(ភ្នំពេញ)៖ ក្នុងជំនួបពិភាក្សាទ្វេភាគីជាមួយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា នៅល្ងាចថ្ងៃទី២០ ខែមីនា ឆ្នាំ២០១៧ លោក វ៉ាង ស៊ូវិន អនុរដ្ឋមន្ត្រីក្រសួងពាណិជ្ជកម្ម ប្រទេសចិន បានជំរុញប្រទេសកម្ពុជា ឲ្យធ្វើការជាមួយអគ្គរដ្ឋបាលគ្រប់គ្រង អធិការកិច្ច និងធានាគុណភាព (AQSIQ) ចំណុះឲ្យក្រុមប្រឹក្សារដ្ឋនៃសាធារណរដ្ឋប្រជាមានិតចិន ជាពិសេសក្រុមហ៊ុនត្រួតពិនិត្យ និងបញ្ជាក់គុណភាពទំនិញ (CCIC) របស់ចិននៅក្នុងប្រទេសកម្ពុជា ដែលមានឯកទេសខាងផ្នែកអនាម័យ និងភូត្តគាមអនាម័យ។
លោក វ៉ាង ស៊ូវិន បានលើកឡើងដូចនេះ ដើម្បីឆ្លើយតបនឹងសំណើរបស់រដ្ឋមន្ត្រីពាណិជ្ជកម្មកម្ពុជា ដែលបានស្នើសុំឲ្យភាគីចិន ជួយទិញកសិផល និងទំនិញផ្លែឈើបន្ថែមទៀតពីប្រទេសកម្ពុជា។
លោកអនុរដ្ឋមន្ត្រីចិន ក៏បានជូនអនុសាសន៍ឲ្យលោក ប៉ាន សូរស័ក្តិ ធ្វើទំនាក់ទំនងជាមួយ AQSIQ តាមរយៈស្ថានទូតកម្ពុជា ប្រចាំនៅទីក្រុងបេកាំង និងលើកយកបញ្ហានេះ នៅពេលដែលលោករដ្ឋមន្ត្រី អញ្ជើញទៅចូលរួមកិច្ចប្រជុំ «One Belt One Road» នៅក្នុងខែឧសភា ខាងមុខ។
ជាការឆ្លើយតបលោក ប៉ាន សូរស័ក្តិ បានថ្លែងអំណរគុណក្រសួងពាណិជ្ជកម្ម និងរដ្ឋាភិបាលនៃប្រទេសចិន ដែលបានផ្តល់កិច្ចសហការល្អលើវិស័យពាណិជ្ជកម្ម ជាពិសេសជួយទិញអង្ករពីប្រទេសកម្ពុជាចំនួន ២០០ពាន់តោន រៀងរាល់ឆ្នាំ និង អនុញ្ញាតឲ្យពាណិជ្ជករខ្មែរ ធ្វើការនាំចូលផលិតផលកសិកម្មចំនួនជាង ១ម៉ឺនប្រភេទ ក្រោមបន្ទាត់ពន្ធគយ ៩៧% ដោយមិនជាប់កូតា និងពន្ធគយ (DFQF)។
សូមរំលឹកថា តាមរយៈដំណើរទស្សនកិច្ចរបស់លោក ស៊ី ជិនពីង ប្រធានាធិបតីចិន មកកាន់ប្រទេសកម្ពុជាកាលពីឆ្នាំមុន រដ្ឋាភិបាលនៃប្រទេសទាំងពីរ បានចុះអនុស្សារណៈលើកិច្ចព្រមព្រៀងពាណិជ្ជកម្មមួយចំនួន ក្នុងនោះក៏មានការអនុវត្តលើបញ្ហាអនាម័យ និងភូត្តគាមអនាម័យនៅក្នុងប្រទេសទាំងពីរផងដែរ៕
