(បន្ទាយមានជ័យ)៖ កម្លាំងនគរបាលនៃអធិការដ្ឋាន នគរបាលក្រុងប៉ោយប៉ែត បានបន្តចុះប្រតិបត្តិការឃាត់ខ្លួន ជនសង្ស័យប្រុសស្រី៣នាក់ ដែលជួញដូរគ្រឿងញៀនដ៏សកម្ម នៅក្រុងប៉ោយប៉ែត ដោយបានដកហូតថ្នាំញៀនចំនួន៦១៥គ្រាប់ និងជិត១០០ក្រាមទៀត។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានឲ្យដឹងថា កម្លាំងជំនាញចុះប្រតិបត្តិការ រហូតដល់ឃាត់ខ្លួន ជនសង្ស័យជួញដូរគ្រឿងញៀន៣នាក់ រួមមទាំងវត្ថុតាងជាច្រើន។ ដំបូងឡើយ កម្លាំងសមត្ថកិច្ចបានឃាត់ខ្លួនជនសង្ស័យឈ្មោះ ហ៊ុន វ៉ាន់ ភេទស្រី អាយុ២៧ឆ្នាំ (អ្នកចែកចាយបន្ត) នៅចំណុចចំការស្វាយ នៅភូមិក្បាលស្ពាន១ សង្កាត់-ក្រុងប៉ោយប៉ែត នៅថ្ងៃទី២៣ ខែមិថុនា ឆ្នាំ២០១៧ និងសួរនាំស្រាវជ្រាវបន្តរហូតដល់ឃាត់ខ្លួនមេចែកចាយដ៏សកម្ម នៅក្រុងប៉ោយប៉ែត ឈ្មោះ សេង ជា អាយុ៤៤ឆ្នាំ រស់នៅភូមិបាលិលេយ្យ២ សង្កាត់-ក្រុងប៉ោយប៉ែត និងឈ្មោះ តាំង ចន្ធូ ភេទស្រី អាយុ៣៧ឆ្នាំ រស់នៅភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
សមត្ថកិច្ចជំនាញដកហូតវត្ថុតាងរួមមាន៖ គ្រឿងញៀនប្រភេទមេតំហ្វេតាមីន WY ចំនួន ៦១៥គ្រាប់ គ្រឿងញៀនប្រភេទមេតំហ្វេតាមីន ICE ទម្ងន់ជិត ១០០ក្រាម, ទូរស័ព្ទម៉ាក Nokia ចុចពិល ៣គ្រឿង Samsung ១គ្រឿង ជញ្ជីងថ្លឹង១ ដែលលាក់ទុកក្នុងកញ្ចប់សាប៊ូ និងកំប៉ុងម្សៅស៊ុប និងម៉ូតូ១គ្រឿង ម៉ាកឌ្រីមសេ១២៥ សេរី២០១៧ ពាក់ស្លាកលេខ បន្ទាយមានជ័យ 1P-1062 ពណ៌ខ្មៅ។
បច្ចុប្បន្នជនសង្ស័យប្រុសស្រីទាំង៣នាក់ ខាងលើ ត្រូវបានកម្លាំងជំនាញកសាងសំណុំរឿងបញ្ជូនទៅ ស្នងការដ្ឋាននគរបាលខេត្តបន្ទាយមានជ័យ ចាត់ការបន្តរទៅតាមផ្លូវច្បាប់៕
