(ភ្នំពេញ)៖ ក្រុមហ៊ុនចិនដ៏ធំមួយឈ្មោះ Skylar ដែលធ្វើការសាងសង់ខុនដូកំពស់២៨ជាន់ នៅក្បែរក្រសួងមហាផ្ទៃ ត្រូវបានម្ចាស់ផ្ទះជាប់ព្រំដាក់ពាក្យបណ្ដឹង ទៅក្រសួងរៀបចំដែនដីនគរូបនីយកម្ម និង​សំណង់ សូមឲ្យជួយទប់ស្កាត់ផ្អាក​ការសាងសង់​ជាបណ្ដោះ អាសន្នដើម្បីធ្វើការ​ត្រួតពិនិត្យ​លក្ខណៈ​បច្ចេកទេស​ឡើងវិញ នៅពេលដែលក្រុមហ៊ុននេះ​ជីកដីលុង​ចុះក្រោមជំរៅជិត​១០ម៉ែត្រ​ធ្វើឲ្យមាន​ការប្រេះ​ស្រាំផ្ទះ​អ្នកជិតខាង ហើយមិនចេញមុខ​ទទួលខុសត្រូវ ផ្ដល់សំណងដល់ភាគីម្ចាស់ផ្ទះរងគ្រោះ។

ការដ្ឋានសាងសង់ខុនដូខាងលើនេះមានទីតាំងនៅលើដីឡូត៌លេខ៥ និងលេខ៦ ច្រកផ្លូវលេខ៤១ ភូមិ១០ សង្កាត់ទន្លេបាសាក់ ខណ្ឌចំការមន ជារបស់ក្រុមហ៊ុនចិនឈ្មោះ Skylar។ ចំណែកភាគី​រង​គ្រោះមានឈ្មោះ នូ សុខុន ជាម្ចាស់ផ្ទះលេខ១៣b និង១៣bbis ផ្លូវលេខ៤១ សង្កាត់ទន្លេបាសាក់ ខណ្ឌចំកាមន គឺមានព្រំជាប់គ្នាជាមួយដីឡូត៌​សាងសង់ខុនដូខាងលើនេះ។

យោងតាមពាក្យបណ្ដឹងដែលត្រូវបានភាគីម្ចាស់ផ្ទះរងគ្រោះដាក់ចូលទៅក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី២៩ ខែមិថុនា ឆ្នាំ២០១៦ម្សិលមិញនេះ បានស្នើសុំឲ្យក្រសួង​ចេញលិខិតផ្អាកជាបណ្ដោះ​អាសន្ននូវសំណង់ខុនដូខាង​លើជាបណ្ដោះអាសន្នដើម្បីធ្វើការត្រួតពិនិត្យ លក្ខណៈបញ្ចេកទេសឲ្យ​បានល្អិតល្អន់ជៀសវាង​បង្កផលប៉ះពាល់​ដល់អ្នកជិត​ខាងបន្តទៀត។

ពាក្យបណ្ដឹងបានរៀបរាប់បន្តថា ក្រុមហ៊ុន sky lar ដែលមានលោក សេក យ៉ាន ជាអគ្គនាយកបានធ្វើការសាងសង់អាគារខុនដូ និងជីកកកាយដីបណ្ដាល​អោយស្រុត និងប្រេះរបង និងផ្ទះយ៉ាងធ្ងន់​ធ្ងរ។ ក្នុងនោះនៅគ្រាដំបូងពេលចាប់ផ្ដើមសាងសង់ លោកស៊្រាង គឹមលី តំណាងក្រុមហ៊ុនបានអះអាង​ថាខុនដូនេះ​មិនមានធ្វើចំណត​រថយន្តនៅក្រោម​ដីទេ គឺចំណតរថយន្តធ្វើនៅ​ជាន់ទី១ដល់ជាន់ទី៦ ហើយការកាយដីនឹង​មានត្រឹម​៤ម៉ែត្រប៉ុណ្ណោះ។ ប៉ុន្តែនៅពេលខួង​ចាក់គ្រឹះរួចរាល់ បែរជាចាប់ផ្ដើមជីក​កកាយដីរ​ហូតដល់ជំរៅ​៨ម៉ែត្រ ដោយតំណាងក្រុមហ៊ុន​បានអះអាងថាការសាងសង់​មានការកែប្រែ​គំរោង​មកសង់បន្ទប់ក្រោមដីវិញ ពេលនោះបានធ្វើអោយ​ជញ្ជាំងរបងផ្ទះ​ទាំងពីរនៅជាប់​ការដ្ឋានចាប់ផ្ដើមប្រេះ និងដីនៅក្រោយ​ផ្ទះចាប់ផ្ដើមស្រុត។

