(ភ្នំពេញ)៖ ផ្ទះប្រជាពលរដ្ឋសរុប ២៥៣គ្រួសារ ត្រូវបានជន់លិច ស្ថិតនៅក្រោយបុរីប៉េងហួត​ ផ្លូវ៣៧១ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ហើយត្រូវបានលោក ពេជ្យ កែវមុនី អភិបាលខណ្ឌ ​​លោក ឌី រ័ត្នខេមរុណ អភិបាលរងខណ្ឌ និងលោក កែវ សាវឿន ចៅសង្កាត់ចាក់អង្រែលើ ព្រមទាំងមន្ដ្រីពាក់ព័ន្ធមួយចំនួនទៀត បានចុះពិនិត្យ ស្ថានភាពជាក់ស្ដែង នៅម៉ោង៨៖៣០នាទីយប់ ថ្ងៃទី១៨ ខែតុលា ឆ្នាំ២០១៦នេះ។

លោក ឌី រត្ន័ខេមរុណ អភិបាលរង​ បានឲ្យដឹងថា ក្នុងចំណោមផ្ទះប្រជាពលរដ្ឋ ដែលមានជន់លិច២៥៣គ្រួសារនេះ មាន៧៨គ្រួសារលិចលើរនាបផ្ទះ ប៉ុន្ដែមិនពលរដ្ឋណាម្នាក់រងគ្រោះថ្នាក់នោះទេ ដោយឡែកចំណុចប្រឈមប្រអប់ភ្លើងអគ្គិសនី ៣បង្គោល ត្រូវលើកឡើង។ លោកអភិបាលរង បញ្ជាក់ថា ចំពោះបញ្ហាប្រឈមវិញ មានដូចជា កង្វះម្ហូបអាហារ ទឹកស្អាត សុខភាពជម្ងឺ ទឹកស៊ីជើង និងជម្ងឺរាគរុសជាដើម។

ជាមួយគ្នានេះលោក ឌី រ័ត្នខេមរុណ បានបន្ថែមថា «ស្អែកខ្ញុំ នឹងចុះពិនិត្យជាក់ស្តែងម្តងទៀត ដេីម្បីនាំយកអំណោយមនុស្សធម៍កាកបាទក្រហមកម្ពុជា ដោយសហការជាមួយអង្គការទស្សនះពិភពលោកចុះផ្គត់ផ្គង់គ្រឿងឩបភោគ បរិភោគជូនប្រជាពលរដ្ឋដែលត្រូវទឹកជន់លិចនេះ»។