(កំពង់ស្ពឺ)៖ យុវជន២នាក់ ត្រូវដីបាក់សង្កត់ដោយម្នាក់ស្លាប់ និងម្នាក់រងរបួស ខណៈដែលពូកគេទាំង២ កំពុងតែដើរជីកសត្វក្នុងរូងដី ដើម្បីយកទៅលក់។ ហេតុការណ៍ដ៏គូរឲ្យអាណិតនេះ កើតឡើងនៅថ្ងៃទី២០ ខែមេសា ឆ្នាំ២០១៧នេះ នៅចំណុចការដ្ឋានកាយខ្សាច់ តាមុយ ស្ថិតក្នុងភូមិព្រៃកោះ ឃុំវល្លិស ស្រុកសំរោងទង។
លោកវរសេនីយ៍ទោ ឃុត សុផល អធិការនគរបាលស្រុក បានឲ្យដឹងថា ជនរងគ្រោះទាំង២នាក់នេះ ឈ្មោះ ចឹក វុធថៃ អាយុ១៥ឆ្នាំ ស្លាប់នៅនឹងកន្លែង និងម្នាក់ទៀតដែលរងរបួសឈ្មោះ សយ សុខហេវ អាយុ១៧ឆ្នាំ រស់នៅភូមិតាកេរ្ដ៍ ឃុំរលាំងចក។
លោកអធិការបញ្ជាក់ថា នេះគឺជាការធ្វេសប្រហែសរបស់អ្នករងគ្រោះ ហើយករណីនេះ អាចបណ្តាលមកពីជីកជ្រៅពេកដោយមិនគិតដល់រឿងបាក់ដីសង្កត់នោះទេ។ តែទោះជាយ៉ាងណាក៏ដោយ ជុំវិញករណីនេះ កម្លាំងនគរបាលជំនាញ កំពុងធ្វើការស្រាវជ្រាវបន្ដ។
បច្ចុប្បន្នសពត្រូវបានប្រគល់ឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី៕
