(ភ្នំពេញ)៖ លោក ហេង រតនា អគ្គនាយកមជ្ឍមណ្ឌលកម្ចាត់មីនកម្ពុជា (CMAC) បានបញ្ជាក់ប្រាប់ Fresh News ថា រថយន្តសុីម៉ាក់មួយចំនួន ក្នុងចំណោមរថយន្តសរុបចំនួន៨៨គ្រឿង និងគ្រឿងចក្រកំទេចមីនមួយចំនួន ក្នុងចំណោមគ្រឿងចក្រកំទេចមីន៩គ្រឿង ដែលបានចេញដំណើរពីប្រទេសជប៉ុន តាមកប៉ាល់ដឹកមកដល់កំពង់ផែក្រុងព្រះសីហនុហើយ នៅថ្ងៃទី២១ ខែមីនាឆ្នាំ២០១៧នេះ ខណៈមួយចំនួនទៀតនឹងមកដល់ នៅពេលក្រោយទៀត។
លោកបញ្ជាក់ថា គ្រឿងចក្រកំទេចមីន និងរថយន្តទាំងនេះជាជំនួយរបស់រដ្ឋាភិបាលជប៉ុនផ្តល់មករាជរដ្ឋាភិបាល ដើម្បីប្រគល់ជូនអង្គភាពសុីម៉ាក់។ រថយន្តនិងគ្រឿងចក្រកំទេចមីនទាំងនេះ ជាផែ្នកមួយនៃជំនួយសំភារៈបចេ្ចកទេសដោះមីន ដែលមានថវិកាជាង១៣០០លានយ៉េន (ប្រមាណ១២លានដុល្លាអាមេរិក)។
លោក ហេង រតនា បញ្ជាក់បន្ថែមទៀតថា រថយន្តស៊ីម៉ាក់ និងគ្រឿងចក្រកម្ទេចមីនទាំងនោះ ដឹកយកទៅកាន់សាលាហ្វឹកហ្វឺនសកម្មភាពសុីម៉ាក់ខេត្តកំពង់ឆ្នាំង។
លោកបានបញ្ជាក់ទៀតថា ក្រៅពីនេះ ម៉ាសុីនរាវមីនចំនួន៧៨៨គ្រឿងផលិតនៅប្រទេសអាល្លឺម៉ង់ និងអាវក្រោះចំនួន៤៥០កំប្លេរបានមកដល់ឃ្លាំងសុីម៉ាក់តាំងពីខែកុម្ភៈម្ល៉េះ៕
