(ភ្នំពេញ)៖ និស្សិត និងអ្នកជំនាញជាង១០នាក់ បានចូលរួមក្នុងសន្និសីទអន្តរជាតិ ប្រចាំឆ្នាំលើកទី៣ ស្តីអំពី សេវាសុខភាពពីចំងាយ នៅថ្ងៃទី២ ខែកក្កដា ឆ្នាំ២០១៨ នៅឯមជ្ឈមណ្ឌលសិក្សាស្រាវជ្រាវ ហ្វ្រង់កូហ្វូនប្រចាំទីក្រុងភ្នំពេញ(CNF-PP)។
សន្និសីទនេះរៀបចំឡើងដោយមូលនិធិព្យែហ្វាប (Pierre Fabre) នៅឯទីស្នាក់ការកណ្តាលរបស់ខ្លួន នៅប្រទេសបារាំង និងធ្វើការផ្សាយបន្តផ្ទាល់នៅតាមមជ្ឈមណ្ឌលស្រាវជ្រាវ ហ្វ្រង់កូហ្វូនប្រមាណ ២០នៅទូទាំងពិភពលោក ក្នុងនោះ ក៏មានមជ្ឈមណ្ឌលហ្វ្រង់កូហ្វូន ចំនួន៤ក្នុងតំបន់អាស៊ីប៉ាស៊ីហ្វិក (ទីក្រុងហាណូយ វៀងច័ន្ទ ភ្នំពេញ ហូជីមិញ)។
ការធ្វើបទបង្ហាញ និងការជជែកពិភាក្សាគ្នា បានប្រព្រឹត្តទៅនៅប្រទេសបារាំង និងតាមរយៈវីដេអូកុងហ្វេរ៉ង់ដោយមានការសហការណ៍ជាមួយទីភ្នាក់ងារឧត្តមសិក្សាប្រើភាសាបារាំង(AUF)។
សន្និសីទផ្តោតលើប្រធានបទ៖ «ការប្រើប្រាស់បទពិសោធន៍នៅថ្នាក់មូលដ្ឋាន ដើម្បីការអភិវឌ្ឍន៍ជារួម»។
ក្នុងទិវាសន្និសីទអន្តរជាតិនេះ មានការរៀបចំធ្វើបទបង្ហាញជាច្រើន ដោយអ្នកជំនាញអន្តរជាតិ អ្នកដឹកនាំគំរោងនៅតាមបណ្តាប្រទេសជាច្រើន នៅក្នុងតំបន់អាស៊ី និងអាហ្វ្រិកបានលើកឡើងអំពីការ អនុវត្តន៍ជាក់ស្តែង ក្នុងការផ្តល់សេវាសុខភាពដោយប្រើប្រាស់ ឧបករណ៍អេឡិចត្រូនិកឬឧបករណ៏ទំនាក់ទំនង និង Smart Phone ក្នុងការគ្រប់គ្រង និងតាមដានសុខភាពអ្នកជំងឺប្រកបដោយប្រសិទ្ធិភាព នៅតាមតំបន់ដាច់ស្រយាលមួយចំនួន ដែលខ្វះមន្ទីរពេទ្យ និងជាតំបន់ដែលជួបការលំបាកក្នុងការផ្តល់សេវាសុខភាព ដូចជា បញ្ហាហេដ្ឋារចនាសម្ព័ន្ធ កង្វះថាមពល ធនធានហិរញ្ញវត្ថុរបស់រដ្ឋមានកំណត់ បញ្ហាទំនាក់ទំនង។ល។ និងជាពិសេសគឺការកាត់បន្ថយគ្រោះថ្នាក់ដល់សុខភាព។
គ្រូពេទ្យឯកទេសប្រព័ន្ធប្រសាទ នៃប្រទេសកាមរូនក៏បានបង្ហាញនូវវិធីតាមដានអ្នកជំងឺបេះដូង និងប្រព័ន្ធប្រសាទជាមួយឧបករណ៍ច្នៃប្រឌិតដែលផ្តល់នូវព័ត៌មានគួរជាទីទុកចិត្ត។ អ្នកជំនាញមកពីប្រទេស ឥណ្ឌា បង្ហាញនូវពីវិធីសាស្ត្ររបស់ខ្លួនការតាមដានជំងឺគ្រុនចាញ់។ ប្រទេសជាច្រើនទៀតដូចជាបង់ក្លាដែស នេប៉ាល់ អាហ្វ្រិក ជាដើមសុទ្ធតែបង្ហាញ នូវបទពិសោធន៍របស់ខ្លួន នៅតាមមូលដ្ឋានប្រកបដោយប្រសិទ្ធិភាព។
ដូចឆ្នាំមុនដែរ កម្មវិធីនេះបានផ្តល់រង្វាន់ដល់គ្រូពេទ្យ និងអ្នកដឹកនាំគំរោងនានាដែលទទួលបានជោគជ័យ ក្នុងនោះក៏មានប្រឆាំងជំងឺរបេងនៅកម្ពុជារបស់អង្គការ Opération AHSA មកពីប្រទេសឥណ្ឌា ផងដែរ។ គំរោងទាំងឡាយនឹងត្រូវដាក់បញ្ចូលក្នុងគេហទំព័រ www.odess.io បង្កើតឡើងដោយមូលនិធិព្យែហ្វាប (Pierre Fabre) ក្នុងគោលបំណងកំណត់ការចងក្រងឯកសារ ជំរុញការផ្សព្វផ្សាយ និងជួយអភិវឌ្ឍគំនិតផ្តួចផ្តើមលើការគ្រប់គ្រងការផ្តល់សេវាសុខភាព ដែលជួយដល់ប្រជាជនក្រីក្រឲ្យទទួលបានការព្យាបាលប្រកបដោយប្រសិទ្ធិភាព និងគុណភាពនៅតាមប្រទេសក្រីក្រ នៃភាគខាងត្បូង៕
