(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសំណូមពរដល់ បក្សនយោបាយ និងសង្គមស៊ីវិលមួយចំនួន កុំឱ្យចាត់ទុកទង្វើរបស់រាជរដ្ឋាភិបាល ក្នុងការជួយដល់ប្រជាពលរដ្ឋកន្លងមក ជាការទាក់ទាញសន្លឹកឆ្នោត សម្រាប់ឆ្នាំ២០២៣ ខាងមុខនេះ។
ថ្លែងក្នុងពិធីបើកសន្និសីទ «ចក្ខុវិស័យប្រទេសកម្ពុជាឆ្នាំ២០២២» ពិភាក្សាពីការស្តារកម្ពុជាក្រោយវិបត្តិជំងឺកូវីដ១៩ នាព្រឹកថ្ងៃទី០៦ ខែតុលា ឆ្នាំ២០២២នេះ សម្តេចតេជោ ហ៊ុន សែន បានរំលឹកអំពីការឧបត្ថម្ភសាច់ប្រាក់ ដល់ប្រជាពលរដ្ឋ ដែលរងគ្រោះដោយកូវីដ១៩ និងពលរដ្ឋក្រីក្រ។ សម្តេចក៏បានរំលឹកអំពីការខិតខំរបស់រាជរដ្ឋាភិបាល ក្នុងការស្វះស្វែងរកវ៉ាក់សាំង មកចាក់ជូនពលរដ្ឋឥតគិតថ្លៃផងដែរ។
សម្តេចបានលើកឡើងដូច្នេះថា «ខ្ញុំក៏សូមសំណូមពរ ឱ្យបណ្តាបក្សនយោបាយសង្គមស៊ីវិល យោគយល់ចំពោះរាជរដ្ឋាភិបាល កុំចាត់ទុកថា ការធ្វើរបស់រាជរដ្ឋាភិបាលគឺជាល្បែងដើម្បីទាញយកសន្លឹកឆ្នោត នៅឆ្នាំ២០២៣ខាងមុខ»។
សម្តេចសង្ឃឹមថា ប្រជាពលរដ្ឋដែលរាជរដ្ឋាភិបាល បានជួយកន្លងទៅនេះ ទទួលបានផលប្រយោជន៍ពិតប្រាកដ ហើយបានបញ្ជាក់ថា នេះមិនមែនជាបញ្ហាលេងសើចសម្រាប់នយោបាយនោះទេ ប៉ុន្តែជាការទទួលខុសត្រូវធំរបស់រាជរដ្ឋាភិបាល សម្រាប់ប្រទេសជាតិ៕
