(ភ្នំពេញ)៖ លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងថា ឯករាជ្យរបស់ គ.ជ.ប ត្រូវផ្អែកលើច្បាប់ អនុវត្តឱ្យបានត្រឹមត្រូវតាមច្បាប់កំណត់ ដូចនេះមន្តី្របោះឆ្នោត គ្រប់លំដាប់ថ្នាក់ទាំងអស់ ត្រូវខិតខំពង្រឹងការអនុវត្តច្បាប់បោះឆ្នោត និងបទបញ្ជា និងនីតិវិធីនៃការបោះឆ្នោតឱ្យមានប្រសិទ្ធភាព។

លោកប្រធានថ្លែងបែបនេះ នាព្រឹកថ្ងៃព្រហស្បតិ៍ ទី៩ ខែកុម្ភៈ ឆ្នាំ២០២៣ នៅសាលប្រជុំរបស់ គ.ជ.ប ក្នុងកិច្ចប្រជុំពិនិត្យ និងសម្រេចលើឯកសារមួយចំនួន ពាក់ព័ន្ធនឹងការប្រឡងជ្រើសរើសមន្ត្រីជាប់កិច្ចសន្យារយៈពេលខ្លី ឯកសារពាក់ព័ន្ធនឹងការដាក់ពាក្យសុំចុះឈ្មោះជាអ្នកសារព័ត៌មាន សេចក្តីណែនាំពាក់ព័ន្ធនឹងការបោះឆ្នោត និងការផ្តល់សុពលភាពលើបញ្ជីបោះឆ្នោតផ្លូវការ ឆ្នាំ២០២២។

បើតាមលោក ប្រាជ្ញ ចន្ទ គ.ជ.ប ក៏ត្រូវអនុវត្តក្នុងការផ្ដល់សេវាជូនគ្រប់ភាគីពាក់ព័ន្ធឱ្យបានល្អ និងស្មើភាពគ្នាផងដែរ។

បន្ទាប់ពីបានពិនិត្យ និងពិភាក្សាយ៉ាងល្អិតល្អន់លើឯកសារម្តងមួយៗរួចមក អង្គប្រជុំ គ.ជ.ប បានសម្រេចកែសម្រួលខ្លឹមសារមួយចំនួន និងបានឯកភាពជាគោលការណ៍ លើឯកសារទាំងនោះរួមមាន៖

១៖ ឯកសារសម្រាប់ការប្រឡងជ្រើសរើសមន្ត្រីជាប់កិច្ចសន្យារយៈពេលខ្លី ចំនួន ៨១៤ រូប ឱ្យបម្រើការងារនៅតាមលេខាធិការដ្ឋាននៃគណៈកម្មការរាជធានី ខេត្តរៀបចំការបោះឆ្នោត (លគធ.ខប) ទាំង ២៥ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលរួមមាន៖

* សេចក្តីជូនដំណឹងជ្រើសរើសផ្សព្វផ្សាយតាមប្រព័ន្ធផ្សព្វផ្សាយព័ត៌មាន
* សេចក្តីជូនដំណឹង ស្ដីពីលក្ខខណ្ឌជ្រើសរើសមន្ត្រីជាប់កិច្ចសន្យារយៈពេលខ្លី
* លិខិតជម្រាបជូនលោក លោកស្រី ប្រធានលេខាធិការដ្ឋានរៀបចំការបោះឆ្នោត
* សេចក្តីសម្រេច ស្តីពីការបង្កើតគណៈកម្មការរៀបចំការប្រឡង
* សេចក្តីណែនាំ ស្តីពីនីតិវិធីប្រឡង
* បទបញ្ជាផ្ទៃក្នុងសម្រាប់ការប្រឡង
* ប្រតិទិននៃការប្រឡងជ្រើសរើសមន្ត្រីលេខាធិការដ្ឋាននៃគណៈកម្មការរាជធានី ខេត្តរៀបចំការបោះឆ្នោត (លគធ.ខប)។

២៖ ឯកសារពាក់ព័ន្ធនឹងការដាក់ពាក្យសុំចុះឈ្មោះជាអ្នកសារព័ត៌មាន៖

* សេចក្ដីជូនដំណឹង ស្ដីពីការដាក់ ការទទួលពាក្យសុំចុះឈ្មោះអ្នកសារព័ត៌មានជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣
* ទម្រង់ពាក្យស្នើសុំចុះឈ្មោះជាអ្នកសារព័ត៌មាន
* ប្រវត្តិរូបសង្ខេបអ្នកសារព័ត៌មានជាតិ និងអន្តរជាតិ (ភាសាខ្មែរ និងអង់គ្លេស)។

៣៖ ខិត្តបណ្ណសេចក្ដីណែនាំ ស្ដីពីការបោះឆ្នោតបាន ឬការបោះឆ្នោតពុំបាន សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។

៤៖ សេចក្ដីសម្រេច ស្ដីពីការផ្ដល់សុពលភាព និងដាក់ឱ្យប្រើប្រាស់បញ្ជីបោះឆ្នោតផ្លូវការ ឆ្នាំ២០២២ ដែលមានឈ្មោះអ្នកបោះឆ្នោតសរុបចំនួន ៩.៧១០.៦៥៥នាក់ ស្មើនឹង ៨៩,២៨% ធៀបនឹងចំនួនប្រជាពលរដ្ឋដែលមានអាយុ ១៨ឆ្នាំឡើង។ បញ្ជីបោះឆ្នោតផ្លូវការ ឆ្នាំ២០២២ នឹងប្រកាសផ្សព្វផ្សាយជាផ្លូវការនៅថ្ងៃទី២១ ខែកុម្ភៈ ឆ្នាំ២០២៣៕