(ភ្នំពេញ)៖ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យប្រតិបត្តិករទឹកស្អាតទាំងអស់ រៀបចំអាជីវកម្មរបស់ខ្លួនឱ្យបានត្រឹមត្រូវ​ មានតម្លាភាព និងមានគណនេយ្យភាព ដើម្បីងាយស្រួលក្នុងការទទួលបានឥណទាន ខណៈថ្មីៗនេះ ធនាគារសហគ្រាសធុនតូច និងមធ្យម​កម្ពុជា (SME Bank) ​ បានសម្រេចបញ្ចុះអត្រាការប្រាក់រហូតដល់៤.៧៥%ក្នុងមួយឆ្នាំ សម្រាប់ម្ចាស់អាជីវកម្ម​ណា ដែលចង់បានហិរញ្ញប្បទានយកទៅពង្រីកអាជីវ​កម្ម។

រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជំរុញបែបនេះ ធ្វើឡើងនៅក្នុងវេទិកាទឹកស្អាត ដែលរៀបចំឡើងនៅថ្ងៃទី២៤ ខែកក្កដា ឆ្នាំ២០២៤នេះ ដោយមានការចូលរួមពីប្រតិបត្តិករផ្គត់ផ្គង់ទឹកស្អាតប្រមាណជាង៤០០នាក់។

លោកលោក ហែម វណ្ណឌី បានសង្កេតឃើញថា បញ្ហាប្រឈមដែលប្រតិបត្តិកទឹកស្អាត​បាននិងកំពុងជួបប្រទះ គឺការពិបាកក្នុងការទទួលបានហិរញ្ញប្បទានពីធនាគារ ដើម្បីពង្រីកអាជីវកម្ម​ទឹកស្អាត ហេតុដូច្នេះទើបក្រសួងឧស្សាហកម្ម ​បានធ្វើការជាធនាគារមួយចំនួន ​ដោយលើកទឹកចិត្តឱ្យធនាគារទាំងនោះចាត់ទុកវិស័យទឹកស្អាតជាវិស័យអទិភាព ក្នុងការផ្តល់ភាពងាយស្រួលលើការអនុម័តឥណទាន និង​ផ្តល់ឥណទានក្នុងអត្រាការប្រាក់សមរម្យ។ ព្រមជាមួយគ្នានេះ នៅថ្ងៃខាងមុខ ក្រសួងក៏ នឹងបង្កើតមូលនិធិអភិវឌ្ឍន៍ទឹកស្អាត ដើម្បីឱ្យមូលនិធិនេះ ផ្តល់ការគាំទ្រដល់ប្រតិបត្តករទឹកស្អាតផងដែរ។

លោកបានជំរុញឱ្យអាជីវកម្មដែលមិនទាន់បានចុះបញ្ជីសូមទៅចុះបញ្ជីឱ្យបានត្រឹមត្រូវតាមច្បាប់។ ចំណែកអាជីវកម្ម ដែលមានបញ្ជីស្នាមមិនទាន់មានគណនេយ្យភាព សូម​លាងសម្អាតអាជីវកម្មរបស់ និងបោះជំហានទៅមុខដោយត្រឹមត្រូវ នោះទើបធនាគារ ​មានការជឿជាក់​ ហើយទទួលបានការគាំទ្រ និងផ្តល់ឥណទានឱ្យបាន។ លើសពីនេះទៅទៀត អាជីវកម្មដែលមានលក្ខណៈត្រឹមត្រូវទាំងអស់ ក៏​នឹងទទួលបានការគាំទ្រពីមូលនិធីទឹកស្អាតផងដែរ។

លោក នៀវ សុគន្ធ នាយកប្រតិបត្តិប្រតិបត្តិការ របស់ធនាគារ SME បានថ្លែងក្នុងវេទិកានេះថា បច្ចុប្បន្ននេះ ធនាគារ SME បាននិងកំពុងធ្វើការជាមួយសមាគមទឹកស្អាតកម្ពុជា ដោយសារ​អាជីវកម្មទឹកស្អាត គឺជាវិស័យអទិភាពមួយដែល ធនាគារ SME ផ្តល់កម្ចីក្នុងអត្រាការប្រាក់ទាប​ ​និងជំរុញការទម្លាក់ហិរញ្ញប្បទានទៅដល់ម្ចាស់សហគ្រាសទាំងនោះ។

លោកបានលើកឡើងថា ដោយមានការសំណូមពីលោករដ្ឋមន្រ្តី ហែម វណ្ណឌី ធនាគារ SME​ កាលពីថ្ងៃទី២២ កក្កដា ឆ្នាំ២០២៤ បានសម្រេចបញ្ចុះអត្រាការប្រាក់សម្រាប់ម្ចាស់អាជីវកម្មទឹកស្អាត ដល់៥%ក្នុងមួយ​ឆ្នាំ​ ទាបជាងអតិថិជនធម្មតា ហើយក៏ជាកម្រិតការប្រាក់ទាបជាងគេបំផុត។ ​​ហើយប្រសិនបើសហគ្រាសនោះជាសមាជិករបស់សមាគមទឹកស្អាតកម្ពុជា ​នឹងទទួលបានការបញ្ចុះការប្រាក់០.២៥% បន្ថែមទៀត ពោលគឺ ពួកគេនឹងទទួលបានអត្រាការប្រាក់ត្រឹមកម្រិត៤.៧៥%ប៉ុណ្ណោះ។

លោកបានបញ្ជាក់ថា ការផ្តល់កម្ចីនេះ នឹងផ្តល់ដល់សហគ្រាសទាំងឡាយណា ដែលមានបុគ្គលិកមិនច្រើនជាង២៥០​នាក់ មានចំណូលដុលប្រចាំឆ្នាំមិនធំជាង៤លានដុល្លារ ព្រមទាំងទ្រព្យសកម្មសរុប មិនឱ្យធំជាង២លានដុល្លារ។

បើតាម លោក នៀវ សុគន្ធ គិតមកទល់ពេលនេះ ធនាគារ SME បានផ្តល់ហិរញ្ញប្បទានដល់ម្ចាស់សហគ្រាសទឹកស្អាត​ ដែលជាសហគ្រាសមានអាជ្ញាបណ្ណត្រឹមត្រូវ មានទឹកប្រាក់​ជាង១៤លានដុល្លារ​៕