(អាមេរិក)៖ លោក John Owen Brennan កើតនៅថ្ងៃទី២២ ខែកញ្ញា ឆ្នាំ១៩៥៥ បច្ចុប្បន្នជាប្រធានភ្នាក់ងារស៊ើបអង្កេតកណ្តាល របស់សហរដ្ឋអាម៉េរិក ហៅកាត់ថា CIA។ លោកជាកូនប្រុសរបស់ជនអន្តោប្រវេសន៍ ដែលធ្វើដំណើរពីតំបន់ Roscommon ប្រទេសអៀឡង់។ លោក Brennan រៀបការជាមួយលោកស្រី Kathy Pokluda Brennan ហើយមានកូនបីនាក់ ក្នុងនោះមានកូនប្រុសម្នាក់ និងកូនស្រីភ្លោះពីរនាក់។
កាលពីនៅវ័យក្មេង លោកធ្លាប់ចូលរៀននៅសាលា Heart of Mary និងបញ្ចប់ការសិក្សាពីសាលា Saint Joseph ក្នុងនៅរដ្ឋ New Jersey ក្រោយមកលោកក៏ចូលរៀន នៅសកលវិទ្យាល័យ Fordham University នៅទីក្រុងញ៉ូវយក និងចាប់យកជំនាញវិទ្យាសាស្ត្រនយោបាយ។ លោកជាមនុស្សម្នាក់ដែលអាចនិយាយភាសាអារ៉ាប់ បានយ៉ាងស្ទាត់ជំនាញ។ ប្រធានភ្នាក់ងារស៊ើបអង្កេតរូបនេះបានឲ្យដឹងថា តាមដែលលោកចាំបាន ក្នុងពេលជិះលើរថយន្តក្រុងទៅសាលាលោកធ្លាប់អានព័ត៌មានដែលផ្តល់ដំណឹង ស្តីពីការជ្រើសរើសបុគ្គលិក CIA លោកពិតជារំភើបដោយសារការងារនេះ ស្របជាមួយនឹងក្តីស្រមៃ និងឆន្ទៈរបស់លោក ដោយលោកមានបំណងចង់បម្រើការងារ ផ្នែកសេវាកម្មសាធារណៈបែបនេះ។
ដោយកិច្ចខិតខំប្រឹងប្រែង ធ្វើឲ្យលោក Brennan ក៏អាចធ្វើនៅ CIA បានសម្រេចដូចបំណង។ លោកបានចំណាយពេលរហូតជាង ២៥ឆ្នាំជាមួយ CIA លើផ្នែកផ្សេងៗដូចជា អ្នកវិភាគ ប្រធានស្នាក់ការ CIA នៅប្រទេសអារ៉ាប៊ីសាអូឌីត ប្រធានមជ្ឈមណ្ឌលជាតិប្រឆាំងភេវរករជាដើម។ មុនពេលក្លាយជាប្រធានភ្នាក់ងារ CIA លោកក៏ធ្លាប់ជាប្រធានមជ្ឈមណ្ឌលជាតិប្រឆាំងភេវរករ និងជាក្រុមប្រឹក្សាសន្តិសុខសហរដ្ឋអាម៉េរិក និងជាជំនួយការរបស់ប្រធានាធិបតីសហរដ្ឋអាម៉េរិកផងដែរ។ ភារៈកិច្ចរបស់លោក គឺត្រួតពិនិត្យគម្រោងដើម្បីការពារប្រទេស ពីការវាយប្រហារដោយក្រុមភេវរករ និងគ្រោះមហន្តរាយ ព្រមទាំងមានតួនាទីត្រូវជួបជាមួយប្រធានាធិបតីជារៀងរាល់ថ្ងៃ។
កាលពីមុនលោក ត្រូវបានដកចេញពីបញ្ជីឈ្មោះបេក្ខជន ដែលពិចារណាតែងតាំងធ្វើប្រធានរបស់ភ្នាក់ងារ CIA ដោយបារម្ភខ្លាចថា លោកជាមនុស្សម្នាក់ពាក់ព័ទ្ធ ឬគាំទ្រចំពោះការប្រើប្រាស់ ទារុណកម្មព្រៃផ្សៃផ្សេងៗទៅលើអ្នកទោសដូចជា Waterboard ជាដើម (ជាប្រភេទទារុណកម្មដ៏ព្រៃផ្សៃ គ្របក្រណាត់លើមុខ ហើយចាក់ទឹកពីលើ ដើម្បីឲ្យជនរងគ្រោះពិបាកដកដង្ហើម)។ ក្រោមការដឹកនាំរបស់រដ្ឋាភិបាលលោក George W.Bush ភ្នាក់ងារ CIA ត្រូវបានគេចោទប្រកាន់ថា ធ្លាប់ធ្វើទារុណបែបនេះទៅលើអ្នកទោស ។ ហេតុនេះ លោក Brennan ត្រូវបានតែងតាំងត្រឹមជាតំណាង អ្នកប្រឹក្សាសន្តិសុខជាតិជំនួសវិញ ដោយសារតួនាទីនេះ មិនចាំបាច់ត្រូវការសេចក្តីសម្រេចពីសភាសហរដ្ឋអាម៉េរិក។
យ៉ាងនេះក្តីតែនៅថ្ងៃទី៧ ខែមករា ឆ្នាំ២០១៣កន្លងទៅនេះ លោក អូបាម៉ា បានតែងតាំងលោកជាប្រធាន CIA ហើយលោកបានស្បថចូលកាន់ដំណែងជាប្រធានរបស់ CIA ក្នុងថ្ងៃទី០៨ ខែមីនា ឆ្នាំ២០១៣កន្លងទៅនេះ។
មុនពេលក្លាយជាប្រធាន CIA សហគមន៍ ACLU បានស្នើសភាមិនឲ្យចេញសេចក្តីសម្រេច លើការតែងតាំងរបស់លោក ដោយរង់ចាំរហូតដល់រកឃើញថា ទង្វើទាំងអស់របស់លោក មិនផ្ទុយពីច្បាប់របស់ CIA និងសេតវិមាន។ លោកត្រូវបានទទួលស្គាល់ ដោយគណៈកម្មាធិការស៊ើបអង្កេតរបស់សភាអាម៉េរិក នៅថ្ងៃទី០៥ ខែមីនា ឆ្នាំ២០១៣ ហើយបានសម្រេចតែងតាំងលោកធ្វើជាប្រធាន CIA បន្តដំណែងពីលោក David Petraeus តាមរយៈការបោះឆ្នោត ដោយទទួលបានសម្លេងគាំទ្រ ១២សម្លេងទល់នឹង ៣សម្លេង។
សូមជម្រាបថា ក្នុងអាណត្តិរបស់លោកក្នុងនាមជាប្រធានរបស់ CIA មានរឿងអាស្រូវមួយចំនួនកើតឡើងដូចជា ភ្នាក់ងារ CIA បាន hack ចូលទៅក្នុងប្រព័ន្ធកុំព្យូទ័ររបស់បុគ្គលិកសភាអាម៉េរិក និងការចេញរបាយការណ៍ ស្តីពីការធ្វើទណ្ឌរបស់ក្រុម CIA ទៅលើអ្នកទោសជាដើម៕