(កោះកុង)៖ រដ្ឋបាលខេត្តកោះកុង បានចេញសេចក្តីជូនដំណឹងមួយ ដោយបញ្ជាក់ថា នៅថ្ងៃទី៣០ ខែមិថុនា ឆ្នាំ២០១៨ស្អែកនេះ ក្រុមការងារថ្នាក់ក្រសួង និងថ្នាក់ខេត្តនឹងរៀបចំពិធីចាប់ឆ្នោតយកដីឡូតិ៍ និងប្រគល់ថវិកាជូន ប្រជាពលរដ្ឋដែលមានវិវាទដីធ្លីជាមួយក្រុមហ៊ុន Koh Kong Plantation Co.,Ltd និងក្រុមហ៊ុន Koh Kong Suger Industry Co.,Ltd ដែលស្ថិតក្នុងស្រុកស្រែអំបិល និងស្រុកបូទុមសាគរ។

សេចក្តីជូនដំណឹងរបស់រដ្ឋបាលខេត្តកោះកុង ដែលបណ្តាញព័ត៌មាន Fresh News ទទួលបាននៅព្រឹកថ្ងៃទី២៩ ខែមិថុនានេះ បានបញ្ជាក់ថា​ ការចាប់ឆ្នោតយកដីឡូតិ៍ និងថវិកា នឹងត្រូវរៀបចំនៅម៉ោង៨ព្រឹក ថ្ងៃទី៣០ ខែមិថុនា ឆ្នាំ២០១៨ នៅវត្តជីខលើ ឃុំជីខលើ ស្រុកស្រែអំបិល ខេត្តកោះកុង។

រដ្ឋបាលខេត្តកោះកុង បានបញ្ជាក់ទៀតថា ខ្លួននឹងរៀបចំកម្មវិធីដូចខាងក្រោម៖

១៖ បងប្អូនប្រជាពលរដ្ឋក្រុម ១៧០គ្រួសារ ដែលបានយល់ព្រមរួចហើយនោះ សូមអញ្ជើញមកចាប់ឆ្នោតយកដីឡូតិ៍ និងទទួលថវិកា។
២៖ បងប្អូនប្រជាពលរដ្ឋក្រុម៣១៧គ្រួសារ និងក្រុម៩៨គ្រួសារ សូមអញ្ជើញមកចាប់ឆ្នោតយកដីឡូតិ៍ និងទទួលថវិកា តាមការស្ម័គ្រចិត្ត៕