(ភ្នំពេញ)៖ លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានលើកឡើងថា កម្ពុជាចាំបាច់ត្រូវតែរក្សានូវឯកទេសនីយកម្មផលិត​កម្ម ឬជំនាញផលិត​​របស់ខ្លួន ដើម្បីឆ្លើយតបនឹងការផ្គត់ផ្គង់ទីផ្សារនានា និងការប្រកួតប្រជែងជាមួយប្រទេសដទៃ ខណៈដែលទំនិញដែលស្ថិតក្នុងជំនាញនៃការផលិតរបស់កម្ពុជា មានការទទួលស្គាល់ពីទីផ្សារអន្តរជាតិ។

លើកឡើង​នៅក្នុងកម្មវិធី FRESH BUSINESS​ ​ពិភាក្សាលើប្រធានបទ៖ «ឥទ្ធិពលជំរុញកំណើនពាណិជ្ជកម្មកម្ពុជា»​ មន្រ្តីជាន់ខ្ពស់ពាណិជ្ជកម្មរូបនេះ បានលើកឡើងថា ឈរលើមូលដ្ឋាននៃការពង្រីកទីផ្សារថ្មី និងពង្រឹងទីផ្សារចាស់ គឺជា​មធ្យោបាយតែមួយគត់តែធ្វើឱ្យ​កម្ពុជាមានភាពប្រកួតប្រជែងក្នុងទីផ្សារពិភពលោក។ ហេតុដូច្នេះហើយ បើទោះបីជាកម្ពុជាខិតខំប្រឹងប្រែងធ្វើពិពិធកម្មនៃការនាំចេញទំនិញក៏ដោយ ប៉ុន្តែកម្ពុជាចាំបាច់ត្រូវតែរក្សានូវឯកទេសនីយកម្មផលិត​កម្មរបស់ខ្លួន ដើម្បីរក្សាទីផ្សារចាស់។

លោកបានលើកឡើងថា «ឯកទេសនីយកម្មរបស់កម្ពុជា ​គឺការផលិតសម្លៀកបំពាក់ ស្បែកជើង កាបូបធ្វើដំណើរ គ្រឿងបម្លាស់ គ្រឿងបង្គុំរថយន្ត ខ្សែភ្លើង។ នេះជាសញ្ញាមួយដែលយើងត្រូវតែរក្សានូវឯកទេសនីយកម្មផលិត​ដែលជាជំនាញរបស់កម្ពុជា និងមានការទទួលស្គាល់ពីទីផ្សារអន្តរជាតិ និងមានការជឿទុកចិត្តទៅលើគុណភាព និងផលិតភាពផលិតកម្ម ដែលគេអាចបញ្ជាទិញបរិមាណប៉ុណ្ណាក៏បាន និងនិរន្តភាពនៃការផ្គត់ផ្គង់ ដើម្បីឆ្លើយតបនឹងតម្រូវការទីផ្សារ»។

ស្របជាមួយគ្នានេះ លោកបានលើកឡើងថាដែរថា ​ផ្អែកលើកិច្ចព្រមព្រៀងពាណិជ្ជកម្មសេរី ដែលកម្ពុជាកំពុងមាន ដូចជាកិច្ចព្រៀងពាណិជ្ជកម្មសេរី ជាមួយចិន កូរ៉េ អេមីរ៉ាតអារ៉ាប់រួម កិច្ចព្រមព្រៀងអាសិប និងកិច្ចព្រមព្រៀងជាមួយអាស៊ាន ដែលនឹងជំរុញកំណើនពាណិជ្ជកម្មរបស់កម្ពុជា ក៏ទាមទារឱ្យកម្ពុជាធ្វើពិពិធកម្ម​ទំនិញនាំចេញ ដូចជាផលិតផលកសិកម្មកែច្នៃជាដើម៕