(ភ្នំពេញ)៖ បន្ទាប់ពី កញ្ញា ណាណា បានបង្ហោះសារថា បានយកអំណោយទៅចែកជូនតាជី យាយជី ជិតមួយរយនាក់ នៅភ្នំតាម៉ៅ ខេត្ត តាកែវ ដែលធ្វើឲ្យមានការចាប់អារម្មណ៍ និងមានការចុះផ្សាយ ពីសកម្មភាពនោះ ត្រូវបានសាម៊ីខ្លួនអះអាងថា ខ្លួនមានបំណងចង់ធ្វើរឿងនេះ យូហើយតែមិនមានពេលវេលា ទើបតែពេលនេះអាចឆ្លៀតធ្វើហើយមានអារម្មណ៍សប្បាយចិត្ត។
តារាស្រីដែលមានឈ្មោះថា ជាថៅកែស្រី ហាង RN gold salon កញ្ញា ណាណា បានប្រាប់ឲ្យដឹងថា នាងចុះទៅធ្វើការនេះដោយសារតែ មានជាប់សន្យានិងមានការតាំងចិត្តថា បើសិនមានអតិថិជនគាំទ្រសំលៀកបំពាក់ មួយទឹករបស់នាង ច្រើន ហើយបានថវិកាច្រើន នាងនឹងយកលុយនោះទៅធ្វើបុណ្យ យកអំណោយទៅចែកជូនយាយជី តាជី ក្មេងៗនិងអ្នកខ្វះខាតជិតមួយរយៈនាក់ នៅខេត្តតាកែវ។
កញ្ញា ណាណា បានប្រាប់ឲ្យដឹងទៀតថា បើសិនជានៅតែមានការគាំទ្រ និងចូលរួមពីទស្សនិកជន នាងនឹងនៅតែបន្តធ្វើការងារ សប្បុរសធម៌នេះថែមទៀត។ ព្រោះថាការងារសប្បុរសធម៌អាចធ្វើបានគ្រប់គ្នា មិនថាតិចឬច្រើនទេ សំខាន់យើងពេញចិត្តធ្វើវា គឺគ្រប់គ្រាន់ហើយ។
បន្ទាប់ពីបានជោគជ័យ តារាស្រីរូបនេះ ក៏ប្រញាប់យកថវិកាទៅជួយ ចាស់ជរា និងធ្វើការងារសប្បុរសធម៌នេះភ្លាម ដើម្បីចូលរួមចំណែក ជួយសម្រាលការលំបាក របស់ពួកគាត់បានមួយកម្រិត ហើយក្រោយពីបញ្ចប់ការងារនេះ នាងមានគម្រោងបន្តទៀត ដើម្បីធ្វើការងារសប្បុរសធម៌បន្ត៕
