(ភ្នំពេញ)៖ កម្មករ-កម្មការិនីរោងចក្រក្នុងទូទាំងរាជធានីភ្នំពេញចំនួន២០០នាក់ នឹងមានសិទ្ធិទទួលសំបុត្រទស្សនារឿង «កំពូលល្ងង់នៅអាស៊ី»នៅគ្រប់រោងកុនទំនើបដោយឥតគិតថ្លៃ នៅថ្ងៃទី ២៣ ខែធ្នូ ឆ្នាំ២០១៦នេះ។
ដើម្បីទទួលបាន សំបុត្រដោយឥតគិតថ្លៃ កម្មករកម្មការិនីដោយគ្រាន់តែបង្ហាញកាតរោងចក្រឱ្យអ្នកលក់សំបុត្របានឃើញរឿង «កំពូលល្ងង់នៅអាស៊ី» ។ នេះបើយោងតាមការបញ្ជាក់ឱ្យដឹងមុននេះ ពីម្ចាស់ផលិតកម្ម ។
សំបុត្រដែលមានតាមរោងកុនក្នុងនោះរោងកុនស្ទឹងមានជ័យ៦០សំបុត្រ នៅរោងកុនមេជើអ៊ីអន៣០ ធីខេ៤០ ស៊ីធីម៉ល៤០ និងសូរិយា៣០ សំបុត្រ។
លោកឡេង ណាវ៉ាត់ត្រា ចាងហ្វាងផលិតកម្ម Galaxy បានថ្លែងប្រាប់ថាក្រោយការដាក់បញ្ចាំងលក់សំបុត្រកាលពីថ្ងៃទី១៥ ធ្នូ ហើយទទួលបានជោគជ័យខ្សែរឿង «កំពូលល្ងង់នៅអាស៊ី» ដល់ថ្ងៃបើកឱ្យទស្សនាដោយសេរី សម្រាប់កម្មករ កម្មការិនីរោងចក្រតាមការសន្យាហើយ ឱ្យតែកម្មករទាំងនោះ បង្ហាញកាតរោងចក្រ ហើយទៅទទួលសំបុត្រអោយបានមុន២០០សំបុត្រ តាមគម្រោង។
លោកថា រោងទំនើបនៅខេត្តសៀមរាប មិនត្រូវបានអនុញ្ញាតឱ្យទទួលសំបុត្រហ្វ្រីនោះទេ ដោយសារតែលោកស្ទាបស្ទង់ឃើញថានៅក្នុងខេត្តនោះ មិនសូវមានអ្នកធ្វើការរោងចក្រ ម្យ៉ាងលោកមានបំណងចង់ឱ្យកម្មកររោងនៅរាជធានីភ្នំពេញ ដែលមានចំនួនច្រើនបានទស្សនារឿងនេះទាំង២០០នាក់តែម្ដង ។
លោកថា កម្មកររោងចក្រនឹងបាត់ឱកាសទស្សនាដោយឥតគិតថ្លៃ បើមិនរួសរាន់មកកាន់រោងទំនើបនៅថ្ងៃទី២៣ ធ្នូ ដោយសារតែចំនួនដែលបានផ្ដល់ជូន ក៏មិនច្រើនបើធៀបនឹងចំនួនកម្មករកម្មករនៅភ្នំពេញមានច្រើន ។ លោកនិយាយថា «ខ្ញុំគិតថា ២០០សំបុត្រ ហ្នឹងអត់ច្រើនទេ មួយថ្ងៃសុក្រហ្នឹងគឺអស់ហើយ ចឹងហើយបានខ្ញុំអំពាវនាវអោយបងប្អូនយើងដែលចង់ទស្សនារឿងអត់អស់លុយ លើកគ្នាទៅកាន់រោងកុនម៉ោងណាក៏បានសម្រាប់ថ្ងៃហ្នឹង ដើម្បីទទួលសំបុត្រហ្វ្រី!» ។
លោកអះអាងថា ខ្លួននឹងរក្សាជំហរផ្ដល់សំបុត្រឱ្យក្រុមកម្មករគ្រប់២០០សន្លឹកតាមការប្រកាស ដោយមិនលែង៣សន្លឹកហើយកុហកឱ្យបងប្អូនកម្មករសម្រុកទៅចង្អៀតរោងតែចុងក្រោយ ក៏លែងស្ទីលថា អស់សំបុត្រ សូម្បីតែសំបុត្រចែកហ្វ្រីមិនទាន់គ្រប់២០០ ។
លោកនិយាយថា «អ្នកខ្លះភ័យរឿងខ្ញុំបោក ខ្ញុំហ៊ានធានាថានឹងមានសំបុត្រ២០០សំបុត្រត្រូវតែដល់ដៃកម្មករនៅថ្ងៃទី២៣ ធ្នូហ្នឹងដោយឥតគិតថ្លៃ ហើយអ្នកសារព័ត៌មាន ឬមហាជន អាចសុំទិន្នន័យពីរោងកុនបាន ចឹងហើយបានខ្ញុំសុំអោយបងប្អូនរោងចក្រ ធ្វើមិចឆ្លៀតពេលទៅទទួលសំបុត្រអោយបានលឿនថ្ងៃហ្នឹងដើម្បីកុំអោយអស់ទាន់!»។
លោកថាខ្លួនជាអ្នកចេញថ្លៃចំណាយទាំងស្រុងលើការទិញសំបុត្រដែលចែកហ្វ្រីនេះ ដោយរោងទំនើប៤កន្លែងគឺរោងកុននៅផ្សារសូរិយា នៅផ្សារអ៊ីអន ផ្សារទួលគោក និងផ្សារស្ទឹងមានជ័យ នឹងចាត់ចែងលើកិច្ចការនេះ ដោយគ្រាន់តែបងប្អូនកម្មករបង្ហាញកាតរោងចក្រ។
មិនថាតម្លៃ៣ដុល្លារ ឬ ៤ដុល្លារ គឺលោកប្រកាសចេញអោយទាំងអស់ សម្រាប់ចែកហ្វ្រីនៅថ្ងៃសុក្រនេះ។ លោកជឿជាក់ថាត្រឹមមួយថ្ងៃប្រកាសនេះ នឹងអស់សំបុត្រហ្វ្រីដោយសារតែលោកជឿថាកម្មកររោងចក្រនឹងលើកគ្នាទៅទស្សនា ដើម្បីបានសប្បាយជុំគ្នា ជាពិសេសរោងកុននៅក្បែរៗតំបន់រោងចក្រដូចជារោងទំនើបស្ទឹងមានជ័យ និងរោងកុននៅផ្សារអ៊ីអន លោកថានឹងមានអ្នកទៅទទួលសំបុត្រនេះអស់។
លោកថាមកទល់ពេលនេះចំណូលរបស់រឿង«កំពូលល្ងង់នៅអាស៊ី»ត្រឹមតែទប់ទល់ប៉ុណ្ណោះ ទើបលោកទទូចអោយជួយគាំទ្ររឿងនេះអោយបានច្រើន ដើម្បីអោយលោកពិចារណារឿងផ្ដល់សំបុត្រហ្វ្រីបន្ថែមទៀតដល់ក្រុមកម្មកររោងចក្រ៕
