(ភ្នំពេញ)៖ រដ្ឋមន្ត្រីពាណិជ្ជកម្មរបស់កម្ពុជា និងប្រទេសឥណ្ឌូនេស៊ី បានសន្យាថា នឹងរួមគ្នាពង្រឹងពង្រីកកិច្ចសហប្រតិបត្តិការផ្នែកពាណិជ្ជកម្ម និងសេដ្ឋកិច្ចរវាងកម្ពុជា និងឥណ្ឌូនេស៊ី ឱ្យកាន់តែល្អប្រសើរថែមទៀត។
កិច្ចសន្យានេះបានធ្វើឡើងក្នុងជំនួបពិភាក្សាការងាររវាង លោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្មកម្ពុជា ជាមួយលោក Muhammad Lutfi រដ្ឋមន្ត្រីក្រសួងពាណិជ្ជកម្មឥណ្ឌនេស៊ី តាមប្រព័ន្ធវីដេអូ កាលពីថ្ងៃទី២២ ខែមេសា ឆ្នាំ២០២២។
ក្នុងជំនួបនោះ លោករដ្ឋមន្ត្រី ប៉ាន់ សូរស័ក្តិ បានសម្តែងមតិស្វាគមន៍យ៉ាងកក់ក្តៅ និងថ្លែងអំណរគុណជូនចំពោះ លោក Muhammad Lutfi និងសហការី ដែលបានផ្តល់កិច្ចសហការ និងការគាំទ្រក្នុងអំឡុងពេលនៃកិច្ចប្រជុំនានាដែលកម្ពុជាធ្វើជាប្រធានដឹកនាំកន្លងមក តួយ៉ាងដូចជា កិច្ចប្រជុំចង្អៀតថ្នាក់ឧត្តមមន្ត្រីសេដ្ឋកិច្ចអាស៊ាន កិច្ចប្រជុំលើកទី១នៃឧត្តមមន្ត្រីសេដ្ឋកិច្ចអាស៊ាន ពិសេសកិច្ចប្រជុំចង្អៀតថ្នាក់រដ្ឋមន្រ្តីសេដ្ឋកិច្ចអាស៊ានលើកទី២៨ (28th AEM Retreat) កាលពីមីនាកន្លងទៅ ដែលបានប្រព្រឹត្តទៅប្រកបដោយជោគជ័យនិងផ្លែផ្កា។
លោករដ្ឋមន្ត្រីបន្តថា ភាគីទាំងពីរបានពិភាក្សា និងផ្លាស់ប្តូរយោបល់លើយន្តការ និងគំនិតផ្តួចផ្តើមថ្មីៗ និងមានស្រាប់នានា ក្នុងគោលបំណងជំរុញការពង្រីកទំហំពាណិជ្ជកម្មកម្ពុជា-ឥណ្ឌូនេស៊ី ឱ្យរឹតតែប្រសើរទ្បើងបន្ថែមទៀត។ បន្ថែមពីនេះ លោករដ្ឋមន្ត្រី បានគូសបញ្ជាក់អំពីសារៈសំខាន់នៃការជំរុញការធ្វើពាណិជ្ជកម្មក្នុងតំបន់អាស៊ាន (ASEAN Intratrade) ចំពោះទំនិញសក្តានុពលនានារបស់រដ្ឋជាសមាជិកអាស៊ាន សំដៅពន្លឿនការស្តារទ្បើងវិញនូវសេដ្ឋកិច្ចតំបន់។ ក្នុងនោះ កិច្ចពិភាក្សា ក៏បានផ្តោតសំខាន់លើការរៀបចំកិច្ចប្រជុំពិសេសថ្នាក់រដ្ឋមន្រ្តីសេដ្ឋកិច្ចអាស៊ាន (AEM Special Meeting) ដែលគ្រោងនឹងប្រព្រឹត្តទៅក្នុងខែឧសភា ឆ្នាំ២០២២ ខាងមុខនេះ នៅទីក្រុងបាលី ប្រទេសឥណ្ឌូនេស៊ី ផងដែរ។
ជាការឆ្លើយតប លោករដ្ឋមន្ត្រីក្រសួងពាណិជ្ជកម្មឥណ្ឌូនេស៊ី បានផ្តល់ការគាំទ្រយ៉ាងពេញលេញ និងត្រៀមផ្តល់កិច្ចសហប្រតិបត្តិការកាន់តែជិតស្និទ្ធបន្ថែមទៀត ក្នុងការពង្រឹងកិច្ចសហប្រតិបត្តិការពាណិជ្ជកម្មកម្ពុជា-ឥណ្ឌូនេស៊ី ជាពិសេសការគាំទ្រដល់កម្ពុជាក្នុងនាមជាប្រធានអាស៊ានឆ្នាំ២០២២។
លោករដ្ឋមន្រ្តី Muhammad Lutfi បញ្ជាក់ថា លោកយល់ស្រប និងគាំទ្រផងដែរ ចំពោះយន្តការជំរុញការធ្វើពាណិជ្ជកម្មក្នុងតំបន់អាស៊ាន ដើម្បីអាចប្រើប្រាស់ពាណិជ្ជកម្មអាស៊ានឱ្យសក្តានុពល ដោយផ្អែកលើគោលការណ៍មជ្ឍភាពអាស៊ាន។
លោក ប៉ាន សូរស័ក្តិ និងលោក Muhammad Lutfi បានបញ្ជាក់សារជាថ្មីនូវការប្តេជ្ញាចិត្ត លើកកម្ពស់កិច្ចសហប្រតិបត្តិទ្វេភាគីបន្ថែមទៀតលើវិស័យសេដ្ឋកិច្ច-ពាណិជ្ជកម្ម និងជាពិសេសការសម្រេចបាននូវសមិទ្ធផលអាទិភាពសេដ្ឋកិច្ចក្នុងឆ្នាំ២០២២ និងអាទិភាពការងារប្រចាំឆ្នាំ២០២២ ក្រោមសសរស្ដម្ភសហគមន៍សេដ្ឋកិច្ចអាស៊ាន ក្នុងអំឡុងពេលដែលកម្ពុជាធ្វើជាប្រធានអាស៊ានក្នុងឆ្នាំ២០២២ នេះ៕
