(កំពង់ធំ)៖ លោកឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី និងលោកស្រី នៅព្រឹកថ្ងៃទី២៨ ខែមេសា ឆ្នាំ២០១៨ បានអញ្ជើញសម្ពោធភូមិគំរូ ដែលមានផ្ទះ២១ខ្នង មានតម្លៃសរុប១០ម៉ឺនដុល្លារ នៅភូមិដូនប៉ែន ឃុំបឹង ស្រុកបារាយណ៍ ខេត្តកំពង់ធំ ដែលជាការសម្ពោធលើកទី១។
នៅភូមិគំរូស្រដៀងគ្នា នៅទីតាំងជាប់គ្នាមួយទៀត ដែលមានផ្ទះចំនួន៤០ខ្នងទៀត ដែលមានទាំងសាលារៀន១ខ្នង វិហារ១ មានតម្លៃសរុប៤០ម៉ឺនដុល្លារ កំពុងសាងសង់នៅលើផ្ទៃដី១៣,០០០ម៉ែត្រក្រឡា ហើយនឹងរួចរាល់នាពេលឆាប់ៗនេះ។
ភូមិគំរូដែលមានខ្ទះ២១ខ្នង ត្រូវបានប្រកាសសម្ពោធនៅពេលនេះ សង់នៅលើផ្ទៃដី ប្រមាណ៤,០០០ម៉ែត្រក្រឡា ផ្ទះនីមួយៗមានទំហំ ៥ម៉ែត្រ គុណ៧ម៉ែត្រ
សង់អំពីឈើ ផ្ទាល់ដី ចាក់សាបស៊ីម៉ង់ ជាអំណោយរបស់សប្បុរសជន គុយវ៉ែត តាមរយៈសមាគមសម្របសម្រួលសង្គម នៃរដ្ឋគុយវ៉ែត សហការជាមួយ សមាគមសប្បុរសធម៍ដើម្បីអភិវឌ្ឍន៍កម្ពុជា។
លោក Eed Mohammed Al Ajmi តំណាងម្ចាស់ជំនួយ បានកោតសរសើរសមាគមដៃគូរក្នុងស្រុក កោតសរសើរថ្នាក់ដឹកនាំគ្រប់លំដាប់ថ្នាក់ ជាពិសេស រាជរដ្ឋាភិបាលកម្ពុជា ដែលជានិច្ចកាលតែងតែផ្តល់ការសហការយ៉ាងល្អប្រសើរ ជាមួយអង្គការសប្បុរសជន មកពីប្រទេសរបស់លោក ធ្វើឲ្យគម្រោងមួយនេះ ក៏ដូចជាគម្រោងផ្សេងៗ របស់រដ្ឋាភិបាលគុយវ៉ែត បាននិងកំពុងបោះជំហានទៅមុខប្រកបដោយភាពកក់ក្តៅ និងជោគជ័យធំធេងសម្រាប់ប្រជាជាតិកម្ពុជា។
លោកឧកញ៉ា អូស្មាន ហាស្សាន់ ក្នុងនាមថ្នាក់ដឹកនាំ ដែលជួសមុខឲ្យរាជរដ្ឋាភិបាលកម្ពុជា ក្នុងការចូលរួមជ្រោមជ្រែង សម្រួលនូវដំណើរការប្រព្រឹត្តទៅ រាល់គម្រោងនានារបស់អង្គការនេះ បានកោតសរសើរដល់អង្គការដៃគូរទាំង២ និងថ្លែងអំណរគុណដល់តំណាងម្ចាស់ជំនួយ ជនជាតិគុយវ៉ែត ដែលបានបរិច្ចាកថវិការបស់ខ្លួន ដោះទុក្ខលំបាកដល់គ្រួសារទាំង២១ របស់អ្នកឃុំបឹង ដែលទីទ័លពិតប្រាកដ ហើយគ្មានលំនៅដ្ឋាន។
លោកឧកញ៉ា អូស្មាន ហាស្សាន់ ក៏បានប្រកាសផងដែរ តាមរយៈអង្គការដៃគូរទាំង២ខាងលើ គឺភូមិគំរូមួយទៀត មានផ្ទះ៤០ខ្នងនៅជាប់គ្នានេះ ជាជំនួយសប្បុរសជនមកពីរដ្ឋកាតា នឹងសម្ពោធដាក់ឲ្យប្រើប្រាស់ ក្នុងពេលឆាប់ៗនេះទៀត ដែលវាជាគោលដៅមួយ ក្នុងការចូលរួមដោះស្រាយ លំនៅដ្ឋានជាបន្តបន្ទាប់ ជូនដល់ជនក្រីក្រី គ្មានផ្ទះសម្បែងរបស់អ្នកឃុំបឹង ដើម្បីទទួលបានកន្លែងរស់នៅសមរម្យ ផាសុខភាព និងការលើកស្ទួយកម្រិតជីវភាព ឲ្យកាន់តែប្រសើរឡើង ស្របនឹងគោលនយោបាយដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្រ្តី។
លោកឧកញ៉ាក៏បានផ្តាំផ្ញើទៅកាន់បងប្អូនប្រជាពលរដ្ឋថា ដើម្បីឲ្យការទទួលបាននូវអត្ថប្រយោជន៍ផ្សេងៗ នៅតែបន្តកើតមាន ហើយកាន់តែមានលើសលប់ថែមទៀត សម្រាប់សហគមន៍ ទោះតាមរយៈសប្បុរសជន អង្គការ ឬតាមគោលនយោបាយផ្សេងៗ ដែលរាជរដ្ឋាភិបាលផ្តល់ជូន សូមគាំទ្រ និងដឹងគុណចំពោះប្រមុខរាជរដ្ឋាភិបាល និងកុំភ្លេចទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨នេះ ដើម្បីជ្រើសរើសមេដឹកនាំ ដែលជានិច្ចកាលនៅជាមួយពលរដ្ឋ។
លោក អូស្មាន ហាស្សាន់ ក៏បានអញ្ជើញប្រគល់អំណោយរបស់សប្បុរសជន ជូនដល់គ្រួសារក្រីក្រ ចាស់ជរា១៥០គ្រួសារ ក្នុង១គ្រួសារទទួលបាន អង្ករ១៥គីឡូក្រាម, ស្ករស២គីឡូក្រាម, មី១០កញ្ចប់, ប្រេងឆា១ដប ក្នុងនោះក៏មានកញ្ចប់ថវិកា សម្រាប់គណៈកម្មាការភូមិ និងកងកម្លាំសន្តិសុខ និងឧបត្ថម្ភសម្ព័ន្ធយុវជនមុស្លិមកម្ពុជា ខេត្តកំពង់ធំ ៣៥នាក់ ក្នុងម្នាក់ៗទទួលបាន២ម៉ឺនរៀល៕
