(ទីក្រុងសៀងហៃ)៖ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានដឹកនាំគណៈប្រតិភូក្រសួងឧស្សាហកម្ម និងសិប្បកម្ម បំពេញទស្សនកិច្ចនៅទីក្រុងសៀងហៃ ប្រទេសចិន ក្នុងគោលបំណងធ្វើយ៉ាងណាឱ្យសម្រេចបានជាលទ្ធផលផ្លែផ្កា សម្រាប់គម្រោងធំៗ ចំនួន២ ក្នុងនោះរួមមាន ការបង្កើតសួនឧស្សាហកម្មទឹកស្អាត និងការបង្កើតមជ្ឈមណ្ឌលបណ្តុះបណ្តាលវិស័យទឹកស្អាតនៅកម្ពុជា។

ក្នុងរយៈពេល ២ថ្ងៃកន្លងមក នៅទីក្រុងសៀងហៃ គណៈប្រតិភូក្រសួងឧស្សាហកម្ម និងសិប្បកម្ម បានជួបប្រជុំពិភាក្សាជាមួយភាគីចិនដែលមកពីស្ថាប័ន និងក្រុមហ៊ុនផ្សេងៗគ្នា ក្នុងនោះរួមមាន៖
-នាព្រឹកថ្ងៃទី២១ ខែកក្កដា ឆ្នាំ២០១៧ ប្រតិភូក្រសួងឧស្សាហកម្ម និងសិប្បកម្ម ដឹកនាំដោយ លោកទេសរដ្ឋមន្ត្រី បានបំពេញទស្សនកិច្ចតំបន់សេដ្ឋកិច្ចពិសេស Caohejing Economic Development Zone ព្រមទាំងមានជំនួបប្រជុំជាមួយលោកអគ្គនាយកក្រុមហ៊ុន Shanghai Mechanical Power Engineering Co., Ltd. នៅទីក្រុងសៀងហៃ ប្រទេសចិន ដេីម្បីពិភាក្សាអំពីការបង្កើតសួនឧស្សាហកម្មទឹកស្អាត និងមជ្ឈមណ្ឌលបណ្តុះបណ្តាលវិស័យទឹកស្អាតនៅខេត្តកែប។

-នារសៀលទី២១ ខែកក្កដា ឆ្នាំ២០១៧ ប្រតិភូក្រសួងឧស្សាហកម្ម និងសិប្បកម្ម ដឹកនាំដោយ លោកទេសរដ្ឋមន្ត្រី បានបន្តការងារជួបជាមួយលោក Yin Bangqi ប្រធានមជ្ឈមណ្ឌល Shanghai Science &Technology Development and Exchange និងជាប្រធានធនាគារបច្ចេកវិទ្យាបៃតង នៅទីក្រុងសៀងហៃ ដើម្បីស្វែងរកថវិកាគាំទ្រការបង្កើតសួនឧស្សាហកម្មទឹកស្អាតនៅកម្ពុជា ដោយប្រើប្រាស់ថវិកាគោលនយោបាយ ផ្លូវមួយខ្សែក្រវ៉ាត់មួយតាមរយៈធនាគារបច្ចេកវិទ្យាបៃតង នៅក្រុងសៀងហៃ។

-នាព្រឹកថ្ងៃទី២២ ខែកក្កដា ឆ្នាំ២០១៧ ក្រុមការងារថ្នាក់កម្រិតបច្ចេកទេសរវាងក្រសួងឧស្សាហកម្ម និងសិប្បកម្ម និងអ្នកជំនាញការទឹកស្អាតក្រុងសៀងហៃ បានប្រជុំពិភាក្សាលើការរៀបចំ កសាងមជ្ឈមណ្ឌលបណ្តុះបណ្តាល និងសួនឧស្សាហកម្មទឹកស្អាត នៅកម្ពុជា ដែលរំពឹងថាបានថវិកាពីធនាគារបៃតង ក្រុងសៀងហៃ។ ក្រៅពីនោះក៏មានការជជែក ពិភាក្សាលើការកសាងនូវខ្សែវីឌីអូផ្សព្វផ្សាយ ឲ្យប្រជាជនបានយល់ដឹងពីគុណ តម្លៃនៃការទទួលបាន និងសារៈប្រយោជន៍នៃការប្រើប្រាស់ទឹកស្អាត។

-នារសៀលថ្ងៃទី២២ ខែកក្កដា ឆ្នាំ២០១៧ លោកទេសរដ្ឋមន្ត្រី បានធ្វើបទបង្ហាញពីស្ថានភាពនៃការកកើត ការវិវត្តន៍រីកចំរើន និងទិសដៅ សម្រាប់ការអភិវឌ្ឍន៍វិស័យទឹកស្អាតនៅកម្ពុជា ជូនដល់ថ្នាក់ដឹកនាំ អ្នកជំនាញការធំៗចិន ផ្នែកទឹកស្អាត នៅក្រុងសៀងហៃ និងបានពិភាក្សាផ្លាស់ប្តូរយោបល់គ្នា លើការបង្កើតមជ្ឈមណ្ឌលបណ្តុះបណ្តាល និងសួនឧស្សាហកម្មទឹកស្អាតនៅកម្ពុជាផងដែរ៕