ក្រោយមកម្ចាស់ផ្ទះដែលរងនូវផលប៉ះពាល់បានប្រាប់​ទៅខាងក្រុមហ៊ុន ហើយអគ្គនាយកក្រុមហ៊ុន​បានមកជួបភាគីម្ចាស់ផ្ទះ​ធ្វើការសុំទោស​ដោយអះ​អាងថា ក្រុមហ៊ុនរបស់ខ្លួន​ជាក្រុមហ៊ុនធំ និងល្បី​ឈ្មោះបំផុត​​នៅប្រទេសចិន​មានវិស្វករចិនជំណាញៗ និងគិតពីសុវត្ថិភាព​ជាចំបង នឹងមានវិធានការមិនអោយមាន​ផលប៉ះពាល់ខូចខាត​ឡើយ។ ប៉ុន្តែក្រោយមកក្រុមហ៊ុន​ខាងលើនេះ​មិនបាន​អនុវត្ត តាម​កិច្ចសន្យានោះឡើយ ពោលគឺនៅតែបន្តសាងសង់ ហើយផ្ទះ និងរបងទាំងពីរនៅតែ​បន្តបាក់ស្រុត ហើយដោយសារតែ​មានការយោគយល់ ក្នុងនាមអ្នកជិតខាង ភាគីម្ចាស់ផ្ទះតែងតែមានឆន្ទៈ​ក្នុងការ​សម្រប​​សម្រួលដោះស្រាយបញ្ចប់បញ្ហា ដោយព្យាយាមជជែកដោះស្រាយម្ដង​ជាពីរដងតាមរយៈមេធាវី តែក្រុមហ៊ុននេះ​តែងតែពន្យារពេល ធ្វើយ៉ាងណា​ដើម្បីបញ្ចប់ការងារ ដោយដំណើរការ​សាងសង់​ដោយមិន​ប្រកាន់ថ្ងៃឬ​យប់ឡើយ។

សូមបញ្ជាក់ថាទីតាំងផ្ទះរបស់ជនរងគ្រោះនេះពីមុនមកបាន​ជួលអោយបុគ្គលិក​ស្ថានទូតសហរដ្ឋអាមេរិក​ស្នាក់នៅដោយ​ខាងភាគី​ស្ថានទូត​តែងតែមកធ្វើការត្រួត​ពិនិត្យទីតាំងផ្ទះ​ច្បាស់លាស់ធានា​សុវត្ថិ​ភាព​ហើយទើបគេជួលអោយបុគ្គលិក​គេស្នាក់នៅ។ ប៉ុន្តែក្រោយក្រុមហ៊ុន Skylar មកសាងសង់ខុនដូបង្កផលប៉ះពាល់បណ្ដាលអោយប្រេះស្រាំកាលណាមក ក្រុមហ៊ុននេះបានទទួលស្គាល់ ហើយ​បាន​ចេញមុខ​ចំណាយលុយជួលខុនដូ​នៅទីតាំងផ្សេង​អោយបុគ្គលិកស្ថាន​ទូតសហរដ្ឋអាមេរិក​ស្នាក់នៅជាបណ្ដោះអាសន្ន នេះសបញ្ជាក់​អោយឃើញ​ពីការទទួលស្គាល់​កំហុសលើការបង្ក​អោយមាន​ផលប៉ះ​ពាល់​ទៅលើផ្ទះ​អ្នកជិតខាងដូចជាប្រេះ ស្រុតជាដើម និងក៏ជាការទទួលខុសត្រូវផងដែរ។

ក្នុងនោះកន្លងមកការិយាល័យ​រៀបចំដែនដី នគរូបនីយកម្ម និងសំណង់ខណ្ឌចំការ​មនធ្លាប់ចុះ​ទៅធ្វើកិច្ចសន្យាផ្អាក​ការសាងសង់​ពីរលើករួចមកហើយ តែក្រុមហ៊ុននេះមិនដែលអនុវត្តតាមនោះទេ និ​យាយ​រួម​គឺក្រុមហ៊ុនចិនមួយនេះ​មើលងាយលើច្បាប់ និងមន្ត្រីជាអ្នកអនុវត្ត​ច្បាប់តែម្ដង។

