(ព្រះសីហនុ)៖ រយៈពេលប្រមាណ ១១ខែ ឆ្នាំ២០២១ មន្ត្រីបានរកឃើញរថយន្តដឹកទំនិញចំនួន ៤៦៤គ្រឿង ខុសលក្ខណៈបច្ចេកទេស ក្នុងចំណោមរថយន្តដែលបានត្រួតពិនិត្យ ១៤,៩៣៧គ្រឿង នៅកំពង់ផែក្រុងព្រះសីហនុ។ រថយន្តខុសលក្ខណៈបច្ចេកទេសជិត ៥០០គ្រឿង រងការផាកពិន័យជាប្រាក់ជិត ៣០០លានរៀល។
រថយន្តដឹកជញ្ជូនទំនិញខុសលក្ខណៈបច្ចេក គឺជាមូលហេតុមួយដែលនាំឱ្យប្រឈមនឹងគ្រោះថ្នាក់ចរាចរណ៍លើដងវិថីធ្ងន់ធ្ងរផងដែរ។ ក្រសួងសាធារណការ និងដឹកជញ្ជូន នគរបាលចរាចរណ៍ផ្លូវគោក និងអាជ្ញាធរពាក់ព័ន្ធ បានធ្វើសកម្មភាពយ៉ាងសស្រាក់សស្រាំក្នុងការទប់ស្កាត់រថយន្តដឹកជញ្ជូនខុសលក្ខណៈបច្ចេកទេសនេះ។ ការទប់ស្កាត់រថយន្តខុសលក្ខណៈបច្ចេកទេសនៅដើមទីតាមកំពង់ផែ គឺជាយន្តការមួយ ដែលគេមើលឃើញថា មានប្រសិទ្ធភាពខ្ពស់ក្នុងការលុបបំបាត់រថយន្តខុសលក្ខណៈបច្ចេកទេស។
នៅថ្ងៃទី១១ ខែធ្នូ ឆ្នាំ២០២១ នៅ កំពង់ ផែ ស្វយ័ត ក្រុងព្រះសីហនុ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារ ត្រួតពិនិត្យ រឹត បន្តឹង ការអនុវត្តច្បាប់ស្តីពីចរាចរណ៍ផ្លូវគោកនៅគោលដៅដើមទី បានដឹកនាំក្រុមការងារដែលរួមមាន លោក ឯក រដ្ឋ អនុរដ្ឋលេខាធិការ លោក គឹម សាន់ អនុរដ្ឋលេខាធិការ នាយឧត្តមសេនីយ៍ ហ៉ឹម យ៉ាន អគ្គស្នងការរងនគរបាលជាតិ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក លោក តាំង ពៅ អនុប្រធាននាយកដ្ឋានដឹកជញ្ជូនផ្លូវគោក លោកប្រធានមន្ទីរសាធារណការ និងដឹកជញ្ជូនខេត្តព្រះសីហនុ និងមន្ត្រីជំនាញ ចុះ ត្រួត ពិនិត្យលក្ខណៈបច្ចេកទេសយានយន្ត និងបណ្ណបើកបររបស់អ្នកបើករថយន្តដឹកទំនិញចេញ-ចូល កំពង់ផែស្វយ័តក្រុងព្រះសីហនុ។
ការចុះត្រួតពិនិត្យនេះ មានគោលបំណងពង្រឹងការអនុវត្តច្បាប់ស្តីពីចរាចរណ៍ផ្លូវគោក និងត្រួតពិនិត្យ លក្ខណៈបច្ចេកទេសយានយន្តដឹកជញ្ជូនទំនិញកុងតឺន័រ ត្រួតពិនិត្យសុវត្ថិភាពយានយន្ត នៅគោល ដៅ ដើមទីកំពង់ផែស្វយ័តក្រុងព្រះសីហនុ ជាពិសេសអប់រំអ្នកបើកបរយានយន្តដឹកទំនិញកុងតឺន័រ ឱ្យមានការ ភ្ញាក់រលឹកចូលរួមគោរពច្បាប់ស្តីពីចរាចរណ៍ផ្លូវគោក ដើម្បីរួមចំណែកទប់ស្កាត់ និងកាត់បន្ថយគ្រោះ ថ្នាក់ ចរាចរណ៍ ដែលបង្កមកពីយានយន្តដឹកកុងតឺន័រ។
ទាក់ទងនឹងការត្រួតពិនិត្យលក្ខណៈបច្ចេកទេសយានយន្ត លោក សេង ឈួន បានឱ្យដឹងថា យានយន្តកុងតឺន័រមួយចំនួនត្រូវបានរកឃើញមានបញ្ហាបច្ចេកទេស និងប្រើប្រាស់ឯកសារមិនត្រឹមត្រូវដែលក្នុងនោះរួមមានដូចជា គន្លឹះកុងតឺន័រខូច ឬមិនដំណើរការ សម្បកកង់រថយន្តសឹកខ្លាំង ការប្រើប្រាស់ បណ្ណបើកបរខុសប្រភេទយាន និងវិញ្ញាបនបត្រត្រួតលក្ខណៈបច្ចេកទេស របស់រថយន្ត ហួស សុពលភាព ជាដើម។
លោក សេង ឈួន បានអំពាវនាវឱ្យអ្នកបើកបរយានយន្តដឹកកុងតឺន័រទាំងអស់ គោរពច្បាប់ស្តីពីចរាចរណ៍ ផ្លូវគោក អនុវត្តលក្ខខណ្ឌបច្ចេកទេសយានយន្តឱ្យបានខ្ជាប់ខ្ជួន។ ជាពិសេសត្រូវប្រើប្រាស់បណ្ណបើកបរ ឱ្យបានត្រឹមត្រូវតាមប្រភេទយានដែលខ្លួនបើកបរ ធ្វើយ៉ាងណាដើម្បីជៀសវាងគ្រោះថ្នាក់ចរាចរណ៍ ជាយថាហេតុ ដែលបង្កពីការធ្វេសប្រហែស មិនយកចិត្តទុកដាក់ មិនគោរពអាយុជីវិតខ្លួនឯង និងអ្នកដទៃ៕
