(ភ្នំពេញ)៖ តារាចម្រៀងពោរពេញដោយទេពកោសល្ យដែលកំពុងតែទទួលបានការចាប់អារម្មណ៍ពីសំណាក់ទស្សនិកជន លោក ពៅ គឹមអូន ហៅកាត់ថា OUN (អូន) បានចេញនូវអាល់ប៊ុមដំបូងរបស់ខ្លួនកាលពីថ្ងៃទី១៥ ខែកញ្ញា ឆ្នាំ ២០១៨កន្លងទៅនេះ ដែលជាកិច្ចសហការគ្នាជាមួយនឹងផលិតកម្មបារមី (Baramey Production) ដោយតភ្ជាប់ជាមួយនឹងយុវវ័យតាមរយៈសារសង្គមរបស់ខ្លួន ក៏ដូចជាការលើកយកបញ្ហាមករៀបរាប់តាមរយៈបទចម្រៀងផងដែរ។
អាល់ប៊ុមរបស់អូន ដែលមានឈ្មោះថា «សម្លឹងរកស្នេហ៍» ដែលក្នុងនោះមានបទចម្រៀងOriginal ចំនួន៦ រួមជាមួយនឹងសារមួយដ៏សំខាន់ បានធ្វើការបើកសម្ពោធយ៉ាងឱឡារិក ដែលមានការចូលរួមសម្តែងពីសំណាក់សិល្បៈករល្បីៗដូចជា ឡរា ម៉ម (Laura Mam) និង ក្មេងខ្មែរ (Kmeng Khmer) ក្រុមរាំខ្នាតអន្តរជាតិចំនួនបីក្រុម និងអ្នករាំបែប Hip-hop ជាច្រើននាក់ រួមបញ្ចូលជាមួយនឹងឧបករណ៍ភ្លេងខ្មែរ ឃឹម ដើម្បីបន្ថែមទៅលើពិធីសម្ពោធនេះឲ្យកាន់តែពិសេសអស្ចារ្យទៀត។
សម្រាប់បទចម្រៀងទាំង ៦បទនេះ រួមបញ្ចូលស្ទីលខុសៗគ្នា ពីចម្រៀងបែប Rap និងអន្លង់អន្លោច ឆ្លុះបញ្ចាំងពីជីវិតប្រចាំថ្ងៃ ដោយប្រើប្រាស់រយៈពេលអស់ជាងមួយឆ្នាំក្នុងការសរសេរ និងផលិត។ បទចម្រៀងមួយមានចំណថា «តម្លៃជីវិត» រៀបរាប់អំពីការថ្លឹងថ្លែងរវាងការខិតខំធ្វើការ និងការកំសាន្ត។ ចំណែកឯបទមួយចំនួនទៀត ផ្តោតលើសារអប់រំនៅក្នុងសង្គមភាគច្រើន គឺបទ «ស្រោម» ដែលផ្អែកសំខាន់លើប្រធានបទនៃការអប់រំផ្លូវភេទ ដែលនៅក្នុងនោះ អូនបានរៀបរាប់តាមរយៈឃ្លាចម្រៀងពីផលវិបាកដែលគូស្នេហាមួយគូរត្រូវប្រឈមមុខជាមួយបញ្ហាជាច្រើន ក្រោយពីពួកគេមិនបានប្រុងប្រយ័ត្ន។
នៅក្នុងពេលសម្តែងបទចម្រៀងនេះ ស្រោមអនាម័យត្រូវបានបោះទៅកាន់ទស្សនិកជនជាច្រើន ដែលបង្កឲ្យមានការហ៊ោកញ្ជ្រៀវយ៉ាងខ្លាំងក្លា។ អូនកំពុងតែគាំទ្រយុទ្ធនាការរបស់ Marie Stopes អំពីប្រធានបទ «សិទិ្ធក្នុងការជ្រើសរើស» ដែលមានបំណងចង់ផ្តល់កម្លាំងចិត្តដល់នារីៗវ័យក្មេង ក្នុងការក្តោបក្តាប់ និងគ្រប់គ្រងជីវិតផ្លូវភេទរបស់ពួកគេឲ្យបានត្រឹមត្រូវ។
