(ភ្នំពេញ)៖ នៅព្រឹកថ្ងៃអាទិត្យ ទី២៧ ខែវិច្ឆិកា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បន្តបង្ហាញឈុតសម្តែង នៅក្នុងភាពយន្តកូនប្រុសក្រោមពន្លឺព្រះចន្ទពេញបូណ៌មី។ ឈុតសម្តែងដែលបានបង្ហាញនេះ គឺនៅត្រង់វគ្គមេបញ្ជាការ «សំរេច» ត្រូវបានអ្នកគ្រូពេទ្យរ៉ានី កុហក។

ត្រង់វគ្គនេះ ជារាត្រីមួយដែលមេបញ្ជាការ «សំរេច» បានទៅជួបអ្នកគ្រូពេទ្យរ៉ានី កំពុងអង្គុយលើផ្ទះធ្វើការក្រោមពន្លឺចង្កៀងផ្លុងៗ មុខបែរទៅជញ្ជាំងផ្ទះ ហើយខ្នងបែរមកខាងក្រៅ។

ក្នុងស្ថានភាពបែបនេះលោកមេបញ្ជារូបសង្ហា មិនបានឃើញសម្រស់អ្នកគ្រូពេទ្យក្រមុំដ៏ស្រស់សោភានោះឡើយ។ ពេលនោះលោកមេបញ្ជាការវ័យក្មេង បានសួររកមេបញ្ជាការសារឿន ព្រមជាមួយគ្នាលោកមេបញ្ជាការ ក៏បានសួររកអ្នកគ្រូពេទ្យរ៉ានីផងដែរ។

សួររកអ្នកគ្រូពេទ្យរ៉ានី ព្រោះលោកមេបញ្ជាការចង់ស្គាល់អ្នកគ្រូពេទ្យ ដែលគេតែងតែចំអន់ និងផ្គូរផ្គងដាក់នោះ។ ពេលឮលោកមេបញ្ជាការសួររកឈ្មោះអ្នកគ្រូពេទ្យរ៉ានី, អ្នកគ្រូពេទ្យក្រមុំដ៏ស្រស់សោភា មិនបានឆ្លើយប្រាប់ត្រង់នោះទេ។ បែរជាកុហកលោកមេបញ្ជាការថា អ្នកគ្រូពេទ្យរ៉ានី ចុះទៅកំពង់ទឹកទៅវិញ។

សូមបញ្ជាក់ថា ឈុតសម្តែងនៅក្នុងភាពយន្តកូនប្រុសក្រោមពន្លឺព្រះចន្ទពេញបូណ៌មី ចំនួន៧ឃ្លីបហើយត្រូវបានសម្តេចតេជោ បង្ហាញជាសាធារណៈ។ ឈុតសម្តែងដែលសម្តេចតេជោទម្លាយ ទទួលបានការចាប់អារម្មណ៍ជាខ្លាំងពីសាធារណជន។

ភាពយន្តភាគរឿងកូនប្រុសក្រោមពន្លឺព្រះចន្ទពេញបូណ៌មី ជាភាពយន្តទាក់ទិនទៅ​និងដំណើរជីវិតពិត​របស់សម្តេច និងសម្តេចកិត្តិព្រឹទ្ធបណ្ឌិត ក្នុងសម័យសង្គ្រាម លន់ នល់ រដ្ឋប្រហារទម្លាក់សម្តេចព្រះនរោត្តមសីហនុ ព្រះបរមរតនកោដ្ឋ ការរត់ចូលព្រៃម៉ាកគី សម័យកាលនៃរបបប្រល័យពូជសាសន៍ ប៉ុល ពត ការឆ្លងដែនចូលទៅកាន់ប្រទេសវៀតណាម ដើម្បីស្វែងរកកម្លាំងអ្នក​ស្នេហាជាតិ មករំដោះប្រទេសចេញ ពីរបបប៉ុលពត ការជួបជុំភរិយាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្រោយថ្ងៃរំដោះ៧មករា ឆ្នាំ១៩៧៩។ ជាពិសេសទាក់ទិនទៅ​និងជីវិតពិតរបស់សម្តេចផ្ទាល់ ចាកចេញពីមាតាបិតាបងប្អូនបង្កើតរបស់សម្តេចពីភូមិកំណើត មកស្វែងរកការសិក្សារៀនសូត្រ នៅរាជធានីភ្នំពេញ ការស្នាក់នៅ​អាស្រ័យជាមួយ​ព្រះសង្ឃក្នុងវត្តនាគវ័ន្ត។

ភាពយន្តមានប្រមាណ ៥២ភាគ។ ក្រុមការងារផលិតភាពយន្តនេះ បានជ្រើសរើសតួសំដែងសំខាន់ៗចំនួន ១០៣នាក់ តួប្រជាជនយ៉ាងតិច ៥០០នាក់ ព្រមទាំងកងកម្លាំង ៥០០នាក់ផ្សេងទៀត ដើម្បីចូលរួមសំដែងក្នុងឈុតឆាកធំៗ។ ភាពយន្តនេះគ្រោងប្រើពេលថតប្រមាណ ១២ខែកន្លះយ៉ាងតិច ហើយការកាត់តដំឡើងរូបភាព និងត្រូវបញ្ចប់មុនពាក់កណ្តាលឆ្នាំ២០២៣ខាងមុខ។

សម្តេចតេជោ ហ៊ុន សែន ធ្លាប់បានបញ្ជាក់ថា ភាពយន្តដែលទាក់ទងទៅនឹងព្រឹត្តិការណ៍ប្រវត្តិសាស្ត្រជាតិនេះ គ្រោងចំណាយថវិកាសម្រាប់ផលិតប្រមាណជា ៦លានដុល្លារអាមេរិក។ បច្ចុប្បន្នថតបានប្រមាណជា ៣០ភាគរយហើយ។ ថវិកាដែលចំណាយថតភាពយន្តនេះ មិនមែនជាថវិកាជាតិនោះឡើយ៕