(ភ្នំពេញ)៖ ឧកញ៉ា ស្រ៊ៀត មុំសុភា អនុប្រធានសមាគមទេសចរណ៍កម្ពុជា បានធ្វើការបកស្រាយចំពោះការរិះគន់ថា មកទេសចរណ៍នៅក្នុងប្រទេសកម្ពុជា មានតម្លៃថ្លៃ ដោយសារតែមូលហេតុ គឺក្រុមហ៊ុនអាកាសចរណ៍ និងការស្នាក់នៅ, ការញាំអាហារ ព្រមទាំងសេវាផ្សេងៗ មិនសូវមានការប្រកួតប្រជែងខ្លាំង។

ការលើកឡើងបែបនេះ ធ្វើឡើងក្នុងឱកាសដែលឧកញ៉ា ស្រ៊ៀត មុំសុភា អញ្ជើញចូលរួម ក្នុងកិច្ចពិភាក្សាលើប្រធានបទ៖ «អនាគត​វិស័យ​ទេសចរណ៍របស់ប្រទេស​កម្ពុជា» ក្នុងកម្មវិធី FRESH BUSINESS។

ឧកញ៉ា ស្រ៊ៀត មុំសុភា បានបញ្ជាក់ថា «ភាគច្រើន នៅក្នុងប្រទេសកម្ពុជា ឲ្យតែគេ​និយាយមក គេប្រៀបធៀបថា មកប្រទេសកម្ពុជា គឺថ្លៃណាស់ អីចឹងពាក្យថាថ្លៃ មានកត្ដាច្រើន ហេតុអីបានជាថ្លៃ ដោយសារជើងហោះហើរមានកម្រិត និងក្រុមហ៊ុនអាកាសចរណ៍ មិនមានការប្រកួតប្រជែងខ្លាំង ព្រមទាំងការស្នាក់នៅ, ការញាំអាហារ និងសេវាផ្សេងៗជាដើម»។

ទន្ទឹមគ្នានេះ ឧកញ៉ា ស្រ៊ៀត មុំសុភា ក៏បានជំរុញឲ្យបង្កើតការផ្សព្វផ្សាយឲ្យបានច្រើន នៅក្នុងវិស័យទេសចរណ៍ ដើម្បីឲ្យមានតម្រូវការច្រើន ធ្វើឲ្យកញ្ចប់ទេសចរណ៍មានតម្លៃទាបផងដែរ៕

ខាងក្រោមនេះ ជាវីដេអូនៃការលើកឡើង របស់ឧកញ៉ា ស្រ៊ៀត មុំសុភា៖