(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅព្រឹកនេះបានសម្តែងការសប្បាយចិត្តរីករាយ ដែលបានអញ្ជើញចូលរួមសម្ពោធ ដាក់ឱ្យប្រើប្រាស់ស្ពានអាកាស មិត្តភាពកម្ពុជា-ចិនសែនសុខ ឬហៅថា «ស្ពានអាកាសផ្សារដីហ៊ុយ» នេះ ដែលមានប្រវែង៩៤២ម៉ែត្រ។
សម្តេចតេជោ ហ៊ុន សែន មានប្រសាសន៍បែបនេះ នៅព្រឹកថ្ងៃចន្ទ ០៥រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០២ ខែកក្កដា ឆ្នាំ២០១៨នេះ នៅក្នុងឱកាសសម្តេចបានអញ្ជើញសម្ពោធដាក់ឱ្យប្រើប្រាស់ជាផ្លូវការ ស្ពានអាកាសមិត្តភាពកម្ពុជា-ចិន សែនសុខ ឬហៅថា «ស្ពានអាកាសផ្សារដីហ៊ុយ» ដែលជាស្ពានអាកាសទី៥ នៅក្នុងរាជធានីភ្នំពេញ។
នាយករដ្ឋមន្ត្រីនៃកម្ពុជា បានប្រសាសន៍យ៉ាងដូច្នេះថា៖ «ថ្ងៃនេះខ្ញុំព្រះករុណា ខ្ញុំពិតជាមានការរីករាយដែលបានចូលរួម ជាមួយសម្តេច ព្រះតេជគុណ ព្រះសង្ឃគ្រប់ព្រះអង្គ ឯកឧត្តមលោកជំទាវ អស់លោក លោកស្រី និងបងប្អូនជនរួមជាតិ សម្ពោធដាក់ឱ្យប្រើប្រាស់នូវស្ពានអាកាស មិត្តភាពកម្ពុជា-ចិន សែនសុខ ប្រវែង៩៤២ម៉ែត្រ ដែលអាចចាត់ទុកថា ជាស្ពានអាកាសវែងជាងគេ នៅក្នុងចំណោមស្ពានអាកាស ដែលយើងបានកសាងក្នុងរយៈពេលកន្លងទៅ»។
ប្រមុខរាជរដ្ឋាភិបាល បានមានប្រសាសន៍បន្តថា ឥណទានដែលប្រើប្រាស់សម្រាប់គម្រោងសាងសង់ស្ពានអាកាសផ្សារដីហ៊ុយនេះ គឺត្រូវបានចុះហត្ថលេខាដែលធ្វើឡើង ក្នុងដំណើរទស្សនកិច្ចផ្លូវការរបស់ប្រធានាធិបតីចិន លោក ហ្ស៊ី ជីនភីង នៅព្រះរាជាណាចក្រកម្ពុជា ហើយស្ពានអាកាសផ្សារដីហ៊ុយមួយនេះ មិនគ្រាន់តែបានចូលរួមដោះស្រាយនូវបញ្ហាការកក់ស្ទុះចរាចរណ៍ នៅតាមបណ្តោយមហាវិថីសហព័ន្ធរុស្ស៊ី នោះទេ ក៏ប៉ុន្តែវាបានភ្ជាប់ទំនាក់ទំនងផ្លូវនេះ ជាមួយខ្សែក្រវ៉ាត់របស់យើង ដែលហៅថាខ្សែក្រវ៉ាត់ទី២ផងដែរ។ ជាមួយគ្នានេះ វាបានតភ្ជាប់ពីទិសខាងជើង ជាមួយទិសខាងត្បូង នៃរាជធានីភ្នំពេញ ដោយអាចចាប់ផ្តើមធ្វើដំណើរតាមរយៈការបញ្ចៀសការកក់ស្ទុះចរាចរណ៍ នៅក្នុងទីក្រុងភ្នំពេញ ដោយចាប់ផ្តើមពីទំនប់កប់ស្រូវ រហូតមកតាមផ្លូវសហព័ន្ធរស្ស៊ីនេះ និងរហូតដល់ស្ពានតាខ្មៅឯណោះ។
ទទ្ទឹមនឹងនេះសម្តេច បានរំលឹកថា «ក្រោយថ្ងៃរំដោះ ៧ មករា ១៩៧៩ សូម្បីតែស្រមៃក៏មិនដែលគិតថា រាជធានីភ្នំពេញ បានរីកលូតលាស់លើគ្រប់វិស័យដូចពេលបច្ចុប្បន្ន នោះឡើយ។ ចំណែកទីតាំងស្ពានអាកាសផ្សារដីហ៊ុននេះ កាលពីទសវត្សឆ្នាំ១៩៨០ គឺជាតំបន់ជនបទមួយដែលមិនទាន់មានការអភិវឌ្ឍនោះទេ ហើយនៅទីក្រុងភ្នំពេញ នៅតាមដងផ្លូវដោយគិតតាមផ្លូវជាតិលេខ៤ ធ្វើដំណើរតាមចេញពីពេទ្យលោកសង្ឃ មកដល់កន្លែងគឺជាជនបទទាំអស់ពោរពេញទៅដោយវាលស្រែ និងផ្ទះរបស់ប្រជាជនតែនៅខាងមុខផ្លូវតែប៉ុណ្ណោះ។ ប៉ុន្តែចប្ចុប្បន្ននេះ នៅសង្ខាងផ្លូវសម្បូរទៅដោយផ្ទះថ្ម និងសំណង់រីកឡើងដូចផ្សិតផងដែរ។
