(ភ្នំពេញ)៖ លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានប្រាប់បណ្តាញព័ត៌មាន Fresh News ឱ្យដឹងថា រយៈពេលមួយខែមកនេះ ចាប់តាំងពីអគ្គនាយកដ្ឋានគយប្រកាសឱ្យម្ចាស់រថយន្តចង្កូតឆ្វេង ដែលជ្រកក្រោមផ្លាកលេខផ្សេងៗ និងគ្មានពន្ធ និងរថយន្តចង្កូតស្តាំដែលគ្មានពន្ធ ឱ្យចូលបង់ពន្ធមកមានម្ចាស់រថយន្តប្រមាណ១៥០គ្រឿងហើយ បានចូលខ្លួនទៅបង់ពន្ធ និងទៅតំកល់ប្រាក់ពន្ធ ចំពោះរថយន្តចង្កូតស្តាំ។

លោកបន្ថែមថា តាមរយៈការមកបង់ពន្ធរបស់រថយន្តទាំងជាង១០០គ្រឿងនេះ អគ្គនាយកដ្ឋានគយ និងរដ្ឋាករកម្ពុជា ទទួលបានចំណូលជាង២.៤លានដុល្លារ។

លោកបានឱ្យដឹងទៀតថា តាមការប៉ាន់ស្មានរថយន្តចង្កូតឆ្វេង និងចង្កូតស្តាំដែលជ្រកក្រោមផ្លាកលេខផ្សេងៗ ដូចជាផ្លាកលេខ ខ.ម ផ្លាកលេខរដ្ឋ ផ្លាកលេខ ន.ប និងប្រភេទផ្លាកលេខស៊ីវិល ទាំងរថយន្តទេសចរណ៍ រថយន្តដឹកទំនិញ រថយន្តដឹកដី មានប្រមាណជិតមួយម៉ឺនគ្រឿង។ រថយន្តទាំងនោះ នឹងត្រូវបង់ពន្ធខុសៗគ្នាទៅតាមប្រភេទ និងស៊េរីឆ្នាំ ដែលអត្រាពន្ធត្រូវបង់ខ្ពស់បំផុត១៣០%។

«រថយន្តប្រភេទដឹកទំនិញ អត្រាពន្ធវាមិនខ្ពស់ប៉ុន្មានទេ វាទាបទេ តែសម្រាប់រថយន្តទេសចរណ៍ក៏អត្រាពន្ធខុសគ្នាដែរ ស៊ីសងទៅនឹងប្រភេទរថយន្ត មានខ្លះវាប្រណិត ពួកប្រណិតអត្រាវាខ្ពស់។ តម្លៃគិតពន្ធក៏ខុសគ្នាដែរ រថយន្តថ្មីស៊េរីឆ្នាំ២០១៩, ២០២០ វាថ្លៃ ប៉ុន្តែរថយន្តដែលចាស់ ២០១៥, ២០១០ ២០០៥ ក៏វាថោកទៅតាមហ្នឹងដែរ អីចឹងបន្ទុកពន្ធក៏ខុសគ្នាទៅតាមហ្នឹងដែរ»។ លោក គុណ ញឹម បានពន្យល់បន្ថែម។

កាលពីថ្ងៃទី៩ ខែកញ្ញា ឆ្នាំ២០២១ អគ្គនាយកដ្ឋានគយនិងរដ្ឋាករ បានដាក់ចេញគោលការណ៍៥ចំណុច ដើម្បីប្រមូលពន្ធលើយានយន្ត ដែលគ្មានពន្ធ និងអាករនាំចូលស្របតាមច្បាប់ ស្តីពីគយ។

លោក គុណ ញឹម បន្តថា សម្រាប់រថយន្តដែលប្រើប្រាស់ក្នុងលក្ខណៈឯកជន ហើយទៅជ្រកក្រោមផ្លាកលេខផ្សេងៗ បន្ទាប់ពីចូលបង់ពន្ធរួច នឹងទទួលបានបង្កាន់ដៃ ដើម្បីយកទៅធ្វើផ្លាកលេខនៅក្រសួងសាធារណការ និងដឹកជញ្ជូន ដើម្បីប្រើប្រាស់ផ្លាកលេខស្របតាមវិញ។

អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី៨ ខែតុលា ឆ្នាំ២០២១ បានអំពាវនាវជាថ្មីម្តងទៀតឱ្យម្ចាស់រថយន្តចង្កូតឆ្វេង ដែលជ្រកក្រោមផ្លាកលេខផ្សេងៗ និងគ្មានពន្ធ និងរថយន្តចង្កូតស្តាំដែលគ្មានពន្ធ ចូលបំពេញកាតព្វកិច្ចពន្ធ ឱ្យបានយ៉ាងយូរថ្ងៃទី៣១ ខែធ្នូ ឆ្នាំ២០២១ ដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន ១០%។ ជាមួយគ្នានេះរថយន្តចង្កូតស្តាំត្រូវកែចង្កូតពីស្តាំ មកឆ្វេងឱ្យបានរួចរាល់យ៉ាងយូរត្រឹមថ្ងៃទី៣០ ខែមិថុនា ឆ្នាំ២០២២។

អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០២២ រថយន្តចង្កូតឆ្វេងគ្មានពន្ធនឹងត្រូវឲ្យបង់ពន្ធអាករពេញលេញ ដោយពុំមានការអនុគ្រោះបន្ធូរបន្ថយពន្ធ និងអាករទៀតឡើយ។ នៅពេលផុតឱសានវាទ គឺចាប់ពីថ្ងៃទី០១ ខែកក្កដា ឆ្នាំ២០២២តទៅ រថយន្តគ្មានពន្ធនឹងរងនូវការបង្ក្រាបយ៉ាងតឹងរ៉ឹងនិងម៉ឺងម៉ាត់ ហើយរថយន្តចង្កូតស្តាំ ក្រោយបង្ក្រាបបានត្រូវដោះបំបែកជាគ្រឿងបន្លាស់ ឬកំទេចចោល។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី០៨ ខែតុលា ឆ្នាំ២០២១ បានណែនាំឲ្យក្រសួងស្ថាប័នទាំងអស់ ត្រូវចូលរួមអនុវត្តច្បាប់ឱ្យបានម៉ឺងម៉ាត់ ដើម្បីបញ្ចប់បញ្ហារថយន្តមិនបង់ពន្ធ និងអាករនាំចូល និងរថយន្តចង្កូតស្តាំខុសច្បាប់ ដែលជាបញ្ហាច្រំដែល ចាប់ពីថ្ងៃទី១ ខែកក្កដា ឆ្នាំ២០២២។ នេះបើតាមសេចក្តីប្រកាសព័ត៌មានរបស់ ទីស្តីការគណៈរដ្ឋមន្ត្រី។

សេចក្តីប្រកាសព័ត៌មានបានដកស្រង់ប្រសាសន៍របស់សម្តេចតេជោថា «ចាប់ពីថ្ងៃទី១ ខែមករា ឆ្នាំ២០២២ តទៅ រថយន្តគ្មានពន្ធ និងអាករមិនអាចចរាចរលើដងផ្លូវបានឡើយ គឺជារថយន្តខុសច្បាប់ ដែលនឹងត្រូវរងវិធានការយ៉ាងតឹងរ៉ឹង និងម៉ឺងម៉ាត់បំផុត»

សម្តេចតេជោបានសង្កត់ធ្ងន់បញ្ជាក់ថា ក្នុងករណីចាំបាច់ ប្រសិនបង្ក្រាបបានរថយន្តសេរីទំនើបគ្មានពន្ធ ដែលម្ចាស់ជាមេទ័ព មេប៉ូលីស ឬជាអ្នកធំក្នុងជួររាជរដ្ឋាភិបាល តំណាងរាស្ត្រ និងសមាជិកព្រឹទ្ធសភាជាដើម ដែលមិនគោរពច្បាប់ និងបន្តប្រើប្រាស់រថយន្តនោះ ត្រូវរាយការណ៍អំពីអត្តសញ្ញាណម្ចាស់រថយន្តជូនសម្តេច ដើម្បីសម្តេចមានវិធានការដកមុខតំណែង និងបណ្ដេញចេញពីគណបក្សថែមទៀត៕