(ព្រះសីហនុ)៖ ក្មេងស្រីម្នាក់ដែលបា​នរួចផុតពីគ្រោះថ្នាក់ដ៏តក់ស្លុត នៅបឹងព្រែកទប់ ក្រុង-ខេត្តព្រះសីហនុ ដោយសារតែនាង និងប្អូនរបស់នាង មិនបានចូលទៅជិះទូក ជាមួយក្មេងរងគ្រោះឯទៀត បានរៀបរាប់នូវហេតុការណ៍ និងមូលហេតុដែលនាំ​ឲ្យលង់ទឹកស្លាប់ នាព្រឹកថ្ងៃទី២៨ ខែកុម្ភៈ ឆ្នាំ២០១៧នេះ។ នាងបាននិយាយថា ពេលពួកគេនាំគ្នាទៅលេងទឹក និងចុះជិះទូកត្នោតនោះ នាងមិនបានឡើងទូកជាមួយនោះទេ ហើយថែមទាំងទាញដៃប្អូនរបស់នាងមកលើគោកទៀតផង ជាហេតុនាំឲ្យរួចពីសេចក្តីស្លាប់។​

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់ថា ហេតុការណ៍នេះ បានកើតឡើង​ដោយមានក្មេងចំនួន១០នាក់ ក្នុងនោះប្រុសម្នាក់ អាយុ៧ឆ្នាំ ដល់១៣ឆ្នាំ បាននាំគ្នាចុះងូតទឹកលេងបណ្តាលឲ្យលង់ស្លាប់៧នាក់ ហើយ៣នាក់ទៀត ប្រុសម្នាក់ត្រូវបានជួយសង្គ្រោះទាន់ពេល។

លោកឧត្តមសេនីយ៍ស្នងការបានបន្តទៀតថា «ករណីនេះកម្លាំងជំនាញកំពុងពិនិត្យកន្លែងកើតហេតុ និងចូលរួមធ្វើ​កោលវិច្ច័យលើ សាកសព នៅមន្ទីរពេទ្យបង្អែកខេត្ត ពីព្រោះតាមព័ត៌មានពីសាក្សី គឺក្មេងៗរងគ្រោះទាំងនោះ ដែលមានទីលំនៅក្បែរបឹងព្រែកទប់ តែងតែចុះទៅលេងទឹកនេះ ជាប្រចំាតែមិនកើតអី ចុះហេតុអ្វីនៅថ្ងៃនេះ បែរជាជួបគ្រោះថ្នាក់ទៅវិញ ដែលកម្លាំងជំនាញកំពុងបន្តស្រាវជ្រាវ»។

បើតាមគ្រូពេទ្យបង្អែកខេត្តព្រះសីហនុ បានឲ្យដឹងថា មុនពេលកើតហេតុក្មេងរងគ្រោះទាំង១០នាក់ បាននាំគ្នាចុះលេងទឹក និងជិះទូកត្នោតស្រាប់តែ ទូកត្នោតនោះលិចបណ្តាលឲ្យពួកគេ៧នាក់លង់ស្លាប់តែម្តង សង្ស័យអាចទាក់ជាមួយកំប្លោក ខណៈ៣នាក់ទៀត ត្រូវបានជួយសង្គ្រោះទាន់។

ជាមួយគ្នានេះ អភិបាលខេត្តព្រះសីហនុ លោក យន្ត មីន បន្ទាប់ពីកើតហេតុភ្លាមៗ បានដឹកនាំមន្រ្តីជំនាញចុះទៅពិនិត្យ និងជួយអន្តរាគមន៍ភ្លាមៗផងដែរ។

យោងតាមរបាយការណ៍របស់នគរបាលមូលដ្ឋាន បានបង្ហាញថា ក្មេងរងគ្រោះទាំង៧នាក់ រួមមាន៖ ទី១៖ ឈ្មោះ សិត ស្រម៉ៅ ភេទស្រី អាយុ៦ឆ្នាំ ទី២៖ ឈ្មោះ ពោល គា ភេទស្រី អាយុ១០ឆ្នាំ ទី៣៖ ឈ្មោះ ហួរ ស្រីគឹម ភេទស្រី អាយុ៧ឆ្នាំ ទី៤៖ ឈ្មោះ ច្រាំង ស៊ីអ៊ី ភេទស្រី អាយុ១៣ឆ្នាំ ទី៥៖ ឈ្មោះ ជា សុខនឿន ភេទស្រី អាយុ៧ឆ្នាំ​ ទី៦-ឈ្មោះ ម៉េង ស្រីនុច ភេទស្រី អាយុ៦ឆ្នាំ និងទី៧៖ ឈ្មោះ ហ៊ឹម ស្រីម៉ឺប ភេទស្រី អាយុ៧ឆ្នាំ។

សម្រាប់សពក្មេងស្រីទាំង៧នាក់ និងក្មេងរងគ្រោះដែលជួយសង្គ្រោះទាន់ ត្រូវបានសមត្ថកិច្ចតម្កល់ទុក និងព្យាបាលនៅក្នុង មន្ទីរពេទ្យបង្អែកខេត្តព្រះសីហនុ ដើម្បីត្រៀមប្រគល់ជូនក្រុមគ្រួសារនៃសព យកទៅធ្វើបុណ្យតាមប្រពៃណី៕

បឹងព្រែក​ទប់