(ភ្នំពេញ)៖ លោក ឯម ច័ន្ទមករា អគ្គលេខាធិការ ក្រុមប្រឹក្សាសកម្មភាពជនពិការ ក៏ដូចជាក្រុមប្រឹក្សាសកម្មភាពជនពិការទាំងមូល សូមធ្វើការថ្លែងអំណរគុណ កញ្ញា ធី សុវណ្ណថា ប្រធានអង្គការយុវជនកិច្ចការសង្គម ដែលបានផ្ដល់អាហារូបករណ៍១០០កន្លែង ដើម្បីចែកជូនដល់បងប្អូនជនពិការ។
បើតាមលិខិតថ្លែងអំណរគុណ របស់លោក ឯម ច័ន្ទមករា ដែលអង្គភាព Fresh News ទទួលបាននៅព្រឹកថ្ងៃទី១៣ ខែតុលា ឆ្នាំ២០១៦នេះ បានបញ្ជាក់ថា «ក្នុងនាមអគ្គលេខាធិការដ្ឋានក្រុមប្រឹក្សាសកម្មភាពជនពិការ និងក្នុងនាមខ្លូនខ្ញុំផ្ទាល់ ខ្ញុំសូមថ្លែងអំណរគុណយ៉ាងជ្រាលជ្រៅចំពោះ កញ្ញាប្រធានអង្គការយុវជន កិច្ចការសង្គម ដែលបានផ្ដល់អាហារូបករណ៍ដល់ខ្ញុំចំនួន១០០កន្លែង ដើម្បីចែកជូនដល់បងប្អូនជនពិការ»។
បន្ថែមពីនេះ លោក ឯម ច័ន្ទមករា បានចាត់ទុកថា ការផ្ដល់អាហារូបករណ៍នេះ គឺជាការចូលរួមសម្រាលនូវទុក្ខលំបាករបស់បងប្អូន ជនពិការ ដែលពុំមានលទ្ធភាព គ្រប់គ្រាន់ដើម្បីបន្ដការសិក្សា នៅថ្នាក់ឧត្តមសិក្សា និងដើម្បីចូលរួមលើកស្ទួយ ធនធានជនមានពិការភាពនៅកម្ពុជា។ ជាងនេះទៅទៀត លោកបានកោតសរសើរ ដល់កញ្ញា និងសហការីទាំងអស់ ដែលបានខិតខំប្រឹងប្រែងរួមគ្នា ដើម្បីជួយដល់ជនមានពិការភាព ក៏ដូចជាការចូលរួមចំណែកការអភិវឌ្ឍសង្គមកម្ពុជាផងដែរ។
សូមបញ្ជាក់ថា កាលពីថ្ងៃទី៩ ខែតុលា ឆ្នាំ២០១៦កន្លងទៅថ្មីនេះ កញ្ញា ធី សុវណ្ណថា បានប្រកាសផ្តល់អាហារូបករណ៍ចំនួន ១០០កន្លែង ដល់សិស្ស ជាជនពិការនៅកម្ពុជា។ ក្រៅពីការផ្តល់អាហារូបករណ៍ឲ្យសិក្សាមិនអស់ថវិកាហើយនោះ យុវតីវ័យក្មេងប្រធានអង្គការយុវជនកិច្ចការសង្គមរូបនេះក៏បានប្រកាស ផ្តល់កន្លែង ស្នាក់នៅសម្រាប់ការសិក្សារបស់ជនពិការផងដែរ។ ការប្រកាសផ្តល់នេះធ្វើឡើងតាមរយៈលោក ឯម ច័ន្ទមករា អគ្គលេខាធិការ ក្រុមប្រឹក្សា សកម្មភាពជនពិការ៕