ពាក់ព័ន្ធបណ្ដឹងខាងលើនេះ
ទី១៖ ភាគីម្ចាស់ផ្ទះរងគ្រោះបានសំណូមពរសូមឲ្យលោកទេសរដ្ឋមន្ត្រីក្រសួងរៀបចំដែនដីពិនិត្យលទ្ធភាពផ្នែកច្បាប់ផ្អាកសំណង់នេះ​ជាករណីប្រញាប់និងបន្ទាន់បំផុត។

ទី២៖ សូមឲ្យម្ចាស់សំណង់ចាត់វិធានការចាំបាច់បន្ទាន់ដើម្បីទប់កុំអោយបាក់ដី ស្រុតដី និងរបងផ្ទះអ្នកជិតខាងបន្តទៀត។

ទី៣៖ ពិនិត្យលទ្ធភាពលិខិត និងប្រកាសអនុញ្ញាតសំណង់នេះឡើងវិញ និងសំណូពរអោយវាយតំលៃផលប៉ះពាល់ និងលក្ខណៈសុវត្ថិភាពដោយផ្ទាល់ជាមុនសិន មុននឹងអនុញ្ញាតអោយ​ធ្វើការសាងសង់​បន្ត ដោយសូមអោយវាយតំលៃ និងការទទួលខុសត្រូវជាផ្លូវការពីជំនាញផ្ទាល់ដែលបានអនុម័តប្លង់នេះ។

ទី៤៖ ដោះស្រាយសំណងលើផ្ទះទាំងពីរ និងកំណត់ការទទួលខុសត្រូវរបស់​ក្រុមហ៊ុនលើការធ្វើឲ្យ​ខូចខាតទៅ​ថ្ងៃអនាគត​ទាំងសំណង និងការប៉ះពាល់​ជាយថាហេតុ​ដល់រូបរាងកាយ ឬអាយុជីវិតអ្នក​ដ៏ទៃនៅពេលមានហេតុការណ៍កើតឡើងដោយសារការដ្ឋានសំណង់នេះ រួមទាំងដោះស្រាយសំណងការអាក់ខាន​ការធ្វើអាជីវកម្មផ្ទះទាំងពីរខាងលើ និងចំណាយផ្សេងៗរួមទាំងជំងឺចិត្តផងដែរ។

ទី៥៖ សូមពិនិត្យលទ្ធភាពអោយអ្នកប្រព្រឹត្តខុសបញ្ចេកទេស ងាកត្រឡប់ទៅអនុវត្តច្បាប់ និងវិធានជាធរមានជាដាច់​ខាតដោយមានការបញ្ជាក់​ពីក្រសួង។

ទី៦៖ សូមអោយក្រុមហ៊ុនធានាពីភាពរឹងមាំរបស់ខុនដូ ដោយមិនអោយមានផលប៉ះ​ពាល់ដល់អ្នក​ជិតខាង និងអ្នកដ៏ទៃ​តទៅទៀតឡើយ។
 
បច្ចុប្បន្នសំណង់អាគារខុនដូខាងលើនេះបានដំណើរការសាងសង់គ្រឹះ​ខាងក្រោមរួចរាល់ហើយ តែក្រុមហ៊ុននេះនៅ​តែមិនព្រមដោះស្រាយ​ផលប៉ះពាល់​​ដល់ផ្ទះអ្នកជិតខាង​នៅឡើយទេ ដោយហាក់​ដូចជា​ចង់គេច​វេស ខណៈដំបូងឡើយខ្លួនបាន​ទទួលស្គាល់កំហុស​ជាលាយលក្ខអក្សរ​ផងនោះ។

ពាក់ព័ន្ធបណ្ដឹងខាងលើ ភ្នាក់ងារ Fresh News មិនអាចធ្វើការទាក់ទងសុំការ​បំភ្លឺពីភាគីក្រុមហ៊ុន Skylar បានឡើយ ដោយសារពុំមានលេខទូរស័ព្ទ​សំរាប់ធ្វើការទាក់ទង៕