(ភ្នំពេញ)៖ នៅព្រឹកថ្ងៃទី ២៨ ខែមេសា ឆ្នាំ២០១៧ នេះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានជួយឧបត្ថម្ភដល់ការវះកាត់ព្យាបាលជំងឺរបស់ លោកតា ស៊ូ សាវ៉ាង (ហៅ តា ហ្វុយ ហ្សូ) តារាកំប្លែងជើងចាស់ ដែលកំពុងសម្រាកព្យាបាលនៅមន្ទីរពេទ្យបាងកកប្រទេសថៃ។
ក្នុងឱកាសនោះ លោកស្រី ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំនូវប្រសាសន៍ផ្ដាំផ្ញើសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំពោះសុខភាពរបស់លោកតា និងសូមជូនពរលោកតា ឆាប់បានជាសះស្បើយពីជំងឺ។
លោកយាយ ប៉េង ផាន អាយុ ៦៤ឆ្នាំ ត្រូវជាភរិយាលោកតា ស៊ូ សាវ៉ាង បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរ និងយកចិត្តទុកដាក់ជួយឧបត្ថម្ភថវិកាជាបន្តបន្ទាប់នាពេលកន្លងមក៕
