេអ្នករត់ការឱ្យសោះ។ យើងខ្ញុំបម្រើប្រជារាស្ត្រដោយឥតគិតថ្លៃ អ៊ីចឹងសូមអ្នកព័ត៌មានជួយផ្សព្វផ្សាយ។ ប្រជាពលរដ្ឋមានបញ្ហាពាក់ព័ន្ធការកាត់ឈ្មោះ បាត់កាត់គ្រី បាត់ពែកមី ចង់ពន្យារបណ្ណបើកបរ ធ្វើបណ្ណបើកបរឆ្លងប្រទេស យើងខ្ញុំចេញឱ្យបាន។ យើងខ្ញុំមិនចង់ឱ្យប្រជាពលរដ្ឋទៅពឹងអ្នករត់ការ អ្នកគួកជេមកធ្វើបណ្ណបើកបរទេ»

ការធ្វើកំណែទម្រង់លើការផ្តល់សេវាសាធារណៈជាគោលនយោបាយមួយ ដែលរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានផ្តោតការយកចិត្តទុកដាក់ ហើយកំពុងនឹងធ្វើកំណែទម្រង់យ៉ាងយកចិត្តទុកដាក់បំផុត។

បើទោះបីរាជរដ្ឋាភិបាលបាននិងកំពុងប្រឹងប្រែងបែបនេះក្តី ក៏ការផ្តល់សេវាសាធារណៈមិនទាន់ល្អប្រសើរនៅឡើយនោះដែរ។ ក្រសួងសាធារណការ និងដឹកជញ្ជូន ត្រូវបានគេកត់សម្គាល់ឃើញបានធ្វើកំណែទម្រង់ជាច្រើនលើការផ្តល់សេវាសាធារណៈក្រោមសមត្ថកិច្ចរបស់ខ្លួន។

លោកទេសរដ្ឋមន្ត្រី ស៊ុន ចាន់ថុល ក្រោយចូលមកកាន់ក្រសួងសាធារណការ និងដឹកជញ្ជូននៅឆ្នាំ២០១៦ លោកបានដឹកនាំធ្វើកំណែទម្រង់លើការផ្តល់សេវានេះជាច្រើន។ ក្រៅតែពីការកសាងប្រព័ន្ធស្វ័យប្រវត្តកម្ម ដែលជាប្រព័ន្ធឱ្យប្រជាពលរដ្ឋអាចស្វែងរកសេវាតាមអនឡាញហើយនោះ លោក ស៊ុន ចាន់ថុល បានបង្កើតឱ្យមានកន្លែងផ្តល់សេវានៅផ្សារទំនើបចំនួន៣កន្លែងក្នុងរាជធានីភ្នំពេញ រួមមាន៖ ផ្សារទំនើបអ៉ីអនទី១ ផ្សារទំនើបអ៉ីអនទី២ និងផ្សារទំនើបនូរ៉ូម៉ល របស់ក្រុមហ៊ុនជីពម៉ុងផងដែរ។

លោកទេសរដ្ឋមន្ត្រី ស៊ុន ចាន់ថុល បានលើកឡើងថា ការផ្តល់សេវាលឿនរហ័ស និងមានតម្លាភាពជូនប្រជាពលរដ្ឋ គឺជាគោលបំណងដ៏ធំធេងរបស់សម្តេចតេជោ ហ៊ុន សែន។ ដូច្នេះអ្វីដែលលោកប្រឹងប្រែងធ្វើកំណែទម្រង់ផ្តល់សេវានេះ គឺជាការគោរពតាមអនុសាសន៍ណែនាំរបស់សម្តេចនាយករដ្ឋមន្ត្រី និងដើម្បីផ្តល់ទំនុកចិត្ត ក៏ដូចជាភាពជឿជាក់របស់ប្រជាពលរដ្ឋលើមន្ត្រីរាជរដ្ឋាភិបាលកម្ពុជា៕