(បន្ទាយមានជ័យ)៖ លោក ស សុខា រដ្ឋលេខាធិការក្រសួងអប់រំ យុវជន និងកីឡា និងលោកស្រី កែ សួនសូភី បានអញ្ជើញជាអធិបតីភាពសម្ពោធដាក់ឱ្យប្រើប្រាស់ជាផ្លូវការនូវវិថី «ឯកឧត្តម ស សុខា និងលោកជំទាវ កែ សួនសុភី» និងសមិទ្ធផលនានា នៅសកលវិទ្យាល័យមានជ័យ។

ពិធីសម្ពោធដាក់ឱ្យប្រើប្រាស់វិថី «ឯកឧត្តម ស សុខា និងលោកជំទាវ កែ សួនសុភី» និងសមិទ្ធផលនានា នៅសកលវិទ្យាល័យមានជ័យនេះ បានធ្វើឡើងនាថ្ងៃទី១៨ ខែវិច្ឆិកា ឆ្នាំ២០២១ ដោយមានការអញ្ជើញចូលរួមពីណាក់លោក ខេង ស៊ុ ប្រធានក្រុមប្រឹក្សាខេត្ត លោក អ៊ុ រាត្រី អភិបាលខេត្តបន្ទាយមានជ័យ នាព្រឹកថ្ងៃទី១៨ ខែវិច្ឆិកា ឆ្នាំ២០២១ ម្សិលមិញ។

សម្រាប់សមិទ្ធផលនានាដែលដាក់សម្ពោធនាឱកាសនោះរួមមាន៖ វិថី ឯកឧត្តម ស សុខា និងលោកជំទាវ កែ សួនសុភី ធ្វើពីបេតុង មានប្រវែង ១៨១,៣ម៉ែត្រ ទទឹង ១២ម៉ែត្រ, ផ្លូវបេតុង ១ខ្សែ ប្រវែង ១៦០ម៉ែត្រ ទទឹម ៦ម៉ែត្រ, តារាងបាល់ទាត់ស្តង់ដា, សាលប្រជុំធំ, ដំបូលបណ្ណាល័យ, បុស្បុកព្រះបាទជ័យវរ្ម័នទី៧, រូបសំណាកសម្តេចព្រះសង្ឃរាជ ជួន ណាត, អាងហែលទឹក, សួនសាមគ្គី, បង្គោលភ្លើងសឡា, របងថ្មអគារអន្តេវាសិកដ្ឋាននារី, ស្រះចិញ្ចឹមត្រី, ខ្លោងទ្វារ និងស្លាកឈ្មោះ ដែលចំណាយអស់ថវិកាសរុប ចំនួន ២៦៧ ៨៦៣ (ពីរសែនប្រាំមួយម៉ឺនបីពាន់ប្រាំបីរយហុកសិបបីដុល្លារសហរដ្ឋអាមេរិក)។

សមិទ្ធផលទាំងនេះ កសាង និងជួសជុលឡើងដើម្បីអភិវឌ្ឍហេដ្ឋារចនាសម្ព័ន្ធ បង្កើនសោភ័ណភាព និងបំពេញតម្រូវការរបស់សិស្ស និស្សិត ដែលបាននឹងកំពុងសិក្សា និងមានបំណងចូលសិក្សានៅសាកលវិទ្យាល័យជាតិមានជ័យ ដែលជាសាកលវិទ្យាល័យរដ្ឋតែមួយគត់ក្នុងទឹកដីខេត្តបន្ទាយមានជ័យ។

នាឱកាសនោះដែរ លោក ស សុខា បានថ្លែងថា បន្ទាប់ការគ្រប់គ្រងនិងរចនាសម្ព័ន្ធ ត្រូវបានកែទំរង់និងបំពាក់សម្ភារក្នុងបន្ទប់ពិសោធន៍ ដើម្បីឱ្យស្របតាមស្តង់ដានៃក្រសួងអប់រំ ក៏ដូចជាភាពរីកចម្រើនលើគ្រប់វិស័យរបស់រាជរដ្ឋាភិបាល MCU ពិតជាបានផ្ដល់ចំណេះដឹងពិតជូននិស្សិតគ្រប់ជំនាញ។

លោក ស សុខា ក៏បានផ្ដាំផ្ញើរដល់សូមពុកម៉ែបងប្អូននិស្សិត លោកសាស្រ្តាចារ្យទាំងអស់ ចូលរួមធ្វើអនាម័យឱ្យបានគ្រប់គ្នាអនុវន្តនូវវិធានការ «៣ការពារ និង៣កុំ» ឱ្យបានខ្ជាប់ខ្ជួន ដើម្បីការពារខ្លួនពីជំងឺកូវីដ១៩ ហើយក៏ត្រូវរៀនរស់ក្នុងបរិបទកូវីដ១៩ ផងដែរ៕