(សេដ្ឋកិច្ច)៖ Starbucks Corporation ត្រូវបានមហាជនភាគច្រើនស្គាល់ថា «Starbucks Coffee» ជាក្រុមហ៊ុនកាហ្វេអាមេរិក ដែលមានមូលដ្ឋាននៅក្នុងទីក្រុងវ៉ាស៊ីនតោន សហរដ្ឋអាមេរិក
ហើយក៏ជាហាងកាហ្វេដែលធំជាងគេបំផុតនៅលើពិភពលោក ដោយមានគូប្រជែងធំជាងគេគឺ «Costa Coffee» ។ បច្ចុប្បន្ន Starbucks មានហាងចំនួន ២១.១៦០កន្លែងនៅទូទាំងពិភពលោក ដោយក្នុងនោះ មាន ១២.០៦៧កន្លែង មានទីតាំងនៅសហរដ្ឋអាមេរិក មាន ១.៥៧០កន្លែង ក្នុងប្រទេសចិន មាន ១.៤៥១កន្លែង នៅប្រទេសកាណាដា មាន ១.០៧០កន្លែង នៅប្រទេសជប៉ុន មាន ៧៩៣កន្លែង នៅចក្រភពអង់គ្លេស និងមាន ៧២០កន្លែង នៅក្នុងប្រទេសកូរ៉េខាងត្បូង។
តើហាងកាហ្វេដ៏ល្បីលំដាប់ពិភពលោក «Starbucks» មានប្រវត្តិយ៉ាងដូចម្តេច ?
Starbucks ត្រូវបានបង្កើតដំបូងនៅថ្ងៃទី៣០ ខែមីនា ឆ្នាំ១៩៧១ ដោយមានម្ចាស់ភាគហ៊ុន ៣នាក់ គឺលោក Jerry Baldwin ជាគ្រូបង្រៀនភាសាអង់គ្លេស លោក Zev Siegl ជាគ្រូបង្រៀន ប្រវត្តិសាស្ត្រ និងលោក Gordon Bowker ជាអ្នកនិពន្ធ។ នៅមុនពេលប្រើឈ្មោះថា "Starbucks" ពួកគេទាំង ៣នាក់បានជ្រើសរើសឈ្មោះជាច្រើន ប៉ុន្តែត្រូវបានច្រានចោលដោយសមាជិក រហូតដល់ជាចុងក្រោយ លោក Bowker បានបញ្ជាក់ថាត្រូវបានប្រើពាក្យ "St" នៅពីមុខព្រោះថាពាក្យនេះមានន័យ រួចក៏សម្រេចចិត្តជ្រើសរើសយកឈ្មោះថា «Starbucks» តែម្ដង។
នៅពេលដំណើរការដំបូង Starbucks មិនទាន់ផ្ដោតសំខាន់តែកាហ្វេនោះទេ ប៉ុន្តែក្រោយមកពួកគេទាំង ៣នាក់ក៏បានយល់ឃើញថា កាហ្វេជាភេសជ្ជមួយដែលមនុស្សគ្រប់រូប គ្រប់វ័យតែងតែទទួលទាន ដូច្នេះហើយ ពួកគេសម្រេចចិត្តជ្រើសរើស យកកាហ្វេដែលល្អមកលក់។ បើទោះបីជាការលក់មិនសូវជាល្អចាប់តាំងពីឆ្នាំ ១៩៨០ មកក្ដី ប៉ុន្តែពួកគេទាំង ៣នាក់ មិនបានបោះបង់ចោលឡើយ រហូតដល់ឆ្នាំ ១៩៨៩ ពួកគេបានពង្រីកកន្លែងបាន ៤៦ ហើយនៅខែមិថុនា ឆ្នាំ១៩៩២ ហាងកាហ្វេមួយនេះ បានចាប់ផ្ដើមលក់ភាគហ៊ុន IPO រហូតពង្រីកបាន ១៤០កន្លែង និងរកប្រាក់ចំណូលបាន ៧៣,៥លានដុល្លារអាមេរិក ដែលកាលពីឆ្នាំ ១៩៨៧ រកបានត្រឹមតែ ១,៣លានដុល្លារអាមេរិកប៉ុណ្ណោះ។
ខណៈពេលនោះផងដែរ ស្លាកសញ្ញា Starbucks ក៏ចាប់ផ្ដើមមានតម្លៃរហូតដល់គណៈកម្មាការវាយតម្លៃស្លាកសញ្ញាពិភពលោក បានឲ្យតម្លៃកាហ្វេ Starbucks រហូតដល់ ២៧១លានដុល្លារអាមេរិក។
នៅឆ្នាំ២០១៣ កាហ្វេ Starbucks បានបន្ថែមសេវាកម្មថ្មី គឺអាចឲ្យអតិថិជនរបស់ខ្លួនធ្វើការបញ្ហាទិញកាហ្វេតាមរយៈទូរស័ព្ទដៃជាមួយនឹងកម្មវិធី Starbucks app ហើយក៏ចាប់ផ្ដើមផ្សព្វផ្សាយនៅលើបណ្ដាញ Twitter ផងដែរ ដោយទទួលបានកាតបញ្ចុះតម្លៃ ៥ដុល្លារសម្រាប់ការបង្ហោះសារនៅលើ Twitter របស់ Starbucks។
ក្រៅពីពង្រីកខ្លួនចូលទៅកាន់ទីផ្សារ អ៉ឺរ៉ុប Starbucks ក៏បានវាយលុកតំបន់ទីផ្សារអាស៊ី ដោយនៅក្នុងឆ្នាំ ២០១៤ កន្លងទៅនេះ Starbucks បានបើកហាងកាហ្វេចំនួន ៤កន្លែងក្នុងទីក្រុងហាណូយ ប្រទេសវៀតណាម ហើយក៏មានព័ត៌មានថា នៅក្នុងឆ្នាំ ២០១៥ នេះ Starbucks នឹងមានវត្តមានលើទីផ្សារកម្ពុជាផងដែរ។
គួរបញ្ជាក់ផងដែរថា បច្ចុប្បន្ន Starbucks មានលោក Howard Schultz ជាប្រធានក្រុមប្រឹក្សាភិបាល និងជានាយកប្រតិបត្តិ ដោយកាលពីឆ្នាំ ២០១៣ ទទួលបានប្រាក់ចំណូល ១៤,៨៩ពាន់លានដុល្លារអាមេរិក និងចំណេញសុទ្ធចំនួន ៩លានដុល្លារអាមេរិក ហើយមានក្រុមហ៊ុនចំនួន ៩ជាបុត្រសម្ព័ន្ធ ក្នុងនោះរួមមាន Ethos water, Evolution Fresh, Hear Music, La Boulange Bakery, Seattle's Best Coffee, Tazo ,Teavana និង Torrefazione Italia៕