នាយករដ្ឋមន្ត្រី ក៏បានថ្លែងផ្តាំផ្ញើប្រជាពលរដ្ឋដែលរស់នៅតាមបណ្តោយផ្លូវជាតិលេខ៥ ចាប់ពីគល់ស្ពានជ្រោយចង្វារ ដល់ស្ពានព្រែកព្នៅ នឹងមិនមានការពង្រីកទៀតទេ សូមកុំព្រួយបារម្ភ។ រាជរដ្ឋាភិបាល បានបង្ខំចិត្តបញ្ឈប់ពង្រីកកំណាត់ផ្លូវនេះ ដោយសារមានផលប៉ះពាល់ច្រើន ដល់ប្រជាពលរដ្ឋ ដោយគម្រោងពង្រីកផ្លូវនេះបង្វែទៅ ផ្លូវទំនប់កប់ស្រូវជំនួសវិញ។ បញ្ហាពីមុនដោយសារតែរាជរដ្ឋាភិបាលកម្ពុជា បានចុះហត្ថលេខា ជាមួយរាជរដ្ឋាភិបាលចិន កាលនោះដោយចាប់ផ្តើកពង្រីកផ្លូវ៤គន្លង ចាប់ពីគល់ស្ពានជ្រោយចង្វារ រហូតដល់ស្ពានព្រែកក្តាម ក៏ប៉ុន្តែនៅពេលដែលយើងសិក្សាអំពីផលប៉ះពាល់ ចាប់តាំងពីទំនប់កប់ស្រូវ និងនៅស្ពានព្រែកព្នៅ ចូលមកទីក្រុងភ្នំពេញ មានផលប៉ះពាល់ដល់ផ្ទះប្រជាពលរដ្ឋ ព្រះវិហារសាសនា យ៉ាងច្រើនផងដែរ ប្រសិនបើយើងនៅតែកសាងគម្រោងនេះ។
សម្តេចតេជោ ហ៊ុន សែន បានបញ្ជាក់ថា ឆ្នាំនេះក៏ជាខួបលើកទី២០ នៃការបញ្ចប់សង្គ្រាមទាំងស្រុងរបស់កម្ពុជា។ ហើយកម្ពុជា ទើបតែមានលទ្ធភាពអភិវឌ្ឍន៍ពេញលេញ រយៈពេល២០ឆ្នាំប៉ុណ្ណោះ។ ខណៈចិន បានចាប់ផ្តើមអភិវឌ្ឍន៍ ប្រទេសតាំងពីឆ្នាំ១៩៦៩ ហើយធ្វើកំណែទម្រង់ បើកចំហរសេដ្ឋកិច្ចបានរយៈពេល៤០ឆ្នាំ ឯកម្ពុជាទើបតែអភិវឌ្ឍបានតែ២០ឆ្នាំ អញ្ចឹងគឺទាមទារឱ្យកម្ពុជា រត់តាមពីក្រោយចិន២០ឆ្នាំទៀត។ ក៏ប៉ុន្តែដោយសារតែបទពិសោធន៍ កម្ពុជាបានឈានដល់ដំណាក់កាល នៃបច្ចេកវិទ្យាថ្មី សង្ឃឹមថារយៈវេលា ដែលកម្ពុជាបានឆ្លងកាត់នោះ អាចនឹងមានខ្លីជាងនេះ ដែលបានដាក់ចេញនូវគោលដៅ ហើយមកដល់ពេលនេះកម្ពុជា កំពុងតែស្ថិតនៅក្នុងប្រទេស ដែលមានប្រាក់ចំណូល មធ្យមកម្រិតទាប ហើយនឹងក្លាយជាប្រទេសដែលប្រាក់ចំណូលកម្រិតខ្ពស់នៅឆ្នាំ២០៣០ ផងដែរ។
ជាមួយគ្នានេះសម្តេច ក៏សូមអរគុណចំពោះប្រជាពលរដ្ឋ ដែលបានគាំទ្រគណបក្សប្រជាជនកម្ពុជា និងរូបសម្តេច ឱ្យបន្តអភិវឌ្ឍន៍ប្រទេសជាតិ ឱ្យរីកចម្រើនលើគ្រប់វិស័យផងដែរ។ ចំណែកការបង្កើតឱ្យមានធនាគារវិនិយោគហេដ្ឋារចនាសម្ព័ន្ធអាស៊ី គឺជាការឆ្លើយតបតម្រូវការសាងសង់ ប្រព័ន្ធហេដ្ឋារចនាសម្ព័ន្ធ នៅតាមបណ្តាប្រទេសជាសមាជិក៕