នៅក្នុងកម្មវិធីសម្ពោធនេះដែរ អ្នកចម្រៀង និងអ្នកនិពន្ធបទភ្លេងសញ្ចាតិខ្មែរ ឡរា ម៉ម ដែលជាអ្នកដឹកនាំផលិតកម្ម បារមី បានថ្លែងថា៖ «ការចេញជាអាល់ប៊ុមលើកដំបូងរបស់អូន គឺជាសញ្ញាណនៃភាពជោគជ័យមួយរបស់យើង។ យើងខ្ញុំកំពុងតែខំប្រឹងប្រែងសហការជាមួយ នឹងដៃគូនៅក្នុងវិស័យជាមួយគ្នានេះ ដើម្បីស្តារកេរ្តិ៍តំណែលរបស់កម្ពុជានៅក្នុងពិភពលោកឡើងវិញ ក្នុងផ្នែកចម្រៀង និងសិល្បៈសម្តែង»។
អ្នកដឹកនាំផលិតកម្ម បារមី បានបន្តថា «សម្រាប់អូន គឺជាតារាដែលខាងផលិតកម្មកំពុងតែធ្វើឲ្យគាត់ទទួលបានការទទួលស្គាល់កាន់តែច្រើនពីសំណាក់ទស្សនិកជន ដែលហ្នឹងជះឥទ្ធិពលដល់ វិស័យបទចម្រៀងOriginal នៅប្រទេសកម្ពុជា។
ដោយមានការជំរុញទឹកចិត្តពីតារាចម្រៀង Rap ឈ្មោះថា អាពីង(Ah Ping) តាំងពីក្មេងមក ចំណេះដឹងលើចម្រៀងដែល អូនមានសព្វថ្ងៃ សុទ្ធសឹងតែរៀនពីសិល្បៈករមួយនេះទាំងអស់។ បទចម្រៀងរបស់ Ah Ping មានបណ្តុះគំនិតឲ្យអូនចង់មានអាជីពក្នុងវិស័យចម្រៀងនេះ ជំនួសឲ្យក្តីស្រមៃពីមុនរបស់អូនដែលចង់ក្លាយជាសាស្រ្តាចារ្យខាងអក្សរសាស្រ្ត។
ហេតុនេះហើយ បន្ទាប់ពីរៀនចប់ថ្នាក់ទី ១២មក អូនចាប់ផ្តើមដើរតាមក្តីស្រមៃរបស់ខ្លួន ដោយមិនត្រឹមតែសិក្សាដោយខ្លួនឯងប៉ុណ្ណោះទេ ថែមទាំងរៀនសូត្រពីអ្នកចម្រៀងអាជីពល្បីៗនៅក្នុងវិស័យនេះ ដូចជាកញ្ញា ឡរា ម៉ម ដែលដឹកនាំផលិតកម្មបារមីជាដើម។ បទចម្រៀងដំបូងរបស់អូនមានចំណងជើងថា «ស្នេហ៍ស្មោះជូនអូន» ទទួលបានភាពជោគជ័យយ៉ាងខ្លាំង ហើយថ្មីៗនេះលោកក៏បានចេញបទនេះជាលក្ខណៈ remix។
គួរំលឹកថា ប្រជាជនខ្មែរភាគច្រើនចូលចិត្តឲ្យតម្លៃហួសហេតុដល់សិល្បៈករនៅប្រទេសដទៃជៀសជាងប្រទេសខ្លួន។ បទចម្រៀងមួយរបស់ ឡរា ម៉ម ដែលមានចំណងជើងថា «រាំមិនឆ្អែតទេ» បានផ្ទុះការគាំទ្រូយ៉ាងខ្លាំងនៅប្រទេសថៃ។ ពេលដែលជនជាតិថៃបានមើលបទនោះ ពួកគេចូលចិត្ត ហើយក៏ចែករំលែកបន្តទើបបទចម្រៀងនេះចាប់ផ្តើមល្បីនៅប្រទេសកម្ពុជា ត្រូវតែប្រឹងប្រែងជាមួយគ្នានៅក្នុងវិស័យនេះ ដើម្បីធ្វើឲ្យបទចម្រៀង Original ដែលផលិតនៅប្រទេសកម្ពុជាឈានទៅមុខមួយកម្រិតទៀត៕
