(ភ្នំពេញ)៖ លោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាមេដឹកនាំសំខាន់មួយរូបក្នុងសាសនិកឥស្លាម ប្រកាសជំហគាំទ្រឲ្យសាលារាជធានីភ្នំពេញ ដាក់ប្រព័ន្ធលូ និងបើកផ្លូវសាធារណៈ នៅក្បែវិហារឥស្លាមបឹងកក់ ដើម្បីងាយស្រួលដល់ប្រជាពលរដ្ឋធ្វើដំណើរ ហើយការបើកផ្លូវ និងដាក់ប្រព័ន្ធលូនេះ មិនមានផលប៉ះពាល់ណាមួយដល់វិហារឥស្លាមបឹងកក់នោះទេ។
ការប្រកាសជំហបែបនេះត្រូវបានធ្វើឡើង នៅរសៀលថ្ងៃទី២៦ ខែធ្នូ ឆ្នាំ២០១៦នេះ ក្នុងកិច្ចប្រជុំគណៈអ៉ីម៉ាំ គ្រប់លំដាប់ថ្នាក់តំណាងសាសនិកឥស្លាមទូទាំងប្រទេស របស់គណៈដឹកនាំជាន់ខ្ពស់ នៃសាសនាឥស្លាមកម្ពុជា ក្រោមអធិបតីភាព លោកឧកញ៉ា សុះ កំរ៉ី ចាងហ្វាងនៃគណៈដឹកនាំជាន់ខ្ពស់ នៃសាសនាឥស្លាមកម្ពុជា, លោក ឃួង ស្រេង អភិបាលស្ដីទី រាជធានីភ្នំពេញ ព្រមទាំងថ្នាក់ដឹកនាំ ឥស្សរជនឥស្លាមសំខាន់ៗ ប្រមាណជិត៧០០០នាក់ តំណាងឲ្យសាសនិកឥស្លាមទូទាំងប្រទេសជាង ៧០ម៉ឺននាក់។
លោក អូស្មាន ហាស្សាន់ បញ្ជាក់យ៉ាងដូច្នេះថា៖ «ជំហរឯកជនរបស់ខ្ញុំ មិនខុសពីជំហររបស់បងប្អូនយើងទាំងអស់ទេ គឺខ្ញុំឯកភាពតាំងពីដើមរហូតមកដល់ថ្ងៃនេះថា គម្រោងរបស់សាលារាជធានីភ្នំពេញ គឺជាគម្រោងដែលនាំមកនូវអត្ថប្រយោជន៍សម្រាប់ប្រជាជនយើងទូទៅ សម្រាប់គ្រប់សាសនា សម្រាប់គ្រប់សាធារណជន ទាំងមនុស្ស ទាំងសត្វ»។ បន្ថែមពីនេះលោកថា វិហារឥស្លាមបឹងកក់នេះ ប្រសិនបើសាលារាជធានីភ្នំពេញបើកផ្លូវ គឺជាវិហារមួយដែលមានចម្ងាយពីផ្លូវរហូត ទៅដល់៦០ម៉ែត្រ ខណៈដែលវិហារឥស្លាមផ្សេងទៀត មានចម្ងាយជិតជាងនេះ ពោលគឺវិហារគីឡូម៉ែត្រ៩ មានចម្ងាយពីផ្លូវ៤០ម៉ែត្រ គីឡូម៉ែត្រលេខ៨ មានចម្ងាយ ពីផ្លូវ២២ម៉ែត្រ វិហារគីឡូម៉ែត្រលេខ៧ ចម្ងាយពីផ្លូវ១៧ម៉ែត្រ វិហារទួលទំពូង ចម្ងាយពីផ្លូវ១៧ម៉ែត្រ វិហារជ្រោយចង្វារ ចម្ងាយពីផ្លូវ៩ម៉ែត្រ និងវិហារព្រែកប្រា មានចម្ងាយពីផ្លូវត្រឹមតែ ៣.៥ម៉ែត្រតែប៉ុណ្ណោះ។
ជាមួយគ្នានោះដែរ លោក ស៊ូ សេន អ៊ីម៉ាំ ខេត្តកណ្ដាល តំណាងឲ្យវិហារឥស្លាមចំនួន១៧ បានលើកឡើងថា កាលណាអាជ្ញាធរបើកផ្លូវនេះវិហារឥស្លាមបឹងកក់ នឹងមានប្រជាជនជិះឆ្លងកាត់ និងស្គាល់កាន់តែច្រើនបន្ថែមទៀត ហើយលោកបានអំពាវនាវឲ្យសាលារាជធានីភ្នំពេញ បន្ដអនុវត្តគម្រោងនេះ ដោយមិនឈប់ ព្រោះតែមានក្រុមមួយចំនួនតូចមករារាំងនោះឡើយ។ លោកថា ប្រសិនបើអាចសាលារាជធានីភ្នំពេញ គួរតែអនុវត្តគម្រោងនេះចាប់ពីថ្ងៃស្អែកតទៅ។
ទោះជាយ៉ាងណាក៏ដោយ លោក ឃួង ស្រេង អភិបាលស្ដីទីរាជធានីភ្នំពេញ បានថ្លែងដែរថា បើទោះបីសាសនិកឥស្លាមប្រមាណ ៩០ភាគរយ បានគាំទ្រឲ្យ សាលារាជធានីភ្នំពេញ ដាក់លូ និងបើកផ្លូវ R4 ដែលនៅក្បែវិហារឥស្លាមបឹងកក់នេះក៏ដោយ លោក និងក្រុមការងារ គឺនៅតែចាំទទួលនូវពាក្យបណ្ដឹងជំទាស់នៅការអភិវឌ្ឍន៍គម្រោងនេះជានិច្ច៕